សម្តេចរដ្ឋមន្រ្តីមហាផ្ទៃ លើកឡើងថា រដ្ឋាភិបាល និងអង្គការសង្គមស៊ីវិល បានជួបពិភាក្សាគ្នាជាបន្តបន្ទាប់ ហើយសម្ដេច លើកទឹកចិត្តឲ្យបន្តជួបជជែកគ្នារវាងភាគីទាំង២ ទៅលើកិច្ចការផ្សេងៗ ដែលនៅសេសសល់។ លោក Joseph Scheuer ថ្លែងទៅកាន់សម្តេចថា លោក ក៏បានដឹងដែរ អំពីការបន្តកិច្ចសន្ទនារវាងអង្គការសង្គមស៊ីវិលជាមួយក្រសួងមហាផ្ទៃ។ 

 

កាលពីថ្ងៃទី១០ ខែមករា ឆ្នាំ២០២៣ ក្រសួងមហាផ្ទៃ បានរៀបចំវេទិកាស្ដីពីភាពជាដៃគូរវាងរដ្ឋាភិបាល និងអង្គការសង្គមស៊ីវិលលើកទី៥ឡើងវិញ ក្រោយផ្អាកអស់២ឆ្នាំកន្លងមក ដោយសារការរាលដាលជំងឺកូវីដ-១៩។ សម្តេច ស ខេង ថ្លែងក្នុងវេទិកានេះថា រដ្ឋាភិបាលកម្ពុជា ចាត់ទុកអង្គការសង្គមស៊ីវិលជាដៃគូ ក្នុងការចូលរួមលើកកម្ពស់លទ្ធិប្រជាធិបតេយ្យសេរីពហុបក្ស ការគោរពសិទ្ធិមនុស្ស ការពង្រឹងនីតិរដ្ឋ និងការអភិវឌ្ឍសេដ្ឋកិច្ច៕