​អ្នកស្រី ឡុង​ សនិកា ប្រធានមណ្ឌលសុខភាពស្រយ៉ូវ បានឱ្យដឹងថា ក្នុងមួយ​ខែ មានពលរដ្ឋដែលមានពិការភាពមកទទួលសេវា តែ២ ឬ៣នាក់ប៉ុណ្ណោះ ហើយគ្រូពេទ្យតែងតែស្វាគមន៍ និងផ្ដល់អាទិភាពដល់ពួកគាត់មុនគេ។ ទន្ទឹមនឹងនេះ ជនមានពិការភាពក៏មិនតម្រូវឱ្យបង់ថ្លៃសេវាពិនិត្យ និងព្យាបាលជំងឺនៅមណ្ឌលសុខភាពដែរ។
«ពេលអ្នកពិការទៅទទួលសេវានៅមណ្ឌលសុខភាពក្រុមគ្រូពេទ្យឱ្យអាទិភាពគាត់មុន ហើយមិនតម្រូវឱ្យពួកគាត់បង់ថ្លៃសេវានោះទេ»។ អ្នកស្រី ឡុង​ សនិកា បន្ថែមដូច្នេះ។

ក្រៅពីយកចិត្តទុកដាក់ លើការផ្តល់សេវាសុខភាពនៅមណ្ឌលសុខភាពស្រយ៉ូវ ក៏មានជម្រាលសម្រាប់ជនមានពិការភាពចំនួន១ផងដែរ ដើម្បីសម្រួលការមកការមកទទួលសេវាសុខភាសម្រាប់ប្រធានមណ្ឌលសុខភាពរូបនេះ ជម្រាលជនពិការមានអត្ថប្រ​យោ​ជ​ន៍​ ច្រើន ដល់អ្នកមានពិការភាព ជាពិសេសអ្នកដែលពិការជើង ​ងាយស្រួលជិះរទេះរុញឡើងចុះ ពេលទៅទទួលសេវា និងប្រើប្រាស់បន្ទប់ទឹកជាដើម។ ​​

 

យ៉ាងណាក៏ដោយ ប្រធានមណ្ឌលសុខភាពរូបនេះ ចង់បានជម្រាលបន្ថែមទៀត នៅបន្ទប់ទឹក ដើម្បីសម្រួលដល់ការធ្វើដំណើររបស់អ្នកមានពិការភាព និងអ្នកមានផ្ទៃពោះ និងចាស់ជរាផងដែរ។ «​ជម្រាលនេះ មិនគ្រប់គាន់សម្រាប់ការប្រើប្រាស់របស់អ្នកពិការនោះទេ​។ ជម្រាលមាននៅខាងមុខមណ្ឌលចំនួនមួយ តែនៅបន្ទប់គ្មានជម្រាលជនពិការ ដូច្នេះ ធ្វើឱ្យអ្នកពិការពិបាកឡើងចុះ ពេលទៅបន្ទប់ទឹក»។ អ្នកគ្រូពេទ្យ ឡុង សនិកា បន្ថែមដូច្នេះ ដោយបានបញ្ជាក់ពីការតាំងចិត្តរបស់ខ្លួន ​ក្នុងការផ្ដល់សេវាឱ្យពលរដ្ឋដែលមានពិការភាព ដែលទៅទទួលនៅក្នុងមណ្ឌលសុខភាពស្រយ៉ូវ និងយកចិត្តទុកដាក់ទៅលើពួកគេ ដូចជាប្រជាពលរដ្ឋទូទៅ ព្រមទាំងគ្មានការរើសអើងនោះទេ៕

​

អានអត្ថបទពាក់ព័ន្ធផ្សេងទៀត៖ យុវជនសកម្ម សេវាល្អ