មួយរយៈចុងក្រោយ ចិន មានករណីផ្ទុះជំងឺឆ្លងកូវីដ-១៩ យ៉ាងខ្លាំង ក្រោយលុបចោលគោលការណ៍គ្មានជំងឺកូវីដ-១៩។ ក្រោមហេតុផលនេះ ប្រទេសមួយចំនួនដូចជា អាម៉េរិក កាណាដា បារាំង និងជប៉ុន បានតម្រូវឱ្យអ្នកដំណើរមកពីចិនត្រូវមានលទ្ធផលអវិជ្ជមានជាមុនសិន មុននឹងមកដល់ប្រទេសខ្លួន។ យ៉ាងណាមិញ ចំណាត់ការបែបនេះ ត្រូវបានក្រសួងការបរទេសចិនប្រតិកម្ម និងព្រមានចាត់វិធានការតប។ 

 

«ប្រទេសខ្លះ បានដាក់វិធានការរឹតត្បិតលើអ្នកដំណើរចិនប៉ុណ្ណោះ»។ អ្នកនាំពាក្យក្រសួងការបរទេសចិន លោកស្រី​ Mao Ning បានបញ្ជាក់បែបនេះនៅក្នុងសន្និសីទសារព័ត៌មានប្រចាំថ្ងៃ ដោយបន្តថា ចំណាត់ការដែលខ្វះមូលដ្ឋានលើវិទ្យាសាស្រ្ត និងការអនុវត្ត គឺមិនអាចទទួលយកបានឡើយ។​

 

ត្រង់ចំណុចនេះ អ្នកនាំពាក្យក្រសួងការបរទេសចិន បានព្រមានថា ចិនអាចនឹងចាត់វិធានការឆ្លើយតប ដោយផ្នែកលើគោលការណ៍ទៅវិញទៅមក។ 

 

សូមបញ្ជាក់ថា គណៈកម្មការសុខាភិបាលជាតិចិន បានឈប់ចេញរបាយការណ៍អ្នកឆ្លង និងស្លាប់ដោយជំងឺកូវីដ-១៩ ពីថ្ងៃទី២៥ ខែធ្នូមក។ បញ្ហានេះ បានធ្វើឱ្យអង្គការសុខភាពពិភពលោកជំរុញឱ្យចិនផ្សព្វផ្សាយព័ត៌មានជាក់លាក់អំពីស្ថានភាពជំងឺកូវីដ-១៩ និងរាយការណ៍អត្រាអ្នកឆ្លង រួមទាំងអ្នកស្លាប់ដោយសារជំងឺកូវីដ-១៩ ឱ្យបានទៀងទាត់៕