សិស្ស​​និទ្ទេស A ចំនួន ១ ០៤៩នាក់ ដែល​ប្រឡងជាប់សញ្ញាបត្រមធ្យមសិក្សាទុតិយភូមិ នា​សម័យ​ប្រឡង ៥ ធ្នូ ២០២២ នឹង​​ជួប​សម្ដេច ហ៊ុន សែន នៅថ្ងៃទី២ កុម្ភៈ។ នា​ពិធី​បើកការដ្ឋាន​សាងសង់​លើ​កម្រិត​គុណភាពផ្លូវជាតិ​លេខ​៤១ កាល​ពី​ថ្ងៃទី​២៦ ខែធ្នូ ឆ្នាំ​២០២២ សម្ដេច ហ៊ុន សែន បាន​ប្រកាស​​ពន្យារពេល​ជួប​សិស្សនិទ្ទេស រហូតដល់ខែ​កុម្ភៈ ឆ្នាំ​២០២៣។​
 

បើតាម​សម្ដេច​នាយករដ្ឋមន្រ្តី ការពន្យារ​ពេល​នេះ​ ព្រោះជាប់​បញ្ជាទិញ Ipad សម្រាប់សិស្សឆ្នើមទាំងនោះ។ សូម​បញ្ជាក់ថា ក្នុង​ឆ្នាំសិក្សា​២០២១-២០២២ មាន​បេក្ខជន​ចំនួន ៩០ ៩៥០នាក់ ត្រូវជា​៧២,៣៣ភាគរយ បាន​ប្រឡងជាប់សញ្ញាបត្រមធ្យមសិក្សាទុតិយភូមិ (បាក់ឌុប)។ ក្នុងចំណោម​បេក្ខជន​ដែល​ប្រឡង​ជាប់ មាន​សិស្សនិទ្ទេស A ១០៤៩នាក់, និទ្ទេស B មាន​៧២៣២នាក់, និទ្ទេស C មាន​១៩ ០៥៣នាក់, និទ្ទេស D មាន ៣១ ១៦៦នាក់ និងនិទ្ទេស E មាន ៣២ ៤៥០នាក់៕