កញ្ញា សុង សុធាវី៖ ទេសចរចិននឹងមកកាន់ប្រទេសកម្ពុជាឆាប់ៗនេះ ក្នុងនាមលោកស្រី ជាប្រធានសមាគមទីភ្នាក់ងារទេសចរណ៍កម្ពុជា CATA តើត្រៀមខ្លួនយ៉ាងណាសម្រាប់កិច្ចការងារសំខាន់នេះ?
 

លោកស្រី ឆាយ ស៊ីវលីន៖ ភ្ញៀវទេសចរចិន ដែលគាត់បញ្ចប់គោលនយោបាយ ០ កូវីដ-19 នេះ បានធ្វើឱ្យប្រទេសកម្ពុជាយើង ក៏ដូចជាប្រទេសជាច្រើនបានត្រៀមខ្លួន ស្វាគមន៍ទៅកាន់ពួកគាត់ ព្រោះថាភ្ញៀវទេសចរចិនគឺជាទីផ្សារមួយដ៏ធំនៅក្នុងពិភពលោក ហើយក្នុងនោះនៅបណ្តាប្រទេសប៉ែកអឺរ៉ុបក៏ចង់បានទេសចរចិនដែរ ដោយសារតែពួកគាត់ភាគច្រើនចេញទៅទាំងក្រុមៗ ចំណែកឯកម្ពុជា ដោយគ្រាន់តែលឺការប្រកាសពីសម្តេចនាយករដ្ឋមន្រ្តី ឱ្យទទួលទេសចរចិន អ៊ីចឹង ខាងយើងមានភាពរីករាយណាស់ និងត្រៀមសហការជាមួយដៃគូទាំងក្នុងនិងក្រៅប្រទេស ដើម្បីឱ្យដំណើរការការងារនេះមានភាពល្អប្រសើរតាមការរំពឹងទុក។ និយាយរួម នៅកម្ពុជាគឺយើងត្រៀម ទោះបីជាមិនទាន់វិលមកវិញអស់ក៏ដោយ ប៉ុន្តែជាបណ្តើរៗ គឺកំពុងស្រវេស្រវាងើបមកវិញហើយ។ 

 

លោកស្រី ឆាយ ស៊ីវលីន  ក្នុងបទសម្ភាសជាមួយ អ្នកសារព៍ត៌មានថ្មីៗ

កញ្ញា សុង សុធាវី៖  ចំពោះការត្រៀមនេះ ក្រៅពី CATA ដែលមានសមាជិកជាង៣០០នាក់  តើភាគីណាទៀតដែលចូលរួមយ៉ាងសស្រាក់សស្រាំចំពោះកិច្ចការងារដ៏សំខាន់មួយនេះ?

លោកស្រី ឆាយ ស៊ីវលីន៖ ក្រៅពីសមាជិកយើង ​ដែលជាក្រុមការងាររៀបចំកញ្ចប់ទស្សនកិច្ចហ្នឹង គឺមានភាគីជាច្រើនទៀតដែររួមមាន សេវាកម្មដឹកជញ្ជូន ផ្នែកដឹកនាំភ្ញៀវ មគ្គទេសទេសចរណ៍ សេវាកម្មស្នាក់នៅ អ្នកផ្តល់សេវាកម្មម្ហូបអាហារ និង រមនីយដ្ឋានធម្មជាតិ កែច្នែ មជ្ឍមណ្ឌលទេសចរណ៍ ព្រមទាំងសហគមន៍ទេសចរណ៍មួយចំនួនទៀតផងដែរ។ល។ 

 

កញ្ញា សុង សុធាវី៖ មួយវិញទៀត នាងខ្ញុំឃើញថា វត្តមានលោកស្រី បានចូលរួមយ៉ាងសស្រាក់សស្រាំក្នុងវិស័យនេះ ទោះបីជាក្នុងស្ថានភាពកូវីដ-១៩ ។ល។ ដែលកើតមានចំពោះវិស័យទេសចរណ៍យើងកន្លងមក ដែលយើងដឹងហើយថា យើងធ្លាប់តែរងគ្រោះ និងស្ងាត់ជ្រងំ តែវិលមកទទួលទេសចរវិញទាំងចិន និងបរទេសផ្សេងទៀត តើការទទួលស្វាគមន៍នេះ អាចទទួលបានប្រសិទ្ធភាពភ្លាមទេ ឬ យ៉ាងណា?
 

លោកស្រី ឆាយ ស៊ីវលីន៖  ចាស!ពិតមែនហើយក្នុងវិបត្តិកូវីដ ទេសចរបរទេសស្ងាត់យូរដែរ ទើបធ្វើឱ្យបុគ្គលិកកម្មករយើងត្រូវបានកាត់ចោល ព្រោះម្ចាស់អាជីវកម្មគាត់ទ្រាំលែងបាន ស្ងាត់ពេក! ពួកគាត់ក៏អស់ធនធានទៅ អស់ទុនទៅ អ៊ីចឹងក៏សម្រេចចិត្តកាត់បុគ្គលិកចោល! បានធ្វើឱ្យបុគ្គលិកទាំងនោះចាកចេញទៅរកការងារអ្វីផ្សេងធ្វើ  ដែលមិនមែនជាជំនាញក្នុងវិស័យទេសចរណ៍ច្រើនឆ្នាំមកហើយ។ អ៊ីចឹង ពេលនេះ យើងត្រូវការពួកគាត់មកវិញ តែមកក៏បានខ្លះ និងមិនបានមកមួយចំនួនដែរ។ ការមកវិញមួយចំនួនរបស់ពួកគាត់ អាចនឹងមានការភ្លេចភ្លាំងខ្លះ អ៊ីចឹងយើងក៏មានការបណ្តុះបណ្តាលខ្លះពីក្រសួងទេសចរណ៍ ដែលគាត់តែងតែធ្វើតាមរយៈអនឡាញ និងផ្ទាល់ផងដែរ។ ក្នុងហ្នឹងសមាគមយើង ក៏ចូលរួមបណ្តុះបណ្តាលនៅខេត្តសៀមរាប បានខ្លះផងដែរ​។ អ៊ីចឹង វាជាការជួយឡើងវិញ នៃវិស័យទេសចរណ៍ផងដែរ។ យើងមានការសហការគ្នាគ្រប់ផ្នែកទាំងអស់ រួមមានការចូលរួមរៀនសូត្រ បំពេញបន្ថែម ពីបុគ្គលិកជំនាញរបស់យើង តែយើងក៏មិនបានរំពឹងថា ពួកគាត់នឹងមកវិញលឿនភ្លាមដល់ ៦លាននាក់ ដូចពេលមុនដែរ ប៉ុន្តែយើងរំពឹងថា សេវាទេសចរណ៍យើង អាចទទួលយកបាន៕