នាយករដ្ឋមន្រ្តីអ៊ីស្រាអែលដែលកាន់តំណែងយូរបំផុត លោក Benjamin Netanyahu និងប្លុកស្តាំនិយមរបស់លោកឈ្នះការបោះឆ្នោតសភាកាលពីខែវិច្ឆិកា។ លោក Netanyahu ប្រកាសនៅថ្ងៃទី២៣ ខែធ្នូ ថាបានជោគជ័យបង្កើតរដ្ឋាភិបាលចម្រុះហើយ។ 

 

ពាក់ព័ន្ធរឿងនេះ សមាជិកគណៈកម្មាធិការប្រតិបត្តិអង្គការរំដោះប៉ាឡេស្ទីន លោក Ahmad Majdalani ព្រមាននៅថ្ងៃទី២៥ ខែធ្នូ ថា រដ្ឋាភិបាលថ្មីរបស់អ៊ីស្រាអែលនេះគឺជាផ្លាស់ប្តូរទាំងស្រុងនៃលក្ខណៈនយោបាយ និងអភិបាលកិច្ច។ លោកបន្ថែមថា ដំណើរការសន្តិភាព និងជម្រើសដំណោះស្រាយរដ្ឋពីរលែងមាននៅក្នុងរបៀបវារៈរដ្ឋាភិបាលថ្មីរបស់អ៊ីស្រាអែលទៀតហើយ។

 

«រដ្ឋាភិបាលស្តាំនិយមជ្រុលបានផ្លាស់ប្តូរដំណើរការសន្តិភាពនៅមជ្ឈិមបូព៌ា និងដំណោះស្រាយរដ្ឋពីរដើម្បីដោះស្រាយបញ្ហាអ៊ីស្រាអែល និងប៉ាឡេស្ទីន ជាមួយនឹងការលេបទឹកដី តាំងទីលំនៅ និងបោសសម្អាតជនជាតិភាគតិច»។ លោក Majdalani ប្រាប់វិទ្យុសំឡេងប៉ាឡេស្ទីនបែបនេះ។ 

 

មន្រ្តីប៉ាឡេស្ទីនជាន់ខ្ពស់រូបនេះបញ្ជាក់ថា ផែនការរបស់រដ្ឋាភិបាលថ្មីនេះនឹងបញ្ឆេះជម្លោះម្តងទៀត ហើយ​ប៉ាឡេស្ទីនក៏នឹងមិនមែនជាភាគីតែមួយដែលបេ្តជា្ញលើកិច្ចព្រមព្រៀងនោះទៀតដែរ។ 

 

ដំណោះស្រាយរដ្ឋពីរនេះសំដៅលើការៀបចំ និងបែកចែកទឹកដីជាពីររដ្ឋរវាងជនជាតិជី្វហ្វរបស់អ៊ីស្រាអែល និងជនជាតិប៉ាឡេស្ទីនឱ្យរួមរស់ជាមួយគ្នាក្នុងតំបន់តែមួយ ពោលគឺនៅលើទឹកដីរបស់ប៉ាឡេស្ទីនមុនអ៊ីស្រាអែលកាន់កាប់។ អ៊ីស្រាអែលគ្រប់គ្រងតំបន់ហ្ស៊េរុយសាឡិមខាងលិចតាំងពីឆ្នាំ១៩៤៨មកម្ល៉េះ ខណៈដណ្តើមបានតំបន់ហ្ស៊េរុយសាឡិមខាងកើតក្នុងឆ្នាំ១៩៦៧ ហើយក៏បានលេបទីក្រុងនេះពីប៉ាឡេស្ទីនទាំងស្រុងនៅឆ្នាំ១៩៨០។

 

ប៉ុន្តែដំណោះស្រាយរដ្ឋពីរនេះបានជាប់គាំង ដែលកិច្ចចរចាសន្តិភាពរវាងអ៊ីស្រាអែល និងប៉ាឡេស្ទីនចុងក្រោយបំផុតគឺនៅឆ្នាំ២០១៤។ ប៉ាឡេស្ទីនចង់បង្កើតរដ្ឋប៉ាឡេស្ទីននៅលើទឹកដីដែលអ៊ីស្រាអែលកាន់កាប់ក្នុងឆ្នាំ ១៩៦៧ រួមទាំងតំបន់ West Bank និង Gaza Strip ដោយមានហ្ស៊េរុយសាឡិមខាងកើតជារដ្ឋធានីរបស់ខ្លួន៕