ផ្តើមចេញពីសាលាសហគមន៍ បច្ចុប្បន្ន «សាលារៀនគ្រូយើង» ក្លាយជាគ្រឹះស្ថានអប់រំឯកជនគំរូមួយដែលពង្រឹងសមត្ថភាពកូនចៅអ្នកជនបទឱ្យមានកម្រិតប្រកួតប្រជែងដូចកូនចៅអ្នកទីក្រុង។ លោក យិន សុភាព ដែលជាស្ថាបនិក មានចក្ខុវិស័យខ្ពស់ក្នុងការរួមចំណែកលើកកម្ពស់វិស័យអប់រំ ដោយដាក់ឲ្យដំណើរការសាលារៀនដំបូងកាលពីជាង២២ឆ្នាំនៅក្រុងបានលុង ខេត្តរតនគិរី ហើយបន្តពង្រីកសាខាដល់ខេត្តស្ទឹងត្រែង និងរាជធានីភ្នំពេញ។
ជនជាតិបរទេសមួយចំនួនចាប់អារម្មណ៍ និងអាណិតស្រឡាញ់កម្ពុជា ក្រោយពីបានមកបេសកកម្មនៅប្រទេសនៃស្នាមញញឹមមួយនេះ ដោយក្នុងចំណោមនោះ មាន លោក Scott Neeson បានលាឈប់ពីការងារដ៏ខ្ពង់ខ្ពស់ក្នុងពិភពភាពយន្តហូលីវូដ មកបង្កើតអង្គការមូលនិធិកុមារកម្ពុជា (CCF) ដើម្បីជួយដល់កុមាររស់នៅតំបន់ចាក់សំរាមស្ទឹងមានជ័យ។ ដូចគ្នាផងដែរ លោក យិន សុភាព មានដើមកំណើតនៅខេត្តសៀមរាប ប៉ុន្តែលោកជាប់ចិត្តជាមួយនឹងទឹកដីភូមិភាគឦសាន ក្រោយឆ្លងកាត់បេសកកម្មការងាររបស់លោកនៅខេត្តរតនគិរី។
«ចង់ឱ្យពលរដ្ឋជនបទនៅរតនគិរី ជាពិសេសនៅទឹកដីឦសាន មានចំណេះដឹង និងជំនាញខ្លាំង មិនចាញ់អ្នកនៅភ្នំពេញ»។ នេះជាសុបិនដ៏ធំរបស់លោក យិន សុភាព តាមរយៈការផ្តួចផ្តើមបង្កើតសាលារៀនគ្រូយើង តាំងពីឆ្នាំ២០០១ ដើម្បីរួមចំណែកលើកកម្ពស់វិស័យអប់រំនៅកម្ពុជា។
ដំណើរដំបូងប្រកបដោយជោគជ័យនៅក្រុងបានលុង ខេត្តរតនគិរី សាលាគ្រូយើង បន្តរីកសាខាដល់ខេត្តស្ទឹងត្រែងនៅឆ្នាំ២០១៧ ហើយកាលពីខែកញ្ញា ឆ្នាំ២០២២ កន្លងទៅនេះ លោក យិន សុភាព ដែលជាម្ចាស់ជ័យលាភីសហគ្រិនថ្នាក់ជាតិឆ្នាំ២០២១ បានដំណើរការសាខាទីបីក្នុងរាជធានីភ្នំពេញ ដោយមានអគារពណ៌លឿងកម្ពស់១០ជាន់ស្ថិតនៅតាមបណ្តោយមហាវិថីកងយោធពលខេមរភូមិន្ទ ឬផ្លូវ២៧១។
ពីអ្នកច្បាប់កា្លយជាសហគ្រិនក្នុងវិស័យអប់រំ
ព្រោះតែក្តីអាណិតស្រឡាញ់ក្មេងៗនៅតំបន់ដាច់ស្រយាលដែលគ្មានសាលារៀនសូត្រ លោក សុភាព បានឆ្លៀតពេលពីការងារស្រាវជ្រាវផ្នែកច្បាប់ទៅបង្រៀនភាសាអង់គ្លេសមួយទៅពីរម៉ោងក្នុងមួយថ្ងៃដល់ក្មេងៗ នៅខេត្តរតនគិរី ដោយមិនយកកម្រៃ។ «ក្រោកពីព្រលឹមទៅបង្រៀនក្មេងៗនៅសាលាមួយម៉ោងហើយបានទៅការងារធ្វើការងារ។ ពេលល្ងាចចេញពីធ្វើការវិញ គឺទៅបង្រៀនក្មេងៗមួយម៉ោងទៀតបានចូលផ្ទះដេកវិញ»។ នេះជាសកម្មភាពប្រចាំថ្ងៃនាអំឡុងពេល លោក សុភាព ទៅបំពេញបេសកកម្មការងារក្នុងទឹកដីភាគឦសាន ដែលបានក្លាយជាឧបនិស្ស័យមួយបង្កើតនូវក្តីស្រឡាញ់ក្នុងវិស័យអប់រំឡើងសម្រាប់អ្នកច្បាប់មានដើមកំណើតមកពីខេត្តសៀមរាបរូបនេះ។
ជាមួយនឹងការគាំទ្រយ៉ាងខ្លាំងពីប្រជាសហគមន៍ ជាពិសេសពីសំណាក់ឪពុកម្តាយសិស្សផងនោះ លោក សុភាព សម្រេចជួលដីពីកសិករមួយកន្លែងនៅក្រុងបានលុង ដើម្បីបង្កើតសាលារៀនគ្រូយើងឡើង។ វត្តមានគ្រូយើងនៅរតនគីរី មានតាំងពីអំឡុងឆ្នាំ២០០០មក ដែល កាលណោះ គ្រូយើងគឺជាសាលារៀនសហគមន៍តូចមួយប៉ុណ្ណោះ។ សាលារៀននេះ ដំណើរការដោយរលូនក្រោមការទ្រទ្រង់ថវិកាពីហោប៉ៅផ្ទាល់របស់លោក សុភាព ដែលបានមកពីបំពេញការងារលើជំនាញច្បាប់របស់ខ្លួននៅកម្មវិធីអភិវឌ្ឍន៍អង្គការសហប្រជាជាតិ (UNDP)។
«ខ្ញុំធ្វើការនៅ UNDP ដំបូងបានប្រាក់ខែជាង៣០០ដុលា្លរ។ ខ្ញុំចំណាយផ្ទាល់ខ្លួនផង ជាមួយក្មេងៗលើការរៀនសូត្រហ្នឹងផង អស់ជាង១០០ដុល្លារ។ សល់ប្រហែល២០០ដុល្លារទៀត ខ្ញុំសន្សំទិញដីដែលជួយគេបើកសាលារៀនហ្នឹងយកទៅ»។ លោក សុភាព បានលើកឡើងបែបនេះដោយបន្តរៀបរាប់ប្រាប់សារព័ត៌មានថ្មីៗយ៉ាងដូច្នេះ៖«ខ្ញុំធ្វើកិច្ចការងារទាំងអស់ហ្នឹង គឺខ្ញុំសប្បាយរីករាយដោយគ្មានខ្វល់ខ្វាវពីអ្វីឡើយឱ្យតែក្មេងនៅតំបន់ហ្នឹងបានរៀន»។
លោក យិន សុភាព ផ្តល់បណ្ណសរសើរដល់ឆ្នើមនៅសាលារៀនគ្រូយើងនៅខេត្តរតនគិរី នាពេលកន្លងមក»។ រូបថត៖ ផេកហ្វេកប៊ុក«សាលារៀនគ្រូយើង»
បន្ទាប់ពីគ្រូយើងដំណើរការបាន៥ឆ្នាំ លោក សុភាព ក៏ប្រគល់សាលារៀននេះឱ្យក្រុមប្រឹក្សាសហគមន៍ ជាអ្នកគ្រប់គ្រងបន្ត ហើយលោកត្រលប់មកធ្វើការងារនៅភ្នំពេញវិញ ព្រោះតែការរងារស្រាវជ្រាវច្បាប់ប្រពៃណីជនជាតិដើមភាគតិចត្រូវបានបិទបញ្ចប់។ ពេលនៅភ្នំពេញ បុរសសម្បូរសំនួនវោហាររូបនេះ បន្តធ្វើការនៅ UNDP បានមួយរយៈក៏ប្តូរទៅធ្វើការជាមួយអង្គការពលកម្មអន្តរជាតិ (ILO) តួនាទីជាអ្នកស្រាវជ្រាវ និងប្រឹក្សាផ្នែកច្បាប់នៃជំនាញច្បាប់ដីធ្លី និងធនធានធម្មជាតិដែលបានពីសាកលវិទ្យាល័យភូមិន្ទនីតិសាស្រ្ត និងសេដ្ឋកិច្ច។
ដោយមើលឃើញជីវិតជាអ្នកច្បាប់ដូចជារូបខ្លួនផ្តល់ផលប្រយោជន៍បានតិចណាស់សម្រាប់សង្គម ហើយក៏មិនសូវមានខ្លឹមសារសម្រាប់ជីវិតផងនោះ ទីបំផុតលោក សុភាព បានសម្រេចចិត្តទៅរតនគិរីដើម្បីធ្វើជាគ្រូបង្រៀនវិញនាអំឡុងឆ្នាំ២០១១។ គ្រានោះហើយដែលលោកសម្រេចបោះបង់ចោលទាំងស្រុងនូវការងារអាជីពជាអ្នកច្បាប់ក្នុងរយៈពេល១០ឆ្នាំ នៅស្ថាប័នអន្តរជាតិ។ លើសពីនេះលោក ក៏សម្រេចខ្ចីប្រាក់ពីធនាគារមកវិនិយោគលើសាលារៀនគ្រូយើង ដោយបានប្រែក្លាយសាលារៀនសហគមន៍ទៅជាសាលារៀនឯកជនដែលមានកម្រិតអប់រំខ្ពស់មកទល់បច្ចុប្បន្ន។
«ពីសាលារៀនដែលគ្មានជញ្ជាំង ក្លាយជាអគារសិក្សាល្អដែលមានបំពាក់នូវបរិក្ខាសិក្សាទំនើប និងមានគ្រូបណ្តុះបណ្តាលត្រឹមត្រូវ។ សូម្បីតែការរៀនរបស់សិស្សក៏យើងប្រើកុំព្យូទ័រភាគច្រើន យើងប្រើបច្ចេកវិទ្យាដែលមានលក្ខណៈទំនើបអស់ហើយ។ យើងប្រែប្រួលខ្លាំងមែនទែន ហើយយើងក៏បានវិវត្តខ្លួនមកទាន់សម័យអប់រំបែបឌីជីថល ផងដែរ»។ នេះជាភាពរីកចម្រើនខ្លាំងរបស់សាលារៀនគ្រូយើងនារយៈពេល១០ឆ្នាំចុងក្រោយមកនេះ ក្រោមទស្សនវិស័យកសាងធនធានមនុស្សសម្រាប់ការអភិវឌ្ឍប្រទេសជាតិ និងកាត់បន្ថយគម្លាតការរស់នៅរវាងអ្នកទីក្រុងនិងអ្នកនៅខេត្តរតនគិរី តាមរយៈការអប់រំ។
ក្នុងសម្លៀកបំពាក់ខោវពណ៌ខ្មៅជាមួយអាវដៃវែងពណ៌ផ្ទៃមេឃ ដែលមានពាក់ខ្សែកាតសាលារៀនគ្រូយើងផងនោះ លោក សុភាព បានលើកឡើងយ៉ាងដូច្នេះ៖ «ការអប់រំដែលខ្លាំងធ្វើឱ្យពលរដ្ឋនៅជនបទនៃខេត្តរតនគិរី មានចំណេះដឹង និងជំនាញខ្លាំង មិនចាញ់ប្រជាពលរដ្ឋរស់នៅរាជធានីភ្នំពេញទេ។ មានន័យថា សាលារៀននៅខេត្តរតនគិរី ក៏មិនចាញ់សាលារៀននៅភ្នំពេញដែរ។ អ៊ីចឹងហើយ! បានជាខ្ញុំវិនិយោគលើការអប់រំធំមែនទែននៅខេត្តរតនគីរី មុននឹងឈានដល់ការពង្រីកសេវាថ្មីនៅភ្នំពេញ»។
វិថីកសាងធនធានមនុស្ស
លោក សុភាព មានគោលដៅឱ្យខេត្តទាំងអស់មានសាលារៀនល្អ និងផ្តល់ការអប់រំខ្ពស់ បើទោះបីខេត្តនោះស្ថិតនៅតំបន់ដាច់ស្រយាល ឬខេត្តជាក្រីក្រកម្រិតណាក៏ដោយ គឺធ្វើយ៉ាងណាកុំឱ្យការអប់រំនៅខេត្តមានគម្លាតឆ្ងាយគ្នាខ្លាំងពេកពីការអប់រំនៅភ្នំពេញ។ ដើម្បីសម្រេចទិសដៅនេះនាអនាគត លោក សុភាព ក៏សម្រេចពង្រីកគ្រូយើងសាខាទី៣នៅភ្នំពេញឡើងបន្ទាប់ពីសាខាទី២ មានទីតាំងនៅខេត្តស្ទឹងត្រែង។ សាលារៀនគ្រូយើងនៅខេត្តទាំង២នេះ គឺមានសិស្សប្រមាណ៤០០០នាក់ ។
«យើងមកភ្នំពេញ ក្នុងគោលដៅមិនត្រឹមតែបង្កើតសាលារៀនមួយឡើងទេ។ ប៉ុន្តែ យើងមកនេះគគឺបង្កើតទីស្នាក់ការធំរបស់សាលារៀនគ្រូយើង ដើម្បីកសាងក្រុមធានាគុណភាព និងស្តង់ដារអប់រំ សម្រាប់ចុះទៅបង្កើតសាលារៀន និងត្រួតពិនិត្យ បណ្តុះបណ្តាល ដោយធានាគ្រូយើងគ្រប់កន្លែងនៃខេត្តគោលដៅទាំងអស់គឺដើរបានល្អដូចៗគ្នា។ យើងជួយជ្រោមជ្រែងដោយធ្វើយ៉ាងម៉េចឱ្យការអប់រំរបស់ពលរដ្ឋនៅខេត្តងើបខ្លាំងឡើង»។ នេះជាការលើកឡើងរបស់លោក សុភាព ដោយបង្ហាញនូវសុទិដ្ឋិនិយមខ្ពស់ថា នៅពេលពលរដ្ឋខ្មែរមានចំណេះដឹងខ្ពង់ខ្ពស់ហើយនោះ ភាពក្រីក្រ នឹងត្រូវកាត់បន្ថយ ហើយការអភិវឌ្ឍប្រទេសជាតិ កាន់តែជឿលឿន។
សាលារៀនគ្រូយើង សាខារាជធានីភ្នំពេញដែលស្ថិតនៅតាមបណ្តោយមហាវិថីកងយោធពលខេមរភូមិន្ទឬ ផ្លូវ២៧១។
បើតាមសហគ្រិនវ័យ៥០ឆ្នាំរូបនេះ ការដាក់ទីតាំងសាលារៀនគ្រូយើងនៅរាជធានីភ្នំពេញ គឺជាចំណុចស្នូលដ៏រឹងមាំក្នុងការពង្រីកទីតាំងគ្រូយើងដល់ខេត្តព្រះវិហារ ក្រចេះ មណ្ឌលគិរី ព្រៃវែង ស្វាយរៀង និងខេត្តតូចៗឯទៀតនៅកម្ពុជា។ លោក សុភាព បានបញ្ជាក់ថា៖ «បើយើងមិនមកភ្នំពេញទេ គឺយើងពិបាកក្នុងការពង្រីកខ្លួនដល់ខេត្តគោលដៅផ្សេងៗ បើទោះបីគ្រូយើងមានឈ្មោះល្បីជាង២០ឆ្នាំនៅរតនគីរីក៏ដោយ»។
លោកបន្តពន្យល់ដូច្នេះ៖ « ភ្នំពេញជាកន្លែងដែលយើងងាយក្នុងការកៀរគរធនធានមនុស្ស ហិរញ្ញវត្ថុ និងចាប់ដៃគូជាមួយស្ថាប័នផ្សេងៗជាពិសេសសាលារៀនដៃគូនៅបរទេស ដើម្បីអនុវត្តផែនការយើង»។ លើសពីនេះ យើងមកភ្នំពេញក៏ដើម្បីកសាងឈ្មោះបន្ថែមតាមរយៈការផ្តល់សេវាអប់រំដល់សិស្សដែលមានគុណភាពនិងការប្រកួតជែងខ្លាំង»។
សាលារៀននៅជនបទមួយមានស្តង់ដារ គឺត្រូវមានហេដ្ឋារចនាសម្ព័ន្ធល្អ ការរៀបចំកម្មវិធីសិក្សាល្អ ជាមួយគុណភាពនៃប្រព័ន្ធគ្រប់គ្រងក្នុងសាលារៀន។ បច្ចុប្បន្ន គ្រូយើងក្រៅតែផ្តល់សេវាអប់រំដល់សិស្សដែលឆ្លើយតបនឹងបដិវត្តន៍ឧស្សាហកម្ម៤.០ហើយនោះ ក៏ផ្តោតសំខាន់លើការបណ្តុះបណ្តាលដែលធ្វើឱ្យសិស្សមានការច្នៃប្រឌិត មានភាពក្លាហាន ការចែករំលែក មានទំនួលខុសត្រូវ ចេះប្រើប្រាស់បច្ចេកវិទ្យា និងប្រព័ន្ធឌីជីថល ប្រើប្រាស់ភាសាជាតិ-អន្តរជាតិបានល្អ រួមទាំងរបៀបរស់នៅក្នុងសង្គមបានល្អប្រសើរ ជាពិសេសសុជីវធម៌ និងគុណធម៌។ លក្ខណៈអប់រំទាំងអស់នេះហើយដែលធ្វើឱ្យសាលារៀន គ្រូយើងមានភាពល្បីខ្លាំងប្រចាំតំបន់ភាគឦសាននៃប្រទេស៕