ស្របពេលចិនបើកប្រទេសទទួលអ្នកដំណើរបរទេសដោយមិនមានការរឹតត្បិត ហើយអនុញ្ញាតឱ្យ​ពលរដ្ឋ​ទៅក្រៅប្រទេសដោយស្រួលវិញនោះ ការិយាល័យកិច្ចការហុងកុង និងម៉ាកាវរបស់​ក្រុង​ប៉េកាំងលើកឡើងក្នុងសេចក្ដីជូនដំណឹងមួយនៅថ្ងៃទី៥ ខែមករាថា ការបើក​ព្រំដែនឡើងវិញនៅថ្ងៃទី៨ ខែមករា នឹងពាំនាំ​ការ​បន្តការធ្វើដំណើរដោយគ្មានចត្តាឡីស័ករវាងទីក្រុងហិរញ្ញវត្ថុហុងកុង និងចិនដី​គោក ទោះបីជា​មាន​នីតិវិធី​មួយចំនួនក្ដី។ 

 

មិនខុសពីចិនឡើយ ទីក្រុងហុងកុងបានអនុវត្តតាមគោលនយោបាយទប់ស្កាត់ជំងឺកូវីដ -១៩ដ៏តឹងរ៉ឹងមុនបន្ធូរបន្ថយវិញដល់ពាក់កណ្តាលឆ្នាំ២០២២។ 

 

ជុំវិញរឿងនេះ មេដឹកនាំទីក្រុងហុងកុងលោក John Lee ប្រាប់អ្នកសារព័ត៌មានថា មនុស្ស​អតិបរមា​ចំនួន៦ម៉ឺននាក់ក្នុងមួយថ្ងៃពីហុងកុង ឬចិនអាចនឹងឆ្លងកាត់ព្រំដែនចាប់ពីថ្ងៃទី៨ ខែមករា។ អ្នកដំណើរ​តម្រូវឱ្យកក់សំបុត្រចេញចូលតាមរយៈអ៊ីធឺណិតដើម្បីឆ្លងកាត់ព្រំដែន ខណៈសាឡាង និងជើងហោះ​ហើរ អាស្រ័យលើសំបុត្រដែលមាន។

 

«ការចូល (ចិន) ដីគោកតាមរយៈហុងកុងក្លាយជាជម្រើសដ៏ស្រួល»។ លោក Lee លើកឡើង​បែប​នេះ​រួចបន្ថែមថា ការលុបចេញការបិទព្រំដែននេះនឹងទាក់ទាញការវិនិយោគបរទេសផងដែរ​។

 

ស្របពេលជាមួយគ្នានេះ ពលរដ្ឋហុងកុងបានសម្រុកទៅគ្លីនីកដើម្បីចាក់វ៉ាក់សាំងបង្ការជំងឺកូវីដ-១៩​មុនព្រំដែនបើកឡើងវិញដែរ។ រដ្ឋាភិបាលហុងកុងនឹងប្រកាសពីការរៀបចំឆ្លងកាត់ព្រំដែនជាមួយទីក្រុង​ម៉ាកាវនៅពេលក្រោយ។ 

 

គួរបញ្ជាក់ថា មុនការផ្ទុះឡើងនៃជំងឺកូវីដ-១៩នៅចិនក្នុងចុងឆ្នាំ២០១៩ អ្នកដំណើរចំនួន២៣៦លាន​នាក់បានធ្វើដំណើរឆ្លងកាត់ព្រំដែនចិនដីគោក និងហុងកុង។ នេះបើតាមទិន្នន័យរដ្ឋាភិបាលហុងកុង៕