ជាតិ
សម្ដេច ហ៊ុន សែន នឹងជួបសិស្សនិទ្ទេស A នៅថ្ងៃទី២ កុម្ភៈខាងមុខ
× ភ្នំពេញ៖ សម្ដេច ហ៊ុន សែន នាយករដ្ឋមន្រ្តីកម្ពុជា នឹងជួបសំណេះសំណាលជាមួយសិស្សនិទ្ទេស A ដែលប្រឡងជាប់សញ្ញាបត្រមធ្យមសិក្សាទុតិយភូមិ ឆ្នាំសិក្សា២០២១-២០២២ នៅថ្ងៃទី២ កុម្ភៈខាងមុខ។ នេះបើតាមហ្វេសប៊ុករបស់ក្រសួងអប់រំ យុវជន និងកីឡា ចេញផ្សាយថ្ងៃទី២២ មករានេះ។
សិស្សនិទ្ទេស A ចំនួន ១ ០៤៩នាក់ ដែលប្រឡងជាប់សញ្ញាបត្រមធ្យមសិក្សាទុតិយភូមិ នាសម័យប្រឡង ៥ ធ្នូ ២០២២ នឹងជួបសម្ដេច ហ៊ុន សែន នៅថ្ងៃទី២ កុម្ភៈ។ នាពិធីបើកការដ្ឋានសាងសង់លើកម្រិតគុណភាពផ្លូវជាតិលេខ៤១ កាលពីថ្ងៃទី២៦ ខែធ្នូ ឆ្នាំ២០២២ សម្ដេច ហ៊ុន សែន បានប្រកាសពន្យារពេលជួបសិស្សនិទ្ទេស រហូតដល់ខែកុម្ភៈ ឆ្នាំ២០២៣។
បើតាមសម្ដេចនាយករដ្ឋមន្រ្តី ការពន្យារពេលនេះ ព្រោះជាប់បញ្ជាទិញ Ipad សម្រាប់សិស្សឆ្នើមទាំងនោះ។ សូមបញ្ជាក់ថា ក្នុងឆ្នាំសិក្សា២០២១-២០២២ មានបេក្ខជនចំនួន ៩០ ៩៥០នាក់ ត្រូវជា៧២,៣៣ភាគរយ បានប្រឡងជាប់សញ្ញាបត្រមធ្យមសិក្សាទុតិយភូមិ (បាក់ឌុប)។ ក្នុងចំណោមបេក្ខជនដែលប្រឡងជាប់ មានសិស្សនិទ្ទេស A ១០៤៩នាក់, និទ្ទេស B មាន៧២៣២នាក់, និទ្ទេស C មាន១៩ ០៥៣នាក់, និទ្ទេស D មាន ៣១ ១៦៦នាក់ និងនិទ្ទេស E មាន ៣២ ៤៥០នាក់៕
© រក្សាសិទ្ធិដោយ thmeythmey.com