ជម្រើសជាតិឡាវ ប្រឈមមុខក្នុងការធ្លាក់ចេញ ត្រឹមវគ្គចែកពូល ដោយចាញ់យ៉ាងធ្ងន់ធ្ងរនាពីរប្រកួតជាប់គ្នាមកនេះ។ ក្រុមឡាវ បានចាញ់ ជម្រើសជាតិម៉ាឡេស៊ី ក្នុងលទ្ធផល ៥-០ និងចាញ់ថៃ ក្នុងលទ្ធផល ៦-០។ ការបរាជ័យយ៉ាងដំណំនេះ ត្រូវបានលោក Michael Weiss គ្រូជម្រើសជាតិឡាវ រកឃើញថា កីឡាករ លេងមិនសូវយល់ចិត្តគ្នា អំឡុងពេលប្រកួត។ 
  

 

«ពីរ​ប្រកួត​ចុង​ក្រោយ​យើង​ចាញ់​ក្រុម​ដ៏​ស្វិតស្វាញ យើង​ឃើញ​មាន​កំហុស​ខ្លះ​ក្នុង​ការ​ប្រកួត​ទទួល។ យើង​កំពុង​ព្យាយាម​កែ​កំហុស​ដើម្បី​ឱ្យ​ក្រុម​អាច​ធ្វើ​បាន​ល្អ​ប្រសើរ​ក្នុង​ការ​ប្រកួត​ជាមួយ​នឹង​ក្រុម​ជម្រើស​ជាតិ​សិង្ហបុរី។ យើងស្ថិតនៅក្នុងពូលក្រុមខ្លាំង មិនថាវៀតណាម និងម៉ាឡេស៊ី ប៉ុន្តែវាមិនមែនមានន័យថាសិង្ហបុរី និងមីយ៉ាន់ម៉ាមិនខ្លាំងនោះទេ។ យើងនឹងធ្វើឱ្យល្អបំផុតនៃកាលបរិច្ឆេទដែលនៅសល់ពីរប្រកួតទៀត។»។ បើយោងតាមការផ្សាយរបស់សហព័ន្ធកីឡាបាល់ទាត់ឡាវ (Lao Football Federation) ដែលស្រង់សម្តីលោក Michael Weiss ។
 

ជាមួយគ្នានេះ លោក Takayuki Nishigaya គ្រូបង្វឹកក្រុមជម្រើសជាតិសង្ហបុរី បានផ្ដល់បទសម្ភាសថា ក្រុមរបស់ខ្លួន មិនដែលចាត់ទុកក្រុមណាមួយខ្សោយនោះទេ ប៉ុន្ដែដាក់គោលដៅដើម្បីឈ្នះ គឺជាស្មារតីប្រកួតដ៏សំខាន់សម្រាប់កីឡាករ។ គ្រូបង្វឹករូបនេះ និយាយថា៖«យើង ដាក់គោលដៅយកជ័យជម្នះទី២ ប៉ុន្ដែយើង មិនអាចវាយតម្លៃគូប្រកួតបានទេ។»។

ជម្រើសជាតិសិង្ហបុរី បានឈ្នះ លើក្រុមមីយ៉ាន់ម៉ា កាលពីថ្ងៃទី២៤ ខែធ្នូ ក្នុងលទ្ធផល ៣-២ នៃព្រឹត្តិការណ៍នេះ ។ រីឯ ឡាវ ចាញ់ពីប្រកួតផ្ទួន។ សិង្ហបុរី គឺជាក្រុមដែលឈ្នះ ជើងឯក៤សម័យកាល បន្ទាប់ពីជម្រើសជាតិថៃ ជើងឯក ៥សម័យកាល។ ដោយឡែក ជម្រើសជាតិឡាវ មិនធ្លាប់ឈ្នះជ័យលាភីអ្វីសោះក្នុងព្រឹត្តិការណ៍នេះ។ ក្រុមទាំងពីរ ធ្លាប់ជួបគ្នា ៦លើកក្នុងព្រឹត្តិការណ៍ AFF Championship។ ៦ប្រកួតនោះ ជម្រើសជាតិឡាវ មិនធ្លាប់ឈ្នះ សិង្ហបុរីទេ ។ ក្នុងនោះឆ្នាំ ២០០៧ ក្រុមសិង្ហបុរី បានលត់ ក្រុមឡាវ យ៉ាងដំណំ ក្នុងលទ្ធផល ១១-០។
 

ក្នុងថ្ងៃជាមួយគ្នានេះ វេលាម៉ោង ៧:៣០ យប់ វៀតណាម នឹងធ្វើជាម្ចាស់ផ្ទះស្វាគមន៍ ក្រុមជម្រើសជាតិម៉ាឡេស៊ី នៅកីឡដ្ឋាន My Dinh។ សន្នីសីទមុនពេលប្រកួត កាលពីថ្ងៃទី២៦ ខែធ្នូ គ្រូបង្វឹករបស់ក្រុមទាំងពីរ ដែលមានសញ្ជាតិកូរ៉េដូចគ្នា គឺលោក Park Hang-seo គ្រូជម្រើសជាតិវៀតណាម និងលោក Kim Pan-gon គ្រូជម្រើសជាតិម៉ាឡេស៊ី បានឈមមុខគ្នាតាមរយៈពាក្យសម្ដី ដោយបង្ហាញឆន្ទៈដាច់ខាតត្រូវតែយកជ័យជំម្នះ ក្នុងជំនួបនេះ។
 

លោក Park Hang Seo និយាយថា គ្រូបង្វឹករូបណាក៏ដោយ តែងតែចង់ឲ្យកីឡាកររបស់ពួកគេជោគជ័យ និងទទួលបានលទ្ធផលល្អ ក្នុងការប្រកួត ប៉ុន្ដែមិនមែនជារឿងងាយស្រួលទេ ព្រោះដៃគូប្រកួតក៏មានកម្រិតខ្លាំង។
  

គ្រូបង្វឹកវៀតណាមរូបនេះ បាននិយាយដូច្នេះ៖« លោកគ្រូ Kim Pan Gon (គ្រូបង្វឹកម៉ាឡេស៊ី) ថា​គាត់​ចង់​ឈ្នះ​វៀតណាម ខ្ញុំ​គិត​ថា​វា​មិនអាចទេ។ វាជាកាតព្វកិច្ច និងបំណងប្រាថ្នារបស់គ្រូបង្វឹកម្នាក់ៗ។ គ្រូ​បង្វឹក​គ្រប់​គ្នា​ចង់​ឈ្នះ ដូច្នេះ ​ខ្ញុំ​គិត​ថា​យើង​គួរ​តែ​ផ្តោត​លើ​ការ​ត្រៀម​ខ្លួន។ ក្រុមទាំងមូលត្រូវតែលេងបានល្អ។ ឥឡូវនេះយើងបានបញ្ចប់ការវិភាគលើក្រុមម៉ាឡេស៊ីហើយ។ ជាជម្រើសដ៏ល្អទៀតនោះ កីឡាករយើង នឹងស្គាល់ពីបច្ចេកទេសក្រុមផ្សេង ដើម្បីត្រៀមសម្រាប់ស៊ីហ្គេម ឲ្យបានល្អបំផុត។»។ 
 

គ្រូបង្វឹកវៀតណាម បានបកស្រាយដូច្នេះ បន្ទាប់ពី លោក Kim Pan Gon គ្រូបង្វឹកម៉ាឡេស៊ី បង្ហាញថាក្រុមខ្លួន នឹងយកឈ្នះលើវៀតណាម។
 

ម៉ាឡេស៊ី គឺជាក្រុមក្នុងពូល B ដែលមានជំនឿចិត្តច្រើនជាងគេ ព្រោះបានឈ្នះពីរប្រកួតផ្ទួនគ្នា ក្នុងជំនួបជាមួយមីយ៉ាន់ម៉ា និងជ័យជម្នះ លើក្រុមឡាវ។ វៀតណាម ធ្លាប់ឈ្នះជើងឯក ២សម័យ នៅឆ្នាំ២០០៨ និងឆ្នាំ២០១៨ ចំណែក ក្រុមម៉ាឡេស៊ី ឈ្នះជើងឯកនៅឆ្នាំ២០១០។ ក្រុមទាំងពីរនេះ ធ្លាប់ជួបគ្នាញឹកញាប់ រហូតដល់១៥លើក ទាំងក្នុងវគ្គពាក់កណ្ដាលផ្ដាច់ព្រ័ត្រ និងវគ្គផ្ដាច់ព្រ័ត្រ នៃព្រឹត្តិការណ៍ AFF នេះ។ កាលប្រកួតនៅក្នុងឆ្នាំ ២០១៨ ក្រុមទាំងពីរនេះ ជួបគ្នា ៣លើក គឺវគ្គក្នុងពូល វៀតណាម ឈ្នះ ម៉ាឡេស៊ី ២-០ ។ បន្ទាប់មកទៀត ឡើងទៅវគ្គផ្ដាច់ព្រ័ត្រ ក្រុមទាំងពីរ បានជួបគ្នាម្ដងទៀត ដោយជើងទី១ ស្មើគ្នា លទ្ធផល ២-២ និងជើងទី២ វៀតណាម ឈ្នះ ក្នុងលទ្ធផល ១-០៕

 

លោក Nishigaya គ្រូជម្រើសជាតិសិង្ហបុរី រូបពី Football Association of Singapore