Arsenal បានបំបាក់ក្រុម ​Tottenham Hotspur ក្នុងជំនួប London Derby ឬក៏ហៅថាការប្រជែងក្រុមមកពីទីក្រុងតែមួយដោយលទ្ធផល ២​-០ ហើយជ័យជម្នះនេះបានរុញច្រានឱ្យក្រុមដែលដឹកនាំដោយលោក Mikel Arteta នាំមុខដាច់លើកំពូលតារាង Premier League ដល់ទៅ ៨ពិន្ទុពីលើក្រុមលេខ២ Man City។ Man City ទើបតែប្រកួតចាញ់ ​Man United លទ្ធផល ២-១ នៃជំនួបប្រកួត Manchester Derby ដូចគ្នា។
 

៨ពិន្ទុដែលកាំភ្លើងធំនាំមុខនៅកំពូលតារាង ​​Premier League បានធ្វើឱ្យពួកគេ​ តាមស្មើកំណត់ត្រាការប្រកួតកាលពីឆ្នាំ ២០០៣-០៤​ ដែលជារដូវកាលពួកគេឈ្នះពានរង្វាន់លីគ Premier league ចុងក្រោយដែលដឹកនាំដោយលោក Arsene Wenger។ 
 

ក្រុមបិសាចក្រហម និងមេឃខៀវ រួមជាមួយ Newcastle United កំពុងតែប្រដេញពិន្ទុតាមពីក្រោយ Arsenal និងរួមទាំងប្រជែងតំណែងក្រុមកំពូលទាំង ៤ នៃ Premier league។ ប៉ុន្តែខណៈពេលដែលមនុស្សជាច្រើនបានកំពុងតែគាំទ្រក្រុម ​Arsenal ដើម្បីឱ្យពួកគេបញ្ចប់ការរង់ចាំដ៏យូនៃការឈ្នះពានរង្វាន់របស់ពួកគេជិត ២០ឆ្នាំមកនេះ លោក Gary Neville វីរបុរសបាល់ទាត់បិសាចក្រហម និងជាអ្នកវិភាគបាល់ទាត់ឱ្យទូរទស្សន៍ ​Sky Sports ថា Arsenal នឹងបញ្ចប់ត្រឹមចំណាត់ថ្នាក់លេខ៣ តែប៉ុណ្ណោះ។
 

«ខ្ញុំមិនគិតទេថា ​Arsenal នឹងអាចឈ្នះពានរង្វាន់លីគកំពូលរដូវកាលនេះទេ។ Manchester City នឹងឈ្នះពានរង្វាន់លីគកំពូល ហើយខ្ញុំគិតថា Man Utd និងបញ្ចប់ចំណាត់ថ្នាក់លេខខ២។ វិភាគបែបនេះខ្ញុំដឹងថាវានឹងប៉ះពាល់ដល់អ្នកគាំទ្ររបស់ Arsenal។ ខ្ញុំពិតជាចង់ឱ្យ​ ​Arsenal ឈ្នះពានជាង Man City តែខ្ញុំគិតថាវាពិតជាគួរឱ្យភ្ញាក់ផ្អើលសម្រាប់ Premier League ហើយខ្ញុំគិតថានៅពេលទស្សនា Premier league យើងឃើញថា ​Man City ក្លាយជាក្រុមខ្លាំងដាច់ពី Liverpool រយៈពេលជាង ៥ឆ្នាំមកនេះ។»។ លោក ​Neville ​បានឆ្លើយទៅនឹងសំណួរអំឡុងពេលវិភាគក្នុងកម្មវិធីទូរទស្សន៍ ​Sky Sports។ 
 

ការប្រកួតបន្ទាប់របស់ Arsenal នឹងត្រូវជួប  Man United ក្នុងការប្រកួត ​Premier league សប្តាហ៍ទី១៩ នៅថ្ងៃទី២២ ខែមករា បន្ទាប់ពី Man City ត្រូវទទួលក្រុម ​Tottenham Hotspur នៅថ្ងៃទី២០ ខែមករា៕