ការប្រកួតកីឡាម៉ូតូភ្នំ ជ្រើសរើសជើងឯកឆ្នាំ២០២៣ (12 Motor Park Enduro Cross Challenge2023) នឹងចាប់ផ្តើមនៅថ្ងៃទី១៣-១៥ ខែមករា នៅខេត្តមណ្ឌលគីរី ដោយមានកីឡាករចូលរួមប្រកួតចំនួន៨០នាក់ មកពីបណ្តាប្រទេសមួយចំនួនដូចជាម្ចាស់ផ្ទះកម្ពុជា កូរ៉េខាងត្បូង វៀតណាម និងថៃ​ជាដើម។

 

ក្នុងនោះដែរកីឡាករជម្រើសជាតិកម្ពុជា ជា លីឃៀង ក៏ជាអត្តពលិកមួយរូបដែលនឹងត្រូវចូលរួមប្រកួតផងដែរ។ សម្រាប់ការបង្កើតឱ្យមានកម្មវិធីប្រកួតកីឡាម៉ូតូភ្នំ នេះដែរ លោក ជា លីឃៀង ពិតជាសប្បាយចិត្តដែលនៅកម្ពុជាមានវិញ្ញាសាប្រណាំងម៉ូតូប្រភេទ Cross នេះឡើង ដើម្បីជាការដកស្រង់បទពិសោធថ្មីមួយសម្រាប់កីឡាករកម្ពុជា។
  

 កីឡាករជម្រើសជាតិកម្ពុជា ជា លីឃៀង ហ្វឹកហាត់នៅខេត្តមណ្ឌលគីរីនាពេលកន្លងមក។ រូបពី ជា លីឃៀង
 

កីឡាករ ជា លី ឃៀង និយាយថា៖«សម្រាប់ខ្ញុំពិតជាសប្បាយចិត្តដែលមានវិញ្ញាសាម៉ូតូ Cross នេះនៅកម្ពុជា។ បើនិយាយទៅនៅប្រទេសដទៃគេមានយូរហើយ ដោយឡែកប្រទេសយើងទើបតែមាន អ៊ីចឹង!គឺថ្មីសម្រាប់យើង ហើយក៏ល្អសម្រាប់កីឡាករជាតិយើងដែលបានព្យាយាមទាំងអស់គ្នា មានក្រុមហ្វឹកហាត់ ដើម្បីពង្រឹងសមត្ថភាព»។

 

គួររំឮកផងដែរថា កីឡាករ ជា លីឃៀង ជាកីឡាករជម្រើសជាតិកម្ពុជា ដែលបានទៅចូលរួមប្រកួតកម្មវិធីប្រណាំងម៉ូតូ Extreme Enduro SANLIM Husqvarna Championship 2022 នៅប្រទេសកូរ៉េខាងត្បូង ដោយទទួលបានចំណាត់ថ្នាក់លេខ១៦ ក្នុចំណោមកីឡាករចូលរួមប្រកួត១០០នាក់៕