ទោះមានវ័យចាស់បន្តិចមែនតែស្តេចប្រដាល់អាស៊ី Manny Pacquiao នៅតែបន្តធ្វើបានល្អដោយបានយកឈ្នះគូប្រកួតរបស់ខ្លួន DK Yoo ដែលជាគ្រូគុនកូរ៉េខាងត្បូង បន្ទាប់ពីការប្រកួតដ៏ស្វិតស្វាញអស់រយៈពេល៦ទឹកពេញ។
 

ក្នុងទឹកទី១ បង្គោលខៀវ Pacman ជ្រលរបន្តិចហើយក៏លូកស្តាំមួយទៅលើបង្គោលក្រហម DK Yoo តែមិនយូរក៏សងបកមកវិញភ្លាមៗ។ បង្គោលខៀវ មិនហ៊ានបុកចូលនោះទេ ដោយនៅតែបន្តជ្រលរឆ្វេងស្ដាំលក្ខណៈស្ទាបស្ទង់មើលសមត្ថភាព ក៏ដូចជាកម្លាំងគូប្រកួតរបស់ខ្លួន មិនខុសអ្វីពីគ្នាទេបង្គោលក្រហមក៏មិនមានការបុកតបតវិញនោះដែរ។
 

ឈានចូលដល់ទឹកទី២ Manny Pacquiao ក៏នៅតែមិនទាន់បុកខ្លាំងទៅលើ DK Yoo ដដែល។ យ៉ាងណាអ្នកទាំងពីរសុទ្ធមានបច្ចេកទេសសន្សំកម្លាំងដូចគ្នាគ្រាន់តែបោះចំគោលដៅមួយទៅមួយមក ចូលដល់ទឹកទី៣ បង្គោលខៀវ Pacman វាយសម្រុកចូលចំពោះទឹក បង្គោលក្រហម DK Yoo ចំបីដៃជាប់ៗគ្នា ធ្វើឱ្យបង្គោលក្រហមរៀងថមថយកម្លាំងចុះ។
 

បន្តនៅទឹកទី៤ Pacman នៅតែបន្តដើរចូល តែការរារាំង និងការលើកឃុមរងកណ្តាប់ដៃពីកីឡាករបង្គោលក្រហមក៏មិនមានការបែកធ្លាយឡើយ ប៉ុន្តែការធ្វេសប្រហែសរបស់ DK Yoo ធ្វើឱ្យ Manny Pacquiao មានការវាយសន្លប់រហូតអាជ្ញាកណ្តាលរាប់ចំនួន៨មួយលើក។ ចូលដល់ទឹកទី៥ បង្គោលក្រហមព្យាយាមដកថយសន្សំកម្លាំង ដើម្បីវាយបកទៅកាន់បង្គោលខៀវវិញដែរតែមិនមានការថ្លោះធ្លោយអ្វីខ្លាំងក្លានោះដែរ។ រហូតដល់ទឹកទី៦ Pacman ដាក់សម្ពាធសាជាថ្មីទៅកាន់ DK Yoo ឆ្វេងស្ដាំធ្ងន់ៗធ្វើឱ្យបង្គោលក្រហមដួល ខណៈពេលនោះសំឡេងជួងក៏ដល់ទីបញ្ចប់។ ចៅក្រមទាំងបី សម្រេចផ្តល់ពិន្ទុជាឯកច្ឆ័នដោយឱ្យ Manny Pacquiao ឈ្នះ DK Yoo ដោយពិន្ទុ៕