Bale វ័យ ៣៣ឆ្នាំ ដែលបានបង្ហាញខ្លួនឱ្យក្រុមបាល់ទាត់ជម្រើសជាតិវែលស៍នៅព្រឹត្តិការណ៍ World Cup 2022 នៅប្រទេសកាតា បានជួយក្រុម Los Angeles FC ដែលគេបានចូលរួមបានត្រឹមពាក់កណ្តាលរដូវកាលនោះលើកពានរង្វាន់ Major League Soccer ឆ្នាំ ២០២២។ 
 

កាលពីថ្ងៃទី៩​ ខែមករាឆ្នាំ ២០២៣ តារាបាល់ទាត់រូបនេះបានប្រកាសព្យួរស្បែកជើងពីអាជីពទាត់ក្នុងនាមជាវីរបុរសក្លិបមាន់ក្នាយមាស Spurs និងជាកីឡាករដែលឈ្នះពានរង្វាន់ Champions League ៥លើកជាមួយ Real Madrid។ 
 

អំឡុងពេលស្ថិតនៅជាកីឡាករបាល់ទាត់ Bale មិនដែលលាក់ពីចំណង់ចំណូលចិត្តក្នុងការលេងកីឡាវាយកូនហ្គោលនេះឡើយ ហើយមកដល់ពេលនេះរូបគេបានបង្ហាញយ៉ាងជាក់ច្បាស់ថា កីឡាវាយកូនហ្គោលជាប្រទេសកីឡាដែលរូបត្រូវចូលរួមប្រកួតប្រជែងបន្ទាប់ពីអាជីពបាល់ទាត់។ 
 

Bale នឹងមានវត្តមានក្នុងកម្មវិធី AT&T Pebble Beach Pro-Am ដែលក្នុងការប្រកួតនោះក៏មានការចូលរួមពីម្ចាស់ជើងឯកវាយកូនហ្គោល US Open កីឡាករ Matt Fitzpatrick ក្នុងចំណោមអ្នកចូលរួមចំនួន ១៥៦នាក់ផ្សេងទៀត។ 
 

«ខ្ញុំពិតជារីករាយក្នុងការប្រកាសថាខ្ញុំនឹងចូលរួមប្រកួតកម្មវិធី AT&T Peppe Beach Pro-Am នៅដើមខែក្រោយនេះ តោះទៅទាំងអស់គ្នា។»។ នេះបើតាមការបង្ហោះរបស់ Bale នៅលើបណ្តាញសង្គម Instagram។
 

ការប្រកួតនោះទៀងសោត ក៏មានវត្តមានកីឡាករល្បីៗមួយចំនួនដូចជា Bill Murray, Jason Bateman និង Macklemore សម្រាប់ការប្រកួតដែលមានប្រាក់រង្វាន់ប្រមាណ ៩លានដុល្លារអាម៉េរិក។ 
 

​អតីតកីឡាករបាល់ទាត់វ័យ ៣៣ឆ្នាំរូបនេះ នឹងក្លាយជាទីចាប់អារម្មណ៍របស់ក្រសែរភ្នែកអ្នកគាំទ្រកីឡាវាយកូនហ្គោល តាមរយៈភាពល្បីល្បាញរបស់គេក្នុងវិស័យកីឡាបាល់ទាត់កន្លងមក។ 

កាលនៅជាកីឡាករបាល់ទាត់ Bale បានបង្ហាញខ្លួនឱ្យក្រុមជម្រើសជាតិវែលស៍ចំនួន ១១១លើក ដែលច្រើនជាងកីឡាករណាទាំងអស់ក្នុងប្រវត្តិសាស្ត្រក្រុម។ បើទោះបីជាចាកចេញពីវិស័យបាល់ទាត់ ប៉ុន្តែ Bale នៅតែចាត់ទុកកីឡាករបាល់ទាត់ជាកីឡាអតិភាពដំបូងគេរបស់ខ្លួន៕