«ក្នុងការសម្ដែងបទចម្រៀងវិរភាពកីឡា ខ្ញុំបាទភ័យ ប៉ុន្ដែកក់ក្ដៅបន្ដិចដែរ ពេលមានបងដួង វិរសិទ្ធ នៅជិតនេះ។ យើង បានបំពេញក្ដីស្រម៉ៃមួយរួមគ្នា ក្នុងបុព្វហេតុនៃកីឡាជាតិ។»។ តារាចម្រៀងវ័យ២៧ឆ្នាំ បានបញ្ជាក់ប្រាប់សារព័ត៌មានថ្មីៗដូច្នេះ។
 

ស្របតាមពាក្យស្លោករបស់គណៈកម្មាធិការជាតិរៀបចំកីឡាអាស៊ីអាគ្នេយ៍ (CAMSOC) «ប្រជាជនម្នាក់ គឺជាម្ចាស់ផ្ទះម្នាក់» លោក ម៉ម ពេជ្ជរិទ្ធ នឹងចូលរួមគាំទ្រ ជាពិសេសប្រើស្នារដៃនិពន្ធ និងច្រៀងចម្រៀង ដែលបង្ហាញអត្ថន័យរៀបរាប់ពីគុណតម្លៃរបស់កីឡា និងការតស៊ូរបស់អត្ដពលិកជម្រើសជាតិ ដើម្បីគាំទ្រ លើកទឹកចិត្តអ្នកទាំងអស់នោះ។ 
  

តារាចម្រៀងកម្ពុជារូបនេះ បាននិយាយទាំងញញឹមដូច្នេះថា៖«ខ្ញុំ នឹងចូលរួមជាលក្ខណតន្ដ្រី។ នៅក្នុងឆ្នាំនេះ តន្ដ្រី ដែលខ្ញុំចូលរួមជាមួយកីឡា ត្រៀមផលិតជាមួយ បងរៀម សុខភារម្យ មានចំនួន ២ទៅ៣ បទដែរ។ ខ្ញុំ យល់ថាចម្រៀងទាំងនេះ អាចជំរុញទឹកចិត្តប្រជាជនយើង ក្នុងការត្រៀមទទួលស្វាគមន៍ស៊ីហ្គេម។»។
 

លោក ម៉ម ពេជ្ជរិទ្ធ ជឿថានេះ គឺជាពេលវេលាដ៏ល្អសម្រាប់កម្ពុជា បង្ហាញនូវអ្វីដែលជារបស់ជាតិ ដូចអរិយធម៌ វប្បធម៌ និងអត្ដសញ្ញាណជាតិផ្សេងៗទៀត ទៅអន្ដរជាតិ។ «នេះ គឺជាពេលវេលារបស់កម្ពុជាយើង ដែលបង្ហាញទៅអន្ដរជាតិ ប្រទេសទាំងអស់ ដែលចូលរួមស៊ីហ្គេម។ កម្ពុជា ជាម្ចាស់ផ្ទះ នឹងបង្ហាញនូវពណ៌សម្បុរនៃជាតិសាសន៍យើង អត្ដចរិតរបស់យើង កីឡារបស់យើង ដែលរុងរឿង តាំងបុរាណមក ដែលគ្រប់សិល្បៈ ប្រពៃណី វប្បធម៌។ យើងបង្ហាញឲ្យគេ ឃើញទាំងអស់មិនមែនត្រឹមតែកីឡាតែម្យ៉ាងទេ។ នេះ គឺជាពេលវេលាដ៏វិសេសបំផុត។»។ ពេជ្ជរិទ្ធ បន្ថែមដូច្នេះ។

តារាចម្រៀងដ៏មានប្រជាប្រិយភាព វ័យ២៧ឆ្នាំនេះ ក៏បានអំពាវនាវឲ្យប្រជាពលរដ្ឋកម្ពុជា បន្ដគាំទ្រវិស័យកីឡា និងសិល្បៈកម្ពុជា ជាពិសេសទៀតនោះ គឺការចូលរួមធ្វើជាម្ចាស់ផ្ទះស៊ីហ្គេម ហើយបំពេញនូវអ្វី ដែលអាចធ្វើទៅបានក្នុងនាមជាម្ចាស់ផ្ទះ។ មួយវិញទៀត បើទោះជាព្រឹត្តិការណ៍នេះ ជាការប្រកួតកីឡាមែន ប៉ុន្ដែបានបង្កប់អត្ថន័យជាច្រើន ក្នុងនោះមានដូចជាពង្រឹងចំណងមិត្តភាពជាមួយអន្ដរជាតិ ផ្សព្វផ្សាយទេសចរណ៍ និងបង្ហាញនូវអ្វីជាអត្ដសញ្ញាណជាតិរបស់កម្ពុជា៕