បរាជ័យជំនួបទល់ Brentford ធ្វើឱ្យក្រុមហង្សក្រហមខកចិត្ត ដ្បិតខាតបង់ពិន្ទុ ធ្វើឱ្យមានគម្លាត់ខិតចេញពីតំបន់ Top 4  នៃក្របខណ្ឌ Premier League។ ៣គ្រាប់យកឈ្នះលើ Liverpool ស៊ុតបញ្ចូលទីដោយកីឡាករ Ibrahima Konate ខ្សែការពារ Liverpool ភ្លាត់ស្នៀតធ្វើឱ្យចូលទីខ្លួនឯងគ្រាប់ទីមួយ ចំណែកគ្រាប់ទី២ ដោយ Yoane Wissa នាទី៤២ និង Bryan Mbeurno នាទី៨៤។ រីឯ ១គ្រាប់របស់ Liverpool ស៊ុតដោយ Alex Oxlade-Chamberlain នាទី៥០។ បរាជ័យដ៏អាម៉ាស់របស់ Liverpool ដោយសារតែពួកគេមិនអាចរារាំងការបង្កព្យុះភ្លៀងនៃការបញ្ជូនបាល់ Free Kick របស់ក្រុម Brentford ដែលកើតចេញពីការលេងបាល់ជ្រុង។
 

ជាក់ស្តែងនៅត្រឹមដើមវគ្គទីពីរ ហង្សក្រហមបានផ្លាស់ប្តូរកីឡាករសំខាន់ៗចំនួន ៣រូប ក្នុងនោះក៏រួមមានខ្សែការពាររឹងមាំ Virgil van Dijk  ប៉ុន្តែមិនអាចកែប្រែស្ថានកាលអ្វីបានឡើយគឺត្រឹមទទួលបរាជ័យក្រោមថ្វីជើងម្ចាស់ផ្ទះតែប៉ុណ្ណោះ។ ឈ្នះ ៣-១ ក្នុងទឹកដីបានជួយឱ្យ ​Brentford បំបែកកំណត់ត្រាខ្លួនរកបានជ័យជម្នះលើ Liverpool លើកដំបូងចាប់តាំងពីឆ្នាំ ១៩៣៨ មក។
 

លោក Klopp វិញបានបង្ហាញអារម្មណ៍ខកចិត្តក្នុងសន្និសីទកាសែត ដោយលោកបានចោទប្រកាន់ក្រុម Brentford ថាបានបំពានច្បាប់។ អ្នកចាក់ការ​ Liverpool ក៏បានចោទប្រកាន់ទៅកាន់លោក Stuart Attwell អាជ្ញាកណ្តាលកាត់សេចក្តីការប្រកួតថាមិនព្រមមានវិធានការលើអាកប្បកិរិយារបស់កីឡាករ Brentford អំឡុងបាល់ជ្រុង។
 

«ខ្ញុំមិនប្រាកដទេថា អ្នកនឹងអាចគ្រប់គ្រងពេលវេលាបានគ្រប់ពេលនោះ ពិព្រោះតែការទាត់បាល់ជ្រុងម្តងៗគឺជារឿងដ៏គួរឱ្យគ្រោះថ្នាក់ ហើយពួកគេបានបំពានច្បាប់ដោយភាសាកាយវិការរបស់ពួកគេនៅលើទីលាន។ […] គ្រាប់បាល់២គ្រាប់ដែលពួកគេរកបានពីការលើកបាល់ជ្រុងគឺជាបាល់ Off-side ទាំងពីរ ហើយអាកប្បកិរិយារបស់ពួកគេពិតជាធ្វើបានល្អដែលពួកគេក្លែងបន្លំនិងបំពានច្បាប់។ គ្រាប់បាល់ទី៣ ខ្ញុំរិតតែមិនអាចទទួលយកបាន ព្រោះថាជាការបង្កកំហុស ប៉ុន្តែ VAR មិនព្រមបញ្ជាក់ ហើយអាជ្ញាកណ្តាលគួរតែពន្យល់ពីរឿងទាំងនេះ។»។ លោក Klopp បង្ហាញអារម្មណ៍មិនសប្បាយចិត្ត ក្រោយចប់ការប្រកួត។
 

បច្ចុប្បន្ន Liverpool កំពុងស្ថិតនៅចំណាត់ថ្នាក់លេខ៦ ក្នុងតារាងពិន្ទុក្របខណ្ឌលីគកំពូលអង់គ្លេស ដោយមាន ២៨ពិន្ទុ ឈរពីក្រោមក្រុម Tottenham Hotspur ដែលនៅលេខ ៥មាន ៣០ពិន្ទុ និងមានគម្លាតពិន្ទុពីតំបន់កំពូលទាំង៤ ចំនួន ៤ពិន្ទុ។ ការប្រកួតបន្ទាប់របស់ ​Liverpool ក្នុងក្របខណ្ឌ Premier League នឹងត្រូវធ្វើដំណើរទៅជួប Brighton & hove Albion ថ្ងៃទី១៤ ខែមករា៕