ក្នុងដំណើរឆ្ពោះទៅកាន់ព្រឹត្តិការណ៍កីឡាអាស៊ីអាគ្នេយ៍លើកទី៣២ ឆ្នាំ២០២៣ ដែលកម្ពុជាធ្វើជាម្ចាស់ផ្ទះ កីឡាការិនីវាយកូនបាល់ជម្រើសជាតិកម្ពុជា ម៉េត ម៉ារីយ៉ាន បន្តការហ្វឹកហ្វឺនដុសខាត់សមត្ថភាព និងពង្រឹងបច្ចេកទេសបន្ថែមពីមួយថ្ងៃទៅមួយថ្ងៃ។ ថ្លែងប្រាប់សារព័ត៌មានថ្មីៗ តាមតេលេក្រាម កញ្ញា ម៉េត ម៉ារីយ៉ាន ថា បច្ចុប្បន្នគ្រូបង្វឹកបន្តពង្រឹងបច្ចេកទេសលើវិញ្ញាសាដែលត្រូវប្រកួតសម្រាប់ស៊ីហ្គេម២០២៣។

 

កីឡាការិនី ម៉េត ម៉ារីយ៉ាន និយាយថា៖«លោកគ្រូគាត់ពង្រឹងលើបច្ចេកទេសវាយបាល់ ការស្លាយបាល់ ការទម្លាក់បាល់ខ្លីៗ និងពង្រឹងកម្លាំងកាយរបស់យើង។ ជាមួយនឹងការហ្វឹកហាត់ខ្លាំងនេះដែរខ្ញុំរំពឹងថា នឹងធ្វើឱ្យបានលទ្ធផលល្អនៅស៊ីហ្គេម២០២៣»។

 

កីឡាការិនីវាយកូនបាល់ជម្រើសជាតិកម្ពុជា ម៉េត ម៉ារីយ៉ាន ហ្វឹកហាត់ពីថ្ងៃចន្ទ ដល់ថ្ងៃសៅរិ៍ មួយថ្ងៃហ្វឹកហាត់ពីរពេល(៨៖៣០-១១៖៣០ព្រឹក និង១-៤ ល្ងាច)។ ម៉ារីយ៉ាន ធ្លាប់បានចូលរួមប្រកួតព្រឹត្តិការណ៍កីឡាស៊ីហ្គេមលើកទី២០ ឆ្នាំ២០១៩ នៅប្រទេសហ្វីលីពីន ដោយទទួលបានមេដាយសំរឹទ្ធ៕