ឈ្មោះ Madam Pang នៅក្នុងវិស័យបាល់ទាត់លែងជារឿងគួរភ្ញាក់ផ្អើលសម្រាប់អ្នកគាំទ្របាល់ទាត់ថៃ និងតំបន់អាស៊ីអាគ្នេយ៍ទាំងមូលទៀតហើយ។ លោកជំទាវ Pang បានចូលរួមចំណែកជ្រោមជ្រែងវិស័យកីឡាបាល់ទាត់ថៃយ៉ាងសកម្ម ទាំងក្រុមជម្រើសជាតិបុរស និងក្រុមស្ត្រីថៃ។ អ្វីដែលពិសេស អ្នកស្រីជាអ្នកផ្គត់ផ្គង់ និងឧបត្ថម្ភដ៏ធំសម្រាប់ក្រុមស្ត្រីទៀតផង។ ជាមួយនឹងសក្ដានុពលហិរញ្ញវត្ថុ និងការស្រឡាញ់ អ្នកស្រីបាននាំកីឡាបាល់ទាត់ថៃទៅកាន់ភាពជោគជ័យជាច្រើនក្នុងរយៈពេលចុងក្រោយ។
 

Madam Pang ដែលមានឈ្មោះផ្លូវការ Nualphan Lamsam កើតនៅថ្ងៃទី២១ ខែមីនា ឆ្នាំ ១៩៦៦​ ក្នុងក្រុងបាងកកប្រទេសថៃ។ អ្នកស្រី ជាជំនាន់ទី ៥ នៃគ្រួសារ Lamsam ដែលជាគ្រួសារជនជាតិចិនដ៏ល្បីល្បាញមួយនៅក្នុងពិភពហិរញ្ញវត្ថុរបស់ប្រទេសថៃ។ Madam Pang បច្ចុប្បន្នជាប្រធាន និងជានាយកប្រតិបត្តិនៃក្រុមហ៊ុនធានារ៉ាប់រង Muang Thai និងជាម្ចាស់​ធនាគារ Kasikorn Bank ដ៏ល្បីរបស់ថៃផងដែរ។
  

កូនកាត់ថៃ-ចិនរូបនេះ បានសិក្សានៅសកលវិទ្យាល័យ ​Chulalongkorn ក្នុងប្រទេសថៃ និងថ្នាក់អនុបណ្ឌិតផ្នែកគ្រប់គ្រងពីសាកលវិទ្យាល័យ Boston សហរដ្ឋអាម៉េរិក។ ក្នុងត្រកូលអ្នករកស៊ី៥ជំនាន់ Madam Pang ក្នុងវ័យ៥៦ឆ្នាំ ជាប់ឈ្មោះក្នុងបញ្ជីមហាសេដ្ឋី របស់ទស្សនាវដ្ឋីដ៏ល្បីអាម៉េរិក Forbes ជាមួយទំហំទឹកប្រាក់ខ្ទង់ពាន់លានដុល្លារ។

 

អ្នកស្រីបាន​រៀបការ​ជាមួយ​អ្នកជំនួញ​ឈ្មោះ Vachara Phanchet ហើយ​មាន​កូនស្រី​ម្នាក់​ឈ្មោះ Nuawan Phanchet ។ យ៉ាងណា ប្តីប្រពន្ធនេះបានលែងលះគ្នានៅដើមឆ្នាំ ២០០៥។ នៅឆ្នាំ ២០១៤ Madam Pang បានរៀបការជាលើកទីពីរហើយលើកនេះជាមួយលោកវរសេនីយ៍ឯក Narat Sawettananas។ អ្នកទាំងពីរតែងតែបង្ហាញខ្លួនជាមួយគ្នាក្នុងព្រឹត្តិការណ៍សំខាន់ៗ។
  

ក្រៅ​ពី​​ជំនួញ មហាសេដ្ឋី​ស្រី​រូប​នេះ​ក៏​មាន​ចិត្ត​ស្រឡាញ់​វិស័យបាល់ទាត់យ៉ាងខ្លាំង។ ក្នុងឆ្នាំ ២០១៥ តាមរយៈក្រុមហ៊ុនធានារ៉ាប់រង Muang Thai បានកាន់កាប់ក្លិប Port FC។ ជាមួយនឹងការវិនិយោគដ៏អស្ចារ្យរបស់ Madam Pang ក្លិប Port FC បានផ្លាស់ប្តូរមុខមាត់ថ្មី ដោយឈានចូលទៅប្រជែងនៅលីគកំពូលថៃ Thai League 1 និងឈ្នះ Thai National Cup ឆ្នាំ ២០១៩ ផង។
 

ទោះបីជាមិនដែលឈ្នះ Thai League 1 ប៉ុន្តែ Port FC ត្រូវបានគេទទួលស្គាល់ជាក្រុមខ្លាំងមួយ និងមានសក្ដានុពលផ្នែកហិរញ្ញវត្ថុ ហើយថែមទាំងមានទីផ្សារ និងមានកិច្ចសន្យាឧបត្តម្ភពីក្រុមហ៊ុនធំៗជាច្រើន។

ជាមួយនឹងក្រុមជម្រើសជាតិ Madam Pang ធ្លាប់ជាអ្នកផ្គត់ផ្គង់ធំដល់ក្រុមកីឡាបាល់ទាត់នារីថៃ។ ក្រុមហ៊ុនធានារ៉ាប់រង Muang Thai ជាអ្នកឧបត្ថម្ភនៃការប្រកួតបាល់ទាត់នារី ហើយកីឡាករនារីថៃត្រូវបានទទួលយកឱ្យធ្វើការជាបុគ្គលិករបស់ក្លិបផង។ Madam Pang ក៏​ដើរតួ​សំខាន់ ​ក្នុង​ការ​នាំ​កីឡា​បាល់​ទាត់​នារី​ថៃ​ទៅជម្រុះ​ជុំ​ចុង​ក្រោយ​នៃ​ការ​ប្រកួត​បាល់​ទាត់​នារី​ពិភពលោក World Cup ​ក្នុង​ឆ្នាំ ២០១៥ និង ២០១៧។
  

នៅឆ្នាំ ២០២០ Madam Pang ត្រូវបានចាត់តាំងឱ្យគ្រប់គ្រងក្រុមបាល់ទាត់បុរសថៃ។ កាន់តំណែងជាអ្នកចាត់ការទូទៅភ្លាម ក្រុមរហស្សនាមដំរីចម្បាំងឈ្នះពានរង្វាន់ AFF Cup ឆ្នាំ២០២០ តែម្តង។ 
 

រហូតមកទល់បច្ចុប្បន្ននេះ Madam Pang តែងបង្ហាញវត្តមានគ្រប់ការប្រកួត ជាមួយគ្រូបង្វឹកលោក Mano Polking រហូតក្រុមថៃបន្តឈ្នះជើងឯកពានរង្វាន់តំបន់អាស៊ានឆ្នាំ២០២២ និងជាលើកទី២ជាប់គ្នា ក្រោមការគ្រប់គ្រងរបស់អ្នកស្រី។ ថៃបានយកឈ្នះវៀតណាមនៅជំនួបផ្តាច់ព្រ័ត្រជើងទី២ AFF Cup 2022 ក្នុងលទ្ធផល ១-០ និងសរុបទាំងពីរជើងថៃឈ្នះ ៣-២៕