លោក ម៉ាក្រុង មានវត្តមានរួចហើយក្នុងការប្រកួតវគ្គពាក់កណ្តាលផ្តាច់ព្រ័ត្រដែលបារាំងឈ្នះម៉ារ៉ុក ២-០ នៅថ្ងៃទី១៥ មុនពេលធ្វើដំណើរទៅកាន់ទីក្រុងព្រុចសែល ប្រទេសបែលហ្ស៊ិក ដើម្បីចូលរួមកិច្ចប្រជុំកំពូលរបស់សហភាពអឺរ៉ុប។
 

ការធ្វើដំណើររបស់លោក ម៉ាក្រុង ទៅកាន់ប្រទេសកាតា ជាមួយវត្តមាននៅកៅអី VIP និងបន្ទាប់មកលោកចូលក្នុងបន្ទប់ផ្លាស់សម្លៀកបំពាក់ដើម្បីអបអរបារាំងទទួលបានជ័យជម្នះលើម៉ារ៉ុក ទទួលបានការរិះគន់ជាច្រើនពីសំណាក់គូប្រជែងរបស់ខ្លួន ដែលជាអ្នកនយោបាយបារាំង។
 

ស្របពេលប្រធានាធិបតីបារាំងនៅព្រុចសែល ប៉ូលីសបែលហ្ស៊ិកដែលស៊ើបអង្កេតការចោទប្រកាន់ថាកាតាបានផ្តល់សំណូកដល់អ្នកនយោបាយអឺរ៉ុប បានចាប់ខ្លួនសមាជិកសភាអឺរ៉ុបម្នាក់ និងសហការី៣នាក់ផ្សេងទៀតជុំវិញបទចោទពុករលួយ។ យ៉ាងណាក៏ដោយ កាតា​បដិសេធ​រាល់​ការ​ចោទខាងលើនេះ។
 

លោក ម៉ាក្រុង បានប្រាប់អ្នកយកព័ត៌មាននៅទីក្រុងព្រុចសែល ទីដែលលោកទៅប្រជុំសហភាពអឺរ៉ុប អំពីដំណើរទៅកាតាថា៖«ខ្ញុំពិតជាមានផាសុកភាពនៅទីនោះ។ កាលពីបួនឆ្នាំមុន ខ្ញុំបានគាំទ្រក្រុមបារាំងនៅរុស្ស៊ី ហើយឆ្នាំនេះខ្ញុំនឹងនៅតែគាំទ្រពួកគេនៅកាតា»។
 

ប្រធានាធិបតីបារាំងវ័យ៤៤ឆ្នាំ គ្រោងនឹងត្រឡប់ទៅទីក្រុងដូហាវិញនៅថ្ងៃទី១៨ ដើម្បីទស្សនាការប្រកួតរវាងម្ចាស់ការពារជើងឯក ទល់អាហ្សង់ទីនក្នុងវគ្គផ្តាច់ព្រ័ត្រ World Cup ឆ្នាំ២០២២ បើទោះមានការចោទគ្នាយ៉ាងនេះក្តី។
 

នៅមុនជំនួបវគ្គផ្តាច់ព្រ័ត្រ World Cup នៅថ្ងៃទី១៨ ខែធ្នូ ម្ចាស់ផ្ទះកាតារងការចោទពីបទពុករលូយ និងសើរើជំវិញច្បាប់ការងារ លើពលករចំណាកស្រុក ក៏ដូចជាចំនួនអ្នកស្លាប់អំឡុងការសាងសង់កីឡដ្ឋានដែលទាក់ទងនឹងការប្រកួតបាល់ទាត់ពិភពលោកឆ្នាំ២០២២នេះ។
 

ស្របពេលមានការរិះគន់កាតា ក៏មានអ្នក​​សរសើរ​ប្រទេសអារ៉ាប់មួយនេះ រៀបចំការប្រកួត FIFA World Cup បានល្អផងដែរ៕