សង្រ្គាមនៅអ៊ុយក្រែន ហាក់គ្មានច្រកចេញនៅឡើយមកទល់ពេលនេះ ខណៈសង្រ្គាមបានអូសបន្លាយជាង ១០ខែហើយ។ ក្រសួងការពារជាតិរុស្ស៊ី បានអះអាងថា កងកម្លាំងខ្លួន បានបាត់បង់ជីវិត ៦៣នាក់ នៅថ្ងៃចូលឆ្នាំថ្មី ក្នុងតំបន់ដូណេត្ស ដោយសារការបាញ់ប្រហារពីប្រព័ន្ធបាញ់គ្រាប់រ៉ុក្កែត  HIMARS ពីសំណាក់អ៊ុយក្រែន។ ប្រព័ន្ធបាញ់គ្រាប់រ៉ុក្កែត  HIMARS ផលិតដោយអាម៉េរិក។ 

 

ស្របពេលសង្រ្គាមនៅតែបន្តបែបនេះ និងបង្កឱ្យមានវិបត្តិជាច្រើន លោក S Jaishankar រដ្ឋមន្រ្តីការបរទេសឥណ្ឌា ដែលបានបំពេញទស្សនកិច្ចនៅអូទ្រីស បានទទូចឱ្យសង្រ្គាមបញ្ចប់ តាមរយៈកិច្ចចរចា។​

 

«យើងជឿថា ពេលនេះមិនមានជាសម័យសង្រ្គាមទេ។ ការខ្វែងគំនិតគ្នា ត្រូវតែដោះស្រាយលើតុចរចា»។ ប្រមុខការទូតឥណ្ឌា បានសង្កត់ធ្ងន់បែបនេះ នៅក្នុងសន្និសីទរួមគ្នាជាមួយសមភាគីអូទ្រីសក្នុងថ្ងៃទី២ ខែធ្នូ ដោយបន្តថា វាពិតជាសំខាន់ណាស់ ដែលភាគីជម្លោះត្រូវត្រលប់ទៅរកកិច្ចចរចា និងការទូត។ ត្រង់ចំណុចនេះ លោក Jaishankar យល់ថា ការអូសបន្លាយនៃសង្រ្គាម មិនបានបម្រើផលប្រយោជន៍ប្រទេសណាមួយឡើយ។ 

 

ក្នុងសន្និសីទដដែល រដ្ឋមន្រ្តីការបរទេសរូបនោះ បានលើកឡើងពីការចូលរួមរបស់លោកនាយករដ្ឋមន្រ្តីឥណ្ឌា នារិន្ទ្រា ម៉ូឌី ក្នុងការស្វែងរកសន្តិភាពនៅអ៊ុយក្រែនផង។ បើតាមលោក Jaishankar នាពេលកន្លងមក លោកម៉ូឌី បានជជែកជាមួយមេដឹកនាំអ៊ុយក្រែន និងរុស្ស៊ី ដើម្បីជំរុញឱ្យមានបទឈប់បាញ់ និងកិច្ចចរចា។ នេះបើតាមការចុះផ្សាយរបស់សារព័ត៌មាន India Express។​

 

ទន្ទឹមនេះ ប្រមុខការទូតឥណ្ឌា ក៏បានបង្ហាញពីក្តីបារម្ភជុំវិញការជះឥទ្ធិពលអាក្រក់ពីសង្រ្គាមនៅអ៊ុយក្រែន មកលើពិភពលោកផង ដោយវាបានធ្វើឱ្យកើនឡើងដល់តម្លៃប្រេង អាហារ និងជីជាដើម។ 

 

សូមបញ្ជាក់ថា មកទល់ពេលនេះ ឥណ្ឌា ជាប្រទេសមួយក្នុងចំណោមប្រទេសតិចតួចផ្សេងទៀត ដែលមិនទាន់បានរិះគន់រុស្ស៊ីខ្លាំងៗ និងដាក់ទណ្ឌកម្មលើរុស្ស៊ីឡើយ ទាក់ទិននឹងសង្រ្គាមនៅអ៊ុយក្រែន។ ប្រទេសអាស៊ីខាងត្បូងមួយនេះ បានត្រឹមតែទទូចឱ្យភាគីជម្លោះចូលតុចរចា និងដោះស្រាយដោយសន្តិវិធីប៉ុណ្ណោះ៕