Manchester United ទទួលបានឱកាសល្អដើម្បីអាចឈ្នះពានរង្វាន់លើកដំបូងចាប់តាំងពីឆ្នាំ ២០១៧។ លោក Erik ten Hag អ្នកចាត់ការទូទៅក្រុមបិសាចក្រហមប្រាប់អ្នកសារព័ត៌មានក្នុងសន្និសីទនៅថ្ងៃទី២៤ ខែមករា មុនក្រុមត្រូវប៉ះ Nottingham Forest វគ្គពាក់កណ្តាលផ្តាច់ព្រ័ត្រជើងទី១ ពានរង្វាន់ EFL Cup។
យូរឆ្នាំមកហើយក្រុមបិសាចក្រហមរងការរិះគន់យ៉ាងខ្លាំងពីអ្នកគាំទ្រ ចំពោះក្លិបដែលមិនឈ្នះពានរង្វាន់អ្វីមួយសោះ នៅរយៈពេល៥ឆ្នាំចុងក្រោយ។ លើកចុងក្រោយបំផុត Man Utd ឈ្នះពានរង្វាន់ Europa League និង EFL Cup។
ស្ថិតក្រោមការដឹកនាំរបស់លោក Ten Hag រដូវកាលថ្មីនេះ Man Utd ក្លាយជាក្រុមកំពុងតែប្រជែងនៅតំបន់ក្រុមកំពូលតារាងទាំង ៤ ហើយពានរង្វាន់ដែលកំពុងប្រជែងមាន Premier League, EFL Cup, FA Cup និង Europa League។ ចំណោមពានទាំង៣នេះ EFL Cup មានភាគរយខ្ពស់ជាងគេក្នុងការប្រជែងយក។
មុនការប្រកួតមកដល់អ្នកចាត់ការវ័យ ៥២ឆ្នាំបាននិយាយថា ការប្រកួត EFL Cup ជាឱកាសល្អដើម្បីក្រុមឈ្នះពានរង្វាន់លើកដំបូងក្រោយរង់ចាំអស់រយៈពេល៥ឆ្នាំ។
«ពិតណាស់ យើងមានឱកាសល្អដើម្បីឈ្នះប៉ុន្តែអ្នកក៏ត្រូវតែឆ្លងកាត់ការប្រកួតមួយទៅកាន់ការប្រកួតមួយទៀតដែលសុទ្ធសឹងតែលំបាក។ ពេលនេះយើងលេងទល់ក្រុម Nottingham Forest ជាការប្រកួតពីរជើង យើងផ្តោតអារម្មណ៍សម្រាប់ជើងទីមួយ មិនគិតអ្វីផ្សេងទៀតឡើយសម្រាប់រឿងចំពោះមុខ។»។ លោក Ten Hag បាននិយាយបែបនេះ។
លើសពីនេះលោក Ten Hag ក៏បានបន្ថែមថាក្រុមត្រូវតែបន្តដំណើរទៅមុខ បន្ទាប់ពីបរាជ័យលទ្ធផល ៣-២ ក្រោមថ្វីជើងក្រុមកំពូលតារាង Premier League កាំភ្លើងធំ Arsenal ដែលជាការប្រកួតដ៏អស្ចារ្យមិនអាចបំភ្លេចបាន។ ការប្រកួតដែលបិសាចក្រហមចាញ់នោះ គ្មានវត្តមានរបស់ខ្សែបម្រើការពារដ៏រឹងមាំ Casemiro ឡើយ ក្រោយរូបគេរងពិន័យ ស្របពេលប្រកួតទល់ Arsenal តែម្តង។
សម្រាប់ការប្រកួត EFL Cup អ្នកចាត់ការសញ្ជាតិហូឡង់លើកឡើងទៀតថា កីឡាករសំខាន់បន្ថែម ៣រូបដូចជា Diogo Dalot, Jadon Sancho និង Anthony Martial នៅតែបន្តអវត្តមានសម្រាប់ការប្រកួតទល់ Forest ប៉ុន្តែ Casemiro នឹងវិលត្រលប់មកវិញ។
សូមជម្រាបថាការប្រកួតរវាង Nottingham Forest និង Manchester United នឹងធ្វើឡើងនៅវេលាម៉ោង ៣យប់រំលងអាធា្រត្រ (ម៉ោងនៅកម្ពុជា) ហើយការប្រកួតជើងទីពីរនឹងធ្វើឡើងនៅថ្ងៃទី១ ខែកុម្ភៈ។ មួយគូផ្សេងទៀតដែលទើបប្រកួតរួចនារាត្រីថ្ងៃទី២៤ ខែមករា វគ្គពាក់កណ្តាលផ្តាច់ព្រ័ត្រ EFL Cup នេះ Newcastle United បានយកឈ្នះ Southampton លទ្ធផល ១-០ នៃជើងទីមួយ៕