សហព័ន្ធកីឡាទ្រីយ៉ាងត្លុងថៃដាក់គោលដៅក្នុងផែនការយុទ្ធសាស្រ្ត ដើម្បីសម្រេចក្តីប្រាថ្នាក្នុងព្រឹត្តិការណ៍កីឡាស៊ីហ្គេមលើកទី៣២ ឆ្នាំ២០២៣។ លោក Vijitr Sitinawin ប្រធានស្តីទីសហព័ន្ធកីឡាទ្រីយ៉ាត្លុងអាស៊ីអាគ្នេយ៍ និងជាប្រធានសហព័ន្ធកីឡាទ្រីយ៉ាត្លុងថៃ ប្រាប់សារព័ត៌មានថ្មីៗ តាមសារអេឡិចត្រូនិកថា សម្រាប់អត្តពលិកកីឡាទ្រីយ៉ាត្លុងថៃ គឺបានត្រៀមលក្ខណៈរួចរាល់ហើយ ដើម្បីចូលរួមប្រកួតកីឡាស៊ីហ្គេមនៅកម្ពុជា ដោយដាក់គោលដីមេដាយមាស។

 

លោក Vijitr Sitinawin និយាយថា៖«សម្រាប់ស៊ីហ្គេមនៅកម្ពុជា ខ្ញុំគិតថាកីឡាករ-កីឡាការិនីទ្រីយ៉ាត្លុងថៃ គឺត្រៀមខ្លួនរួចរាល់ហើយ សមត្ថភាពពួកគាត់គឺល្អ។ ខ្ញុំរំពឹងថា នឹងអាចដណ្តើមបានមេដាយមាស១ ក្នុងព្រឹត្តិការណ៍នោះ»។ ជាមួយគ្នានោះដែរ ប្រធានសហព័ន្ធទ្រីយ៉ាត្លុងបញ្ជាក់ថា សម្រាប់អត្តពលិកថៃ មិនមានអ្វីជាការព្រួយបារម្ភឡើយ ព្រោះការហ្វឹកហាត់ប្រកបដោយភាពខ្លាំងក្លា។

 

លោក Vijitr Sitinawin បន្តថា អត្តពលិករបស់លោកហ្វឹកហាត់រៀងរាល់ថ្ងៃ ពេលព្រឹក និងពេលរសៀល ដើម្បីត្រៀមចូលរួមកីឡាស៊ីហ្គេម ២០២៣ នាខែឩសភា ឆ្នាំ២០២៣។

 

សូមបញ្ជាក់ថា សហព័ន្ធកីឡាទ្រីយ៉ាត្លុងថៃ ត្រៀមបញ្ជូនអត្តពលិករបស់ខ្លួនសរុប ១០នាក់ក្នុងនោះមានកីឡាការិនី៤នាក់ សម្រាប់ចូលរួមប្រកួតកីឡាស៊ីហ្គេមលើកទី៣២ ឆ្នាំ២០២៣ នៅកម្ពុជា៕