សង្កាត់កូនគ្រៀល មានប្រជាការពារភូមិជាង៤០០នាក់ ស្រី៥នាក់។ បើតាម លោក រ៉ត សំអាន់ ក្នុងសង្កាត់កូនគ្រៀល គ្មានករណីចោរកម្ម ឬឆក់ប្លន់នោះទេ ដោយសារជារៀងរាល់យប់ ប្រជាការពារភូមិ តែងចុះយាមល្បាតតាមចំណុចគោលដៅ ជាពិសេសនៅចំណុចស្ងាត់។ 
 

លោក រ៉ត សំអាន់ « យើងបានរៀបចំតាំងពីឆ្នាំ២០២០ រហូតមក ហើយក្នុងមួយភូមិៗ មានរហូតជាង១០នាក់ឯណោះ។ អីចឹងប្រជាការពាររបស់សង្កាត់ខ្ញុំនេះ សហការជាមួយអាជ្ញាធរសង្កាត់ ជាមួយមេប៉ុស្តិ៍អ្នកបញ្ជា ការពារសន្តិសុខ ពេលយប់ និងពេលរៀបចំពិធីផ្សេងៗ មានជាប្រចាំ»។
 

បើតាមលោកចៅសង្កាត់រង ទោះបីជាកម្លាំងប្រជាការពារភូមិគ្រប់គ្រាន់ក៏ដោយ ក៏សង្កាត់មានបំណងដាក់ភ្លើងបំភ្លឺតាមផ្លូវនៅពេលយប់ ដើម្បីសម្រួលដល់ការធ្វើដំណើរពលរដ្ឋ និងជួយបង្កើនសុវត្ថិភាពក្នុងសង្កាត់។ ជាមួយគ្នានេះ លោក រ៉ត សំអាន់ ក៏អំពាវនាវ ដល់អង្គការ ឬសប្បុរសជន ជួយដាក់ភ្លើងបំភ្លឺផ្លូវ ក្នុងសង្កាត់ ព្រោះសង្កាត់ មិនទាន់មានលទ្ធភាពដាក់ភ្លើងបំភ្លឺផ្លូវឡើយ។