កីឡាករ Lionel Messi ទំនងជាត្រូវបានផ្ដល់កិត្តិយសយ៉ាងខ្លាំងពីប្រជាជនអារ៉ាប់ ដោយ Bisht ត្រូវបានពាក់​លើខ្លួនកីឡាកររូបនេះ ក្នុងពេលទទួលពានរង្វាន់ FIFA World Cup កាលពីថ្ងៃទី១៨ ខែធ្នូ។ អាវស្បៃខាងក្រៅពណ៌ខ្មៅ គឺជាសម្លៀកបំពាក់ប្រពៃណីបុរសនៅក្នុងពិភពអារ៉ាប់ ដែលជារឿយៗត្រូវបានពាក់សម្រាប់ឱកាសពិសេស សម្រាប់ជនកំពូលផ្សេងៗ ដូចជាអាពាហ៍ពិពាហ៍ជាដើម។ ម្យ៉ាងវិញទៀត Bisht ត្រូវបានពាក់ដោយរាជវង្ស ដែលទាក់ទងនិងបព្វជិត មន្ដ្រី ឬឥស្សរជនណាមួយ។
 

នេះ គឺជាការប្រកួត World Cup លើកដំបូងនៅក្នុងពិភពអារ៉ាប់ ហើយក៏ជាលើកទីមួយ ដែលអ្នកគាំទ្របានឃើញសម្លៀកបំពាក់ចូលរួមក្នុងការប្រារព្ធពិធីផ្ដល់ពានរង្វាន់ និងពិធីបិទ World Cup 2022។ នេះ ក៏ជាលើកទីមួយ ដែលសម្លៀកបំពាក់ប្រពៃណីត្រូវពាក់លើប្រធានក្រុមម្ចាស់ជើងឯក ហើយក៏ជាតារាបាល់ទាត់ដ៏ល្បីល្បាញទូទាំងពិភពលោក។
 

ម្ចាស់ពានរង្វាន់ Ballon d'Or ប្រាំពីរសម័យ Lionel Messi ត្រូវបានលោក Gianni Infantino ប្រធាន FIFA និងព្រះអង្គ​ម្ចាស់​  Tamim bin Hamad Al Thani នៃប្រទេស​កាតា (Emir of Qatar) បានប្រគល់រង្វាន់ជូនដោយផ្ទាល់ ដោយអាវ​ស្បៃពណ៌ខ្មៅ ត្រូវបាន​ផ្តល់​ដោយ Emir របស់​កាតាផ្ទាល់។
 

គួរបញ្ជាក់ផងដែរថា កីឡាករវ័យ ៣៥ឆ្នាំរូបនេះ បានដើរតួរយ៉ាងសំខាន់ចំពោះការប្រកួតជាមួយជម្រើសជាតិបារាំង ក្នុងវគ្គផ្ដាច់ព្រ័ត្រ ដោយស៊ុតបញ្ចូលទីបានពីរដង និងបើកការស៊ុតបញ្ចូលទីក្នុងការស៊ុតបាល់កាត់សេចក្ដី ១១ម៉ែត្រ ឈ្នះ ៤-២ បន្ទាប់ពីការប្រកួតពេញម៉ោង បានបញ្ចប់ទៅត្រឹមលទ្ធផលស្មើ ៣-៣ និងការប្រកួតថែម ម៉ោង ១៥នាទី ២ដង។ Lionel Messi បានឈ្នះរង្វាន់កីឡាករល្អប្រចាំការប្រកួត (Player of the Match) និង កីឡាករល្អប្រចាំព្រឹត្តិការណ៍ (Player of the Tournament) បន្ទាប់ពីផ្លុំកញ្ចែចុងក្រោយ ដើម្បីដាក់ត្រាលើការប្រកួតជានិមិត្តរូបពិតប្រាកដសម្រាប់ខ្លួនគាត់៕