ប្រជាជនអាហ្សង់ទីនរាប់ម៉ឺននាក់បានប្រមូលផ្តុំគ្នានៅតាមដងផ្លូវជាច្រើនក្នុងទីក្រុងប៊ុយណូស៊ែ ប្រទេសអាហ្សង់ទីន ខណៈមនុស្សរាប់ម៉ឺននាក់ផ្សេងទៀតស្ថិតនៅចំកណ្តាលទីក្រុងត្រង់ទីតាំងវិមានឯករាជ្យ«The Obelisco» ក្នុងគោលបំណងចង់ឃើញក្រុមកីឡាករអាហ្សង់ទីនជាមួយពានរង្វាន់បាល់ទាត់ពិភពលោក World Cup។
 

តែការចូលរួមយ៉ាងច្រើនកុះករនោះបានបង្កើតឱ្យមានរូបភាពនៃគ្រោះថ្នាក់ ដោយអ្នកគាំទ្រទាំងអស់នោះបាននាំគ្នាសម្រុកឡោមព័ទរថយន្តក្រុង និងខ្លះទៀតបានព្យាយាមលោតតោងរថយន្តក្រុងនោះក្នុងពិធីដង្ហែពានរង្វាន់ដើម្បីចង់ឃើញក្រុមកីឡាករពិសេស Lionel Messi។ រដ្ឋាភិបាលអាហ្សង់ទីនបានប្រកាសថ្ងៃឈប់សម្រាក ២ថ្ងៃបន្ទាប់ពីទទួលបានជ័យជម្នះលើបារាំងនៅប្រទេសកាតា។
 

នាពិធីដង្ហែពាននោះការធ្វើដំណើរតាមរថយន្តក្រុងត្រូវបានក្រុមកីឡាករអាហ្សង់ទីនរួមទាំងគ្រូបង្វឹក មន្ត្រីក្រុមជម្រើសជាតិបោះបង់ចោលគម្រោងដង្ហែពាក់កណ្តាលផ្លូវ ដោយផ្លាស់ប្តូរទៅជិះឧទ្ធម្ភាគចក្រជំនួសវិញដើម្បីបង្ហាញនិងចូលរួមអបអរជាមួយអ្នកគាំទ្រ។
 

បើតាមលោក Gabriela Cerruti អ្នកនាំពាក្យតំណាងប្រធានាធិបតីអាហ្សង់ទីនបានបង្ហោះនៅលើ Twitter ថាក្រុមជើងឯកពិភពលោកបានធ្វើដំណើរតាមរយៈឧទ្ធម្ភាគចក្រ ដោយសារតែមិនអាចបន្តដំណើរតាមរថយន្តក្រុងព្រោះតែ​អ្នកចូលរួមច្រើនខ្លាំងមិនធ្លាប់មាន។
 

«ក្រុមម្ចាស់ជើងឯកពិភពលោកកំពុងតែហោះហើរជុំវិញទីក្រុងនឹងតាមដងផ្លូវនានាដោយឧទ្ធម្ភាគចក្រ ព្រោះតែការអបអរមិនអាចធ្វើដំណើរបានតាមរយៈរថយន្តក្រុងទៅកាន់គោលដៅទីតាំងប្រវត្តិសាស្រ្ត។ សូមចូលរួមអបអរដោយសុវត្ថិភាពសន្តិភាព ហើយបង្ហាញពួកគេនូវក្តីស្រលាញ់ និងការកោតសរសើររបស់យើង»។ លោក Cerruti បានបង្ហោះបែបនេះ។
 

បើតាមប្រធានសហព័ន្ធបាល់ទាត់អាហ្សង់ទីនលោក Chiqui Tapia ដែលមានវត្តមាននៅលើរថយន្តក្រុងជាមួយក្រុមគ្រូបង្វឹកនិងកីឡាករក៏បានសរសេរបង្ហោះលើ Twitter ដោយបានបន្ទោសទៅកាន់ក្រុមមន្ត្រីប៉ូលិសថា៖«ពួកគេមិនឱ្យយើងធ្វើដំណើរដើម្បីអាចជួបមនុស្សទាំងអស់បានឡើយដែលពួកគេស្ថិតនៅត្រង់វិមានឯករាជ្យ«The Obelisco» ហើយក្រុមភ្នាក់ងារការពារសុវត្តិភាពបានស្នើនិងមិនអនុញ្ញាតឱ្យយើងធ្វើដំណើរទៅមុខបន្តដូចគ្នា។ យើងពិតជាសុំទោសទៅកាន់អ្នកគាំទ្រគ្រប់រូបពីសំណាក់ក្រុមកីឡាករជើងឯករបស់យើង ពិតជាសោកស្តាយណាស់។»។
 

ក្រោយតែពីលោក Cerruti ព្រមទាំងលោក Tapia បានបង្ហោះសារដូច្នេះនៅលើបណ្តាញសង្គម Twitter អ្នកគាំទ្រជាច្រើនដែលបានរង់ចាំដើម្បីអបអរជ័យជម្នះរបស់ក្រុមនៅត្រឹងចំណុចវិមានឯករាជ្យ The Obelisco បានបង្ហាញការខកចិត្តដែលពួកគេមិនអាចឃើញក្រុមកីឡាករព្រមទាំងបានរង្វាន់ World Cup ដោយផ្ទាល់ភ្នែក៕