ក្នុងដំណើរឆ្ពោះទៅព្រឹត្តិការណ៍កីឡាស៊ីហ្គេម២០២៣ សហព័ន្ធកីឡាសីដក់ និងឈិនឡូនកម្ពុជាកំពុងផ្តោតសំខាន់លើបច្ចេកទេស និងពង្រឹងសមត្ថភាពរបស់អត្តពលិកកីឡាឈិនឡូនបន្ថែម ខណៈបច្ចុប្បន្នអត្តពលិកកម្ពុជា ៣៦រូបកំពុងបោះជំរុំហ្វឹកហាត់នៅប្រទេសមីយ៉ាន់ម៉ា។ អ្នកស្រី ទី សួង អគ្គលេខាធិការសហព័ន្ធកីឡាសីដក់ និងឈិនឡូនកម្ពុជា ដែលស្ថិតនៅប្រទេសមីយ៉ាន់ម៉ា បានបញ្ជាក់ថា ការហ្វឹកហាត់របស់អត្តពលិកជម្រើសជាតិគឺបានរយៈពេលមួយខែហើយ តាមការសង្កេត និងត្រួតពិនិត្យជាប្រចាំកីឡាករ-កីឡាការិនី មានការកើនឡើងច្រើន ដែលជាក្តីសង្ឃឹមសម្រាប់ស៊ូហ្គេមនៅកម្ពុជា។

 

អ្នកស្រី ទី សួង និយាយថា៖«ឥឡូវនេះយើងកំពុងហ្វឹកហាត់នៅប្រទេសមីយ៉ាន់ម៉ានេះបាន១ខែហើយ យើងហាត់នៅលើវិញ្ញាសាឈិនឡូន ការហ្វឹកហាត់របស់យើងពីមួយថ្ងៃទៅមួយថ្ងៃមានការកើនឡើងបានច្រើន ទាំងកម្លាំង ទាំងបច្ចេទេស ដែលទទួលបានពីម្ចាស់ផ្ទះមីយ៉ាន់ម៉ា មានគ្រូជំនាញ និងអត្តពលិកចាស់គាត់មកបង្ហាត់បង្រៀនយើង»។

 

គួរបញ្ជាក់ថា ប្រតិភូ និងអត្តពលិកកីឡាសីដក់ និងឈិនឡូនកម្ពុជា ទាំង៣៦រូប នឹងវិលមកប្រទេសកម្ពុជា វិញ នៅថ្ងៃទី៣០ ខែមេសា ឆ្នាំ២០២៣ មុនការមកដល់នៃព្រឹត្តិការណ៍ប្រវត្តិសាស្រ្តកីឡាស៊ីហ្គេម២០២៣ នៅកម្ពុជា៕