អាជីពដ៏ត្រចះត្រចង់របស់ ​Ronaldo នៅតំបន់អឺរ៉ុបបានបញ្ចប់ ក្រោយរូបគេឈ្នះពានរង្វាន់ Champions League ចំនួន ៥លើកជាមួយ Real Madrid រួមទាំងពានរង្វាន់នៅអង់គ្លេសជាមួយ Manchester United អ៊ីតាលី Serie A ចំនួន២លើកជាមួយ Juventus។ ចាប់តាំងពីចុះកិច្ចសន្យាជាមួយ ​Al Nassr តារាបាល់ទាត់វ័យ ៣៧ឆ្នាំ បានរៀបរាប់ថាភារកិច្ចរបស់គេនៅតំបន់អឺរ៉ុបបានចប់ហើយក្រោយរូបគេបានឈ្នះគ្រប់យ៉ាង និងជាពេលវេលាដ៏ត្រឹមត្រូវក្នុងការចែករំលែកបទពិសោធន៍ក្នុងតំបន់អាស៊ី។


 

ក្លិបនៅអារ៉ាប៊ីបានក្លាយជាគោលដៅចុងក្រោយរបស់ Ronaldo សម្រាប់អាជីពកីឡាករបាល់ទាត់ ចាប់តាំងពីការផ្តើមអាជីពដំបូងក្នុងឆ្នាំ​ ២០០២ នៅក្លិប Sporting CP។ Ronaldo ចំណាយពេលនៅក្រុមបិសាចក្រហម៥រដូវកាល មុនចាកចេញទៅ Real Madrid ប្រទេសអេស្ប៉ាញ និងទឹកដីអ៊ីតាលី Juventus។ នាការបង្ហាញវត្តមានលើកទី២ នៅ Man United តារាបាល់ទាត់សញ្ជាតិព័រទុយហ្កាល់បានចែកផ្លូវគ្នាវិញជាមួយក្រុមនៅអង់គ្លេសក្រោយមានរឿងរ៉ាវរកាំរកូស។
 

កាលលេងនៅទឹកដីអេស្ប៉ាញ Ronaldo និង Messi ធ្លាប់បានប្រកួតប្រជែងគ្នាជាងច្រើនឆ្នាំ ដើម្បីកេរិ៍្តឈ្មោះជាកីឡាករដែលល្អបំផុតប្រចាំប្រវត្តិសាស្ត្រនារយៈពេលជាង ១៥ឆ្នាំ។ កីឡាករទាំងពីរនឹងត្រូវជួបគ្នាជាថ្មីនៅថ្ងៃទី១៩ ខែមករា ចាប់តាំងពីអ្នកទាំងពីរជួបគ្នាចុងក្រោយបំផុតក្នុងខែធ្នូ ឆ្នាំ ២០២០ នៅពេល Juventus បំបាក់ Barcelona ៣-០។ 

Ronaldo នឹងដឹកនាំក្រុមតារាបាល់ទាត់អារ៉ាប់ ​Riyadh ST XI ដែលជាការបូកបញ្ចូលគ្នារវាងកីឡាករមកពីក្លិប Al Hilal និង Al Nassr ទល់នឹងក្រុម Paris Saint Germain ដែលមាន​ Messi, Neymar JR និង​ Mbappe​ ជាដើម។ 
  

 

ការប្រកួតប្រជែងដែលអ្នកគាំទ្រជាច្រើនទន្ទឹងរង់ចាំស្ទើរតែមួយពិភពលោក នឹងធ្វើឡើងក្នុងកីឡដ្ឋាន King Fahd នាទីក្រុងរីយ៉ាដ ហើយបើតាមរបាយការណ៍បានឱ្យដឹងថាសំបុត្រការប្រកួតត្រូវបានស្នើទិញតាមបណ្តាញអ៊ិនធឺណិតជាង ២លានដង។ លើសពីនេះសំបុត្រមាសដែលមានឈ្មោះថា«Beyond Imagination»ដ៏ពិសេសសម្រាប់ទស្សនាការប្រកួតដែលត្រូវបានដេញថ្លៃតម្លៃ ២,៦៦លានដុល្លារក្នុងការដេញថ្លៃបានបញ្ចប់ការដេញថ្លៃថ្ងៃទី១៧ ខែមករា។ 
 

ការប្រកួតដ៏អស្ចារ្យនៅអារ៉ាប៊ីសាអូឌីតកើតឡើងក្រោយបញ្ចប់ព្រឹត្តិការណ៍ World Cup 2022 បានមួយខែពេញតែម្តង បន្ទាប់ពីអាហ្សង់ទីនបានគ្រងជើងឯក World Cup ហើយ Ronaldo បានធ្លាក់ចេញពីការប្រកួតជាមួយព័រទុយហ្កាល់ត្រឹមវគ្គ ៨ក្រុម។ ​​Ronaldo នឹងក្លាយជាប្រធានក្រុម Riyadh ST XI សម្រាប់ប្រកួតទល់ PSG ក្រោយរូបគេបានចុះកិច្ចសន្យាជាមួយ Al Nassr ដែលទទួលបានថ្លៃពលកម្មជាង ២១៣លានដុល្លារក្នុងមួយឆ្នាំ។ 
 

បើតាមកាសែតដ៏ល្បីរបស់បារាំង ​L’Equipe រាយការណ៍កាលពីថ្ងៃទី១៦ ខែមករា ថាក្រុមរហ័សនាមអ្នកមានបារាំង PSG នឹងទទួលបានប្រាក់ចំនួនជាង ១០លានអឺរ៉ូពីការប្រកួតមិត្តភាពនៅទឹកដីអារ៉ាប៊ីសាអូឌីតនេះ៕