សម្ដេច ទៀ បាញ់ ចាត់ទុកថា ១០០ថ្ងៃចុងក្រោយនៃការត្រៀមខ្លួនធ្វើជាម្ចាស់ផ្ទះស៊ីហ្គេម ជារឿងសំខាន់ ដែលស្ថាប័នពាក់ព័ន្ធទាំងអស់ ត្រូវប្រឹងធ្វើការងារ ដែលនៅសេសសល់ឲ្យអស់ពីលទ្ធភាព ដើម្បីការធ្វើជាម្ចាស់ផ្ទះនេះ ទទួលបានជោគជ័យ។ ប្រធាន CAMSOC បានប្រាប់ដូច្នេះថា៖«១០០ថ្ងៃចុងក្រោយនេះ គឺជាពេលដែលយើងទាំងអស់គ្នា ត្រូវប្រឹងប្រែងឲ្យអស់លទ្ធភាព ដើម្បីបំពេញការងាររបស់យើងឱ្យបានចប់សព្វគ្រប់។»។
 

សម្ដេច ទៀ បាញ់ ក៏បានបញ្ជាក់បន្ថែមថា កម្ពុជាបានរៀបចំរួចរាល់ជាច្រើនមកហើយ មុនឈានដល់ដំណាក់កាលចុងក្រោយ ដែលនៅសល់១០០ថ្ងៃ ជាពេលដែលត្រូវពង្រឹង និងរៀបចំឲ្យខ្លាំងទៀត ដើម្បីធានាថាកិច្ចការនេះ រួចស្រេចបាច់អស់គ្រប់ផ្នែក។ «១០០ថ្ងៃចុងក្រោយ ជាពេលដែលយើងត្រូវបំពេញបន្ថែម ឲ្យសព្វគ្រប់ពេញលេញបន្ថែមទៀត ទាំងការរៀបចំបដិសណ្ថារកិច្ចដល់គណៈប្រតិភូ កីឡាទាំងឡាយ ដែលចូលមកប្រកួតក្នុងស្រុកយើង។»។ 
 

គួរបញ្ជាក់ថា កម្ពុជា នឹងធ្វើជាម្ចាស់ផ្ទះស៊ីហ្គេម លើកទី៣២ នៅថ្ងៃទី៥-១៧ ខែឧសភា ឆ្នាំ២០២៣ និង អាស៊ានប៉ារ៉ាហ្គេម លើកទី១២ នៅថ្ងៃទី៣-៩ ខែមិថុនា ឆ្នាំ២០២៣។ កម្មវធី១០០ថ្ងៃមុនកីឡាស៊ីហ្គេម នឹងប្រារព្ធធ្វើឡើងនៅកីឡដ្ឋានជាតិមរតកតេជោ ថ្ងៃទី២៥ ខែមករា៕