ក្រុមកាំភ្លើងធំ Arsenal វិលត្រលប់មកកាន់ការប្រកួតក្របខណ្ឌ Premier League ដោយបន្តភាពខ្លាំងរបស់ខ្លួននៅដដែល ដោយបានបំបាក់ក្រុមភ្ញៀវ West Ham United ក្នុងទឹកដីកីឡដ្ឋាន Emirates ក្នុងលទ្ធផល ៣-១ ។ Arsenal បន្តនាំមុខកំពូលតារាង មានពិន្ទុដាច់ក្រុមលេខ២ ដល់ទៅ ៧ពិន្ទុដដែល។
ក្រុមកីឡាករវ័យក្មេងកំពុងមានទេព្យកោសល្យល្អៗ បានបង្ហាញការចាប់អារម្មណ៍ និងភាពទាក់ទាញខ្លាំងក្រោមការដឹកនាំរបស់លោក Mikel Arteta ជាអ្នកចាត់ការទូទៅ ខណៈកាន់លោក Arsene Wenger ក៏បានអង្គុយទស្សនាការប្រកួតនេះដែរ។ លោក Wenger បានវិលត្រលប់មកកាន់ទឹកដី Emirates លើកដំបូង ចាប់តាំងពីបានប្រកាសលាលែងពីតំណែងអ្នកចាត់ការក្រុមកាលពីឆ្នាំ ២០១៨ ក្រោយដឹកនាំបានរយៈពេល ២២ឆ្នាំ។
កីឡាករ Bukayo Saka, Gabriel Martinelli និង Eddie Nketiah របស់ Arsenal បាននាំជ័យជម្នះមកកាន់ក្រុម ក្រោយពេលកីឡាករ Said Benrahma ស៊ុតនាំមុខមុនឱ្យ West Ham។
ជ័យជម្នះបានជួយឱ្យ Arsenal រក្សាកំណត់ត្រាឈ្នះការប្រកួតលីគកំពូលអង់គ្លេសជាជំនួបក្នុងទឹកដីកីឡដ្ឋាន Emirates ឱ្យស្ថិតនៅ ១០០ភាគរយដដែល ដោយពួកគេមាន ៤០ពិន្ទុនាំមុខនៅកំពូលតារាង ពីការប្រកួតចំនួន ១៥លើក។ ចំណាត់ថ្នាក់បណ្ណោះអាសន្ន កាំភ្លើងធំនាំមុខក្រុមលេខ២ Newcastle United ដាច់ ៧ពិន្ទុ ដែលជាក្រុមលេងបានចំនួន ១៦ប្រកួត ខណៈក្រុម Manchester City ឈរលេខ៣ មាន៣២ពិន្ទុលេងបានត្រឹមសប្តាហ៍ទី១៤។
ចំណែក Newcastle United ឈានជើងឡើងមកកាន់ចំណាត់ថ្នាក់លេខ២ បណ្ណោះអាសន្នលើ Man City ក្រោយបំបាក់ក្រុមម្ចាស់ផ្ទះ Leicester City ដែលដឹកនាំដោយលោក Brendan Rodgers លទ្ធផល ៣-០។
ចាប់ផ្តើមការប្រកួតមិនដល់ ២នាទីផងនោះ Newcastle ទទួលបានបាល់ពិន័យ ១១ម៉ែត្រតែម្តងពីក្រុមម្ចាស់ផ្ទះ ដោយកីឡាករខ្សែការពារ Daniel Amartey បានបង្កកំហុសពីការបង្ហាញខ្លួនក្នុងការប្រកួតដ៏អាក្រក់របស់គេ។ កីឡាករ Chris Wood ស៊ុតបំប៉ោងសម្រេចសំណាញ់ទីនាទី៣ មុន Miguel Almiron បន្ថែមគ្រាប់ទី២ នាទី៧ យ៉ាងឆាប់រហ័ស និងគ្រាប់ទី៣ រកបានដោយ Joelinton នាទី៣២។ ការប្រកួតវគ្គទីពីរគ្មានលទ្ធផលប្រែប្រួលឡើយ។
ខាងក្រោមនេះជាលទ្ធផលការប្រកួតរបស់គូដទៃផ្សេងទៀត៖
Brentford ស្មើ ២-២ Tottenham Hotspur
Southampton ចាញ់ Brighton & Hove Albion ៣-១
Everton ចាញ់ Wolverhampton Wanderers ២-១
Crystal Palace ចាញ់ Fulham ៣-០
Liverpool ឈ្នះ Aston Villa ៣-១៕