នៅក្នុងឆ្នាំ២០២៤ តៃវ៉ាន់ នឹងរៀបចំការបោះឆ្នោតប្រធានាធិបតី ខណៈបក្សបក្សប្រជាធិបតេយ្យជឿនលឿន (DPP) បានជ្រើសរើសលោក William Lai អនុប្រធានាធិបតីតៃវ៉ាន់ ជាប្រធានបក្ស។ ក្រោយកាន់តំណែងជាប្រមុខបក្ស លោក Lai បានថ្លែងពីចិនជាលើកដំបូង។​

 

«ការបំពេញចិត្ត មិនអាចទិញសន្តិភាពបានឡើយ»។ ប្រធានបក្សប្រជាធិបតេយ្យជឿនលឿន បានថ្លែងបែបនេះនៅថ្ងៃទី១៨ ខែមករា ដោយសំដៅទៅសំណើចិន ជុំវិញការបង្រួបបង្រួមប្រទេស ក៏ដូចជាគោយនយោបាយ «ប្រទេសមួយ ប្រព័ន្ធពីរ» ដូចនៅហុងកុង និងម៉ាកាវ។ 

 

លោក Lai តែងលើកឡើងពីឯករាជ្យរបស់តៃវ៉ាន់ជាច្រើនលើក ដែលបញ្ហានេះ បានបង្កឱ្យចិនខឹងសម្បាយ៉ាងខ្លាំង។ នេះបើតាមការចុះផ្សាយរបស់ទីភ្នាក់ងារព័ត៌មាន AFP។ 

 

ទន្ទឹមនេះ អនុប្រធានាធិបតីតៃវ៉ាន់រូបនេះ ក៏បានអំពាវនាវឱ្យប្រជាជនតៃវ៉ាន់រួមគ្នា ដើម្បីប្រឈមនឹងការពង្រីកអំណាចផ្តាច់ការរបស់រដ្ឋាភិបាលក្រុងប៉េកាំងផង។ ត្រង់ចំណុចនេះ លោក Lai យល់ថា វាមានតែការរួបរួមគ្នា និងពង្រឹងសមត្ថភាពការពារប៉ុណ្ណោះ ទើបអាចការពារសន្តិសុខតៃវ៉ាន់បាន។ 

 

កន្លងមក ចិនតែងលើកឡើងពីការបង្រួមបង្រួមដែនដីទាំងពីរប្រកបដោយសន្តិភាព ខណៈប្រធានាធិបតីចិន លោកស៊ី ជិនភីង បានចាត់ទុកការបង្រួបបង្រួមប្រទេស ដែលបែកបាក់ចាប់តាំងពីឆ្នាំ១៩៤៩ មក ជាបេសកកម្មប្រវត្តិសាស្រ្ត។ ជាញយៗ ចិនក៏ព្រមានប្រើកម្លាំងយោធាដែរ ប្រសិនបើតៃវ៉ាន់ហ៊ានប្រកាសឯករាជ្យបំបែកចេញពីខ្លួន៕