បើតាមមជ្ឈមណ្ឌលសកម្មភាពកម្ចាត់មីនកម្ពុជា (CMAC) ការហ្វឹកហ្វឺនដល់មន្ត្រីជំនាញអ៊ុយក្រែន ត្រូវចាប់ផ្ដើមនៅក្នុងខែមករានេះ លើការប្រើប្រាស់សម្ភារ បច្ចេកទេសបោសសម្អាតមីន ជាពិសេសឧបករណ៍រាវមីនប្រភេទ ALIS ផលិតនៅប្រទេសជប៉ុន។
 

ចំពោះការហ្វឹកហ្វឹនដល់មន្ត្រីជំនាញអ៊ុយក្រែន ក្នុងការបោសសម្អាតមីននេះ ក្រោមកិច្ចសហការរវាងរដ្ឋាភិបាលកម្ពុជា និងរដ្ឋាភិបាលជប៉ុន។ កិច្ចសហការជួយផ្ដល់ជំនាញកម្ចាត់មីន ក្នុងប្រទេសអ៊ុយក្រែននេះ កើតចេញពីកិច្ចពិភាក្សាគ្នារវាងសម្ដេចនាយករដ្ឋមន្រ្តី ហ៊ុន សែន និងលោក Kishida Fumio នាយករដ្ឋមន្ត្រីជប៉ុន ក្នុងកិច្ចប្រជុំអាស៊ាន និងប្រជុំពាក់ព័ន្ធ លើកទី៤០-៤១ នៅរាជធានីភ្នំពេញ កាលពីខែវិច្ឆិកា ឆ្នាំ២០២២។
 

«ផ្អែកលើបទពិសោធន៍ដែលកម្ពុជាឆ្លងកាត់សង្គ្រាមដ៏រ៉ាំរ៉ៃជាច្រើនទសវត្ស និងដោះស្រាយបញ្ហាគ្រាប់មីន និងសំណល់យុទ្ធភណ្ឌសង្គ្រាមប្រកបដោយជោគជ័យ តាមរយៈការអនុវត្តសកម្មភាពកម្ចាត់មីនមនុស្សធម៌ តាំងពីឆ្នាំ១៩៩២មក រាជរដ្ឋាភិបាលកម្ពុជា មានឆន្ទៈក្នុងការជួយគាំទ្រ និងផ្ដល់កិច្ចសហប្រតិបត្តិការក្នុងវិស័យសកម្មភាពមីនមនុស្សធម៌ ជូនប្រជាជនអ៊ុយក្រែន»។ នេះបើតាមមជ្ឈមណ្ឌលសកម្មភាពកម្ចាត់មីនកម្ពុជា នៅថ្ងៃទី១៣ មករា។ 
 

បញ្ហាគ្រាប់មីន និងគ្រាប់មិនទាន់ផ្ទុះ នៅក្នុងប្រទេសអ៊ុយក្រែន កំពុងបង្កការគំរាមកំហែង និងគ្រោះថ្នាក់យ៉ាងធ្ងន់ធ្ងរ ដល់ប្រជាជនស៊ីវិល ក្នុងការវិលត្រឡប់ទៅកាន់លំនៅដ្ឋានរបស់ពួកគេវិញ។
 

ត្រង់ចំណុចនេះ មជ្ឈមណ្ឌលសកម្មភាពកម្ចាត់មីនកម្ពុជា យល់ឃើញថា កិច្ចការបោសសម្អាតមីន និងយុទ្ធភណ្ឌសង្គ្រាមនេះ ជាកិច្ចការចាំបាច់ ដើម្បីធានាសុខសុវត្ថិភាពប្រជាពលរដ្ឋ និងគាំទ្រដល់ដំណើការស្ដារឡើងវិញ នូវហេដ្ឋារចនាសម្ព័ន្ធ និងដីសម្រាប់ធ្វើកសិកម្ម ។ ជាពិសេសកសាងទំនុកចិត្តដល់ប្រជាពលរដ្ឋអ៊ុយក្រែន លើសុខសុវត្ថិភាព និងស្ដារជីវភាពរស់នៅឡើងវិញ ប៉ុន្តែត្រូវការពេលវេលា និងភាពអត់ធ្មត់។ 
 

កាលពីពេលថ្មីៗនេះ មជ្ឈមណ្ឌលសកម្មភាពកម្ចាត់មីនកម្ពុជា បានប្រកាសពីភាពជោគជ័យមួយដំណាក់កាល ក្នុងការរំដោះខេត្តចំនួន៩ ឱ្យអស់គ្រាប់មីនហើយ ដោយបានកម្ទេចចោលគ្រាប់មីន និងគ្រាប់មីនមិនទាន់ផ្ទុះគ្រប់ប្រភេទចំនួន ៦១ ៤៧៧គ្រាប់។ ខេត្តកែប កំពត តាកែវ កំពង់ឆ្នាំង កំពង់ចាម ភ្នំពេញ ព្រះសីហនុ ស្វាយរៀង និងព្រៃវែង។

កន្លងមករដ្ឋាភិបាល បានដាក់ផែនការយុទ្ធសាស្រ្ត បោសសម្អាតមីននៅកម្ពុជា ឱ្យអស់នៅត្រឹមឆ្នាំ២០២៥៕