លោក វ៉ាត់ ចំរើន អគ្គលេខាធិការគណៈកម្មកាធិការជាតិ CAMSOC មើលឃើញថាសហព័ន្ធកីឡាអុកចត្រង្គកម្ពុជា បានរៀបចំការប្រកួតកីឡាអុកចត្រង្គជើងឯកអាស៊ាន ឆ្នាំ២០២៣ ដែលមានលក្ខណៈស្តង់ដារអន្តរជាតិលើកដំបូងនៅកម្ពុជា។ កីឡាអុកចត្រង្គជើងឯកអាស៊ានដែលកម្ពុជាធ្វើម្ចាស់ផ្ទះ មាន ៥ប្រទេសចូលរួម បានបញ្ចប់នៅថ្ងៃទី១២ ខែមករា។

 

ទាំង៥ប្រទេសរួមមានម្ចាស់ផ្ទះកម្ពុជា វៀតណាម ថៃ មីយ៉ាន់ម៉ា និងឡាវ ។ ប្រកួតនេះស្របតាមគោលការណ៍របស់គណៈកម្មាធិការជាតិ CAMSOC ដែលបានដាក់ចេញនូវផែនការយុទ្ធសាស្ដ្រ ក្នុងការឱ្យប្រភេទកីឡាទាំងអស់ មានការប្រកួតលក្ខណៈអន្ដរជាតិឱ្យបានច្រើន ពិសេសប្រភេទកីឡាប្រពៃណី ដើម្បីដកស្រង់បទពិសោធន៍ និងត្រៀមលក្ខណៈឱ្យបានគ្រប់ជ្រុងជ្រោយ មុនការប្រកួតស៊ីហ្គេម។

លោក វ៉ាត់ ចំរើន និយាយថា៖«យើងសង្ឃឹមថា ការធ្វើតេស្តការប្រកួតនៅក្នុងព្រឹត្តិការណ៍នេះគឺជាសញ្ញាណល្អមួយសម្រាប់យើង រៀបចំការប្រកួតកីឡាស៊ីហ្គេម កីឡាអុកចក្រត្រង្គរបស់យើងដែលដាក់ចូលក្នុងពិធីផ្លូវការ នឹងអាចរៀបបានដោយទទួលជោគជ័យនៅក្នុងការប្រកួតកីឡាស៊ីហ្គេម២០២៣»។

 

ទោះបីជាយ៉ាងណាក៏ដោយ លោក វ៉ាត់ ចំរើន នៅមានការព្រួយបារម្ភចំពោះការមកដល់ក្នុងការប្រកួតកីឡាស៊ីហ្គេមលើកទី៣២ នៅកម្ពុជា ផងដែរដោយតាមការសង្កេតមើលឃើញថា ប្រទេសថៃ មិនទាន់បញ្ជូនកីឡាករមានសក្តានុពលរបស់គេមកចូលរួមប្រកួតឡើយ ដោយលោក សំណូមពរឱ្យសហព័ន្ធកីឡាអុកចក្រត្រង្គកម្ពុជា​ ពង្រឹងសមត្ថភាពកីឡាករ-កីឡាការិនីជម្រើសជាតិកម្ពុជាបន្ថែមទៀត។
 

អគ្គលេខាធិការ CAMSOC បន្តថា៖«យើងបានត្រួតពិនិត្យចំនុចយុទ្ធសាស្រ្តមួយចំនួន។ កីឡាករថៃ បញ្ជូនមកនេះ មិនទាន់បញ្ជូនជើងខ្លាំងមកទេ យើងឃើញថាពួកគេបញ្ជូនត្រឹមកម្រិតណាមួយ ដែលមិនមែនជាជើងខ្លាំងជាងគេនៅថៃ។ ចំណែកវៀតណាម ឃើញថាល្អច្រើន តាមយុទ្ធសាស្រ្ត CAMSOC គឺសុំឱ្យសហព័ន្ធទៅបណ្តុះបណ្តាលសមត្ថភាពនៅក្រៅប្រទេសបន្ថែមទៀត»៕