កាលពីថ្ងៃទី៩ ខែមករា Bale វ័យ​ ៣៣ឆ្នាំ បានសម្រេចចិត្តប្រកាសចូលនិវត្តន៍ពីវិស័យបាល់ទាត់ ដោយបានបង្ហោះសារលើបណ្តាញសង្គម Twitter និង Facebook។ អតីតកីឡាករ Real Madrid និង Tottenham Hostpurs ឈ្នះពានរង្វាន់ Champions League ៥សម័យ និងជាកីឡាករតែម្នាក់ ដែលបានបង្ហាញខ្លួនច្រើនជាងគេបង្អស់សម្រាប់ក្រុមជម្រើសជាតិវែលស៍ និងស៊ុតបញ្ចូលទីច្រើនជាងគេផង។
 

Bale បានសម្រេចចាកចេញពីវិស័យបាល់ទាត់ក្នុងនាមជាកីឡាករដ៏អស្ចារ្យមួយរូបប្រចាំនៅចក្រភពអង់គ្លេស ដោយរូបគេរកបានពានរង្វាន់ជាច្រើនជាមួយក្រុមយក្សអេស្ប៉ាញ Real Madrid បន្ទាប់ពីរួមរស់ ៦រដូវកាលជាមួយក្រុម Tottenham Hotspur។ 
 

ជាក់ស្តែងក្រោយពេលដែល ​Bale បានប្រកាសចូលនិវត្តន៍ពីក្លិប និងក្រុមជម្រើសជាតិបានមួយថ្ងៃ ក្រុមជម្រើសជាតិវែលស៍ក៏បានបង្ហោះសារអរគុណទៅកាន់ខ្សែប្រយុទ្ធវ័យ ៣៣ឆ្នាំ ហើយលោក Page ក៏បាននិយាយប្រាប់អ្នកកាសែតថា ទោះ ​Bale ចូលនិវត្តន៍តែប្រធានក្រុមវែលស៍នៅមានសមត្ថភាព ដែលកីឡាករអាជីពមួយចំនួនដែលប្រកបនៅលីគកំពូលអឺរ៉ុបមិនមាន។
 

«នៅពេលដែលអ្នកទទួលបាននរណាម្នាក់ដូចជា Gareth Bale ដែលគាត់បានធ្វើគ្រប់យ៉ាងរួចរាល់អស់ហើយសម្រាប់វែលស៍… គាត់នៅមានសមត្ថភាពសម្រាប់វែលស៍។ លោក ​Page ប្រាប់ទៅអ្នកកាសែតតាមប្រព័ន្ធវីដេអូ Zoom នៅថ្ងៃទី១០ ខែមករា ដោយបង្ហាញអារម្មណ៍សោកស្តាយចំពោះការចូលនិវត្តន៍របស់ Bale ទាំងវ័យក្មេង និងពេញដោយសមត្ថភាព។
 

ជាមួយក្រុមជម្រើសជាតិវែលស៍ Bale បានជួយដល់ក្រុមប្រកួតជម្រុះរហូតឡើងទៅកាន់ព្រឹត្តិការណ៍ World Cup 2022 បញ្ចប់ការរង់ចាំរយៈពេល ៦៤ឆ្នាំ ដើម្បីអាចឡើងទៅការប្រកួតម្តងទៀត។ ​Bale ដើរតួរយ៉ាងសំខាន់ក្នុងក្រុមជម្រើសជាតិវែលស៍ដោយបានជួយក្រុមលេងក្នុងពានរង្វាន់ព្រឹត្តិការណ៍ UEFA UERO ឆ្នាំ ២០១៦ និង ២០២០។
 

គួររំលឹកដែរថាមូលហេតុចម្បងដែល ​Bale បានសម្រេចចិត្តចូលនិវត្តន៍ អាចជារឿងមួយដ៏គួរឱ្យសោកស្តាយ ខណៈរូបគេមានវ័យត្រឹម ៣៣ឆ្នាំ ហើយនៅមានសមត្ថភាពអាចបន្តការប្រកួតបន្ថែមទៀត ប៉ុន្តែ Bale ហាក់មិនសូវទទួលបានការចាប់អារម្មណ៍ពីក្លិបធំៗនៅតំបន់អឺរ៉ុបម្តងទៀតឡើយ៕