ភ្នំពេញ៖ ក្រុមហ៊ុន Oikocredit អះអាងថា ខ្លួននឹងចូលរួម ចូលរួមសហការផ្ដល់ព័ត៌មានដល់ស្ថាប័នទទួលពាក្យបណ្តឹងថ្នាក់ជាតិរបស់រដ្ឋាភិបាលប្រទេសហូឡង់ សម្រាប់ការទទួលខុសត្រូវសកម្មភាពអាជីវកម្ម (National Contact Point for Responsible Business Conduct) ជុំវិញបណ្ដឹងរបស់ សង្គមស៊ីវិលចំនួនបី។ ប្ដឹងនេះ បានចោទ Oikocredit ថាមិនគោរពតាមគោលការនោយោគ ហើយរួមចំណែកបង្កើតឲ្យមានវិបត្តិសិទ្ធិមនុស្ស។
អង្គការចំនួនបី រួមមាន អង្គការសម្ព័ន្ធខ្មែរជំរឿន និងការពារសិទ្ធិមនុស្ស លីកាដូ និង អង្គការសមធម៌កម្ពុជា និងអង្គការ FIAN អាល្លឺម៉ង់ បានរួមគ្នា ប្ដឹងក្រុមហ៊ុន អយកូក្រេឌីត (Oikocredit)។ ពួកគេ បានដាក់ពាក្យបណ្ដឹងទៅស្ថាប័នទទួលពាក្យបណ្តឹងថ្នាក់ជាតិ របស់រដ្ឋាភិបាលប្រទេសហូឡង់សម្រាប់ការទទួលខុសត្រូវសកម្មភាពអាជីវកម្ម (National Contact Point for Responsible Business Conduct) ដោយចោទថាក្រុមហ៊ុន Oikocredit បរាជ័យក្នុងការអនុវត្តវិធានការត្រួតពិនិត្យ ឱ្យបានគ្រប់ជ្រុងជ្រោយ និងវិនិយោគលើវិស័យមីក្រូហិរញ្ញវត្ថុនៅកម្ពុជា ទាំងដែលបានដឹងជាមុនថា សកម្មភាពវិនិយោគរបស់ខ្លួនរួមចំណែកដល់ការរំលោភបំពានសិទ្ធិមនុស្សនៅកម្ពុជាក៏ដោយ។
ក្នុងសេចក្ដីថ្លែងការរបស់អង្គការទាំងបី បញ្ជាក់ថា ក្រុមហ៊ុន Oikocredit មិនអនុវត្តវិធានការត្រួតពិនិត្យឲ្យគ្រប់ជ្រុងជ្រោយ និងវិនិយោគទាំងផលអវិជ្ជមាន ចាំតាំងពីឆ្នាំ២០១៧មកម្ល៉េះ។ នៅចន្លោះឆ្នាំ ២០១៧ ដល់២០២២ ក្រុមហ៊ុន Oikocredit បានបង្កើនការវិនិយោគទៅលើគ្រឹះស្ថានមីក្រូហិរញ្ញវត្ថុនៅកម្ពុជា ដែលក្នុងនោះកើនឡើងពី ៥០លានអឺរ៉ូ ទៅជាង៧៦លានអឺរ៉ូ។ ហេតុនេះ កម្ពុជា បានក្លាយប្រទេសទទួលបានការវិនិយោគធំទីពីរ ពីក្រុមហ៊ុន Oikocredit។
ក្នុងសេចក្ដីថ្លែងការណ៍ អង្គការទាំងបានលើកឡើងបែបនេះ៖ «ការវិនិយោគរបស់ក្រុមហ៊ុន Oikocredit បានរួមចំណែកក្នុងការបង្កើតឱ្យមានវិបត្តិសិទិ្ធមនុស្ស ដោយសារបញ្ហាបំណុលនៅកម្ពុជា ។ វិបត្តិនេះ បង្កឱ្យមានការលក់ដីដោយបង្ខំ អសន្តិសុខស្បៀង និងការបាត់បង់ជីវភាពរស់នៅសមរម្យរបស់ពលរដ្ឋដែលជំពាក់បំណុលរាប់សែននាក់»។ ជាមួយគ្នាដែរ ពួកគេ ការរំលោភសិទ្ធិមនុស្សជាប្រព័ន្ធ នៅក្នុងវិស័យមីក្រូហិរញ្ញវត្ថុនៅកម្ពុជា ក្នុងរយៈពេលប៉ុន្មានឆ្នាំចុងក្រោយនេះ គឺមានការរួមចំណែកពីគ្រឹះស្ថានមីក្រូហិរញ្ញវត្ថុដែលទទួលបានមូលនិធិដោយផ្ទាល់ ពី Oikocredit ផងដែរ។
ជុំវិញករណីនេះ អ្នកស្រី ណាលី ពីឡូក នាយិកាទទួលបន្ទុកកិច្ចការក្រៅតំបន់នៃអង្គការលីកាដូ បានលើកឡើងចំណុចៗ ទៅក្រុមហ៊ុន Oikocredit ថាពួកគេតែងអះអាងថាខ្លួន ជាវិនិយោគិនមួយរូប ដើម្បីអភិវឌ្ឍសង្គម ប៉ុន្តែការវិនិយោគរបស់ពួកគេនៅកម្ពុជា បានប៉ះពាល់ដល់អ្នកខ្ចីប្រាក់យ៉ាងធ្ងន់ធ្ងរ។ ហេតុនេះ អ្នកស្រី បានបង្ហាញក្ដីសង្ឃឹមបែបនេះ៖ «ក្ដីសង្ឃឹមរបស់យើងគឺថា ពាក្យបណ្ដឹងនេះ នឹងបង្ខំឱ្យ Oikocredit ក៏ដូចជាវិនិយោគិនផ្សេងទៀត ដែលបានអះអាងថា ធ្វើវិនិយោគដើម្បីសង្គមប្រកបដោយប្រសិទ្ធភាព ប៉ុន្តែបង្កើតឱ្យមានវិបត្តិសិទ្ធិមនុស្សនេះ ឱ្យជួសជុលការខូចខាតដែលពួកគេបានរួមចំណែក និងផ្ដល់ការអនុគ្រោះពិតប្រាកដ សម្រាប់ប្រជាពលរដ្ឋខ្មែរដែលជាអ្នកខ្ចីប្រាក់»។
ឆ្លើយតបទៅហ្នឹងបណ្ដឹងខាងលើ នៅថ្ងៃទី១២ធ្នូនេះ Oikocredit បានចេញសេចក្ដីប្រកាសព័ត៌មានថា
គោលដៅរបស់ Oikocredit ក្នុងនាមជាអ្នកវិនិយោគក្នុងវិស័យមីក្រូហិរញ្ញវត្ថុ គឺដើម្បីលើកកម្ពស់ជីវភាពរបស់អ្នកមានប្រាក់ចំណូលទាប។ ក្នុងន័យនេះ ពួកគេពន្យល់បន្ថែមថា គឺជួយជំរុញអ្នកទាំងនោះ ឲ្យមានចំណូលនិរន្តរភាព តាមរយៈការគាំទ្រដៃគូ ដោយផ្តល់សេវាហិរញ្ញវត្ថុប្រកបដោយការទទួលខុសត្រូវ។ «ដូច្នេះ យើងទទួលយករបាយការណ៍ណាមួយ អំពីអាកប្បកិរិយាមិនសមគួរ ឬគ្មានក្រមសីលធម៌ ដែលអាចកើតមានដោយដៃគូរបស់យើងយ៉ាងធ្ងន់ធ្ងរ»។ Oikocredit សង្កត់ធ្ងន់បែបនេះ ។
ជាមួយគ្នាដែរ Oikocredit បញ្ជាក់ថា ពួកគេនឹងស្រាវជ្រាវលើករណីដែលសង្គមស៊ីវិលលើកឡើង ហើយនឹងបង្កើនការប្រុយប្រយ័ត្នលើ ហើយចូលរួមធ្វើការជាមួយដៃគូនានា ដើម្បីការពារអតិថិជន ប្រកបដោយស្ដង់ដារ និងមានក្រមសីលធម៌។ លើសពីនេះ ក្រុមហ៊ុនេះ បានបញ្ជាក់ថា៖ «Oikocredit International នឹងសហការយ៉ាងពេញលេញជាមួយស្ថាប័នទទួលពាក្យបណ្តឹងថ្នាក់ជាតិរបស់រដ្ឋាភិបាលប្រទេសហូឡង់ ក្នុងការផ្តល់ព័ត៌មានចាំបាច់ទាំងអស់»។
កន្លងមក អង្គការទាំងបីដែលប្ដឹងខាងលើ បានប៉ាន់ប្រមាណថា អ្នកខ្ចីប្រាក់រហូតដល់ ១៦ម៉ឺននាក់ នៅក្នុងកម្ពុជា បានលក់ដី ដើម្បីបង់សងបំណុលគ្រឹះស្ថានមីក្រូហិរញ្ញវត្ថុ ក្នុងរយៈពេល៥ឆ្នាំចុងក្រោយនេះ។ ហើយកាលពីខែតុលា ឆ្នាំ២០២១ ធនាគារអភិវឌ្ឍនៅហូឡង់ឈ្មោះ FMO បានវិនិយោគទឹកប្រាក់ ៥០លានដុល្លារ នៅក្នុងគ្រឹះស្ថានមីក្រូហិរញ្ញវត្ថុមួយ ដែលជាប់ពាក់ព័ន្ធនឹងការរំលោភបំពាន។ អំឡុងពេលនោះ មូលនិធិជំនួយមួយដែលបានម្ចាស់ភាគហ៊ុនដូចជា សាជីវកម្មហិរញ្ញវត្ថុអន្តរជាតិ KfW, BMZ និងស្ថាប័នរដ្ឋនៅអឺរ៉ុបផ្សេងទៀត បានបង្កើនការវិនិយោគរបស់ពួកគេ នៅក្នុងគ្រឹះស្ថានមីក្រូហិរញ្ញវត្ថុផងដែរ។ ក្នុងខែមេសា ឆ្នាំ២០២២ ធនាគារអភិវឌ្ឍហេដ្ឋារចនាសម្ព័ន្ធអាស៊ី (AIIB)បានអនុម័តយ៉ាងប្រញាប់ប្រញាល់ នូវការវិនិយោគដំបូងរបស់ខ្លួន នៅក្នុងវិស័យមីក្រូហិរញ្ញវត្ថុនៅកម្ពុជា ដោយសន្យាថានឹងផ្ដល់ទឹកប្រាក់ចំនួន ១៧៥លានដុល្លារ ទៅកាន់គ្រឹះស្ថានមីក្រូហិរញ្ញវត្ថុចំនួន២ ដែលបច្ចុប្បន្នកំពុងរងបណ្ដឹងនៅ ការិយាល័យភាពអនុលោម ទីប្រឹក្សាដោះស្រាយវិវាទ៕