អន្ទាក់សត្វកើនឡើងជាង៥០ភាគរយ នៅក្នុងព្រៃសង្ឃសហគមន៍រុក្ខាវ័ន នាឆ្នាំ២០២២

ជាតិ

អន្ទាក់សត្វកើនឡើងជាង៥០ភាគរយ នៅក្នុងព្រៃសង្ឃសហគមន៍រុក្ខាវ័ន នាឆ្នាំ២០២២

28, Jan 2023 , 9:59 am

រូបភាព

ទន្ទាក់នៅព្រៃសង្ឃរុក្ខាវ័ននៅក្នុងខេត្តឧត្តរមានជ័យកើនជាង៥០ភាគរយ បើធៀបឆ្នាំ២០២១

ដោយ:

ភ្នំពេញ៖ ក្នុងឆ្នាំ២០២២ បញ្ហាដាក់អន្ទាក់សត្វ ក្នុងព្រៃសង្ឃសហគមន៍រុក្ខាវ័នបានកើនជាង៥០ភាគរយ បើធៀបនឹងឆ្នាំ២០២១។ បញ្ហានេះ បានក្លាយជាបញ្ហាប្រឈម ដែលកំពុងគំរាមកំហែងខ្លាំងដល់ជីវិតសត្វព្រៃប្រភេទកម្រ។

ព្រៃសង្ឃសហគមន៍រុក្ខាវ័នមានផ្ទៃដី ៣០ ២៥៤ ហិកតាស្ថិតនៅស្រុកអន្លង់វែង ស្រុកចុងកាល់ ក្រុងសំរោង ខេត្តឧត្ដរមានជ័យ។ បច្ចុប្បន្នព្រៃសហគមន៍ខាងលើ បានក្លាយជាជម្រក សម្រាប់សត្វព្រៃមួយចំនួនធំនៅក្នុងខេត្តឧត្តរមានជ័យ។ ទោះជាយ៉ាងនេះក្តីបញ្ហា ដែលលំបាកបំផុតក្នុងការអភិរក្សសត្វព្រៃក្នុងតំបន់នេះ គឺជនឆ្លៀតឱកាសមួយចំនួននៅបន្តសកម្មភាពលួចដាក់អន្ទាក់នៅក្នុងព្រៃសហគមន៍ ជាហេតុធ្វើឱ្យសត្វរស់នៅដោយភាពភ័យខ្លាច។

ព្រៃសង្ឃរុក្ខាវ័ន ខេត្តឧត្តរមានជ័យ។

លោក សារ ថ្លៃ ប្រធានបណ្ដាញសហគមន៍ព្រៃសង្ឃសហគមន៍រុក្ខាវ័ន បានឱ្យដឹងថា ទិន្នន័យនៃចំនួនសត្វដែលបានស្លាប់ដោយសារអន្ទាក់នៅព្រៃសង្ឃរុក្ខាវ័នក្នុងឆ្នាំ២០២២មានចំនួន ៥ក្បាល ក្នុងនោះមានសត្វទន្សោង ៣ក្បាល ប្រើស ២ក្បាល ដើមឆ្នាំ២០២៣បានប្រទះឃើញទន្សោងញីរងរបួសដោយជាប់អន្ទាក់កាលពីថ្ងៃទី២២ ខែមករា និងកំពុងព្យាបាលពីគ្រូពេទ្យជំនាញ។

បើតាម លោក សារ ថ្លៃ ទិន្នន័យនេះ បានបញ្ជាក់ថា សកម្មភាពដាក់អន្ទាក់ក្នុងសហគមន៍នេះនៅតែបន្តកើនឡើង ខណៈក្នុងឆ្នាំ២០២១ មានសត្វងាប់ ដោយសារអន្ទាក់ ចំនួន ៣ក្បាល ។

លោក សារ ថ្លៃ ប្រធានបណ្ដាញសហគមន៍ព្រៃឈើខេត្តឧត្តរមានជ័យបានប្រាប់សារព័ត៌មានThmeyThmey25ថា ក្នុងឆ្នាំនេះ ក្រុមសហជិកសហគមន៍ព្រៃសង្ឃរុក្ខាវ័នបានប្រទះឃើញអន្ទាក់ច្រើន។ ទោះជាយ៉ាងណា លោក សារ ថ្លៃពុំទាន់បញ្ជាក់ពីចំនួនអន្ទាក់សរុបបានឡើយ។

លោក សារ ថ្លៃ ប្រធានបណ្ដាញសហគមន៍ព្រៃឈើខេត្តឧត្តរមានជ័យ

លោក សារ ថ្លៃ អះអាងដូច្នេះ៖ « យើងដោះបានទុកមួយកន្លែង ប៉ុន្ដែមិនទាន់បានសរុបទេ។យើងពិបាកណាស់ ប្រឹងប្រែងផ្សព្វផ្សាយរាល់ថ្ងៃហើយ ប៉ុន្ដែនៅតែមាន។

បើតាមសង្កេតមើលទៅអ្នករករបរនេះ មិនមែនជាអ្នកទីទាល់ឡើយ តែមិនដឹងថាហេតុអ្វីគាត់ធ្វើបែបនេះ។ អ្វីដែលសំខាន់គឺមានឈ្មួញនៅចាំទិញជាស្រេច»។

ជាមួយគ្នានេះ លោកបន្ថែមថា កន្លងមកនៅពេលបានទទួលដំណឹងពីការដាក់អន្ទាក់ក្រុមគណៈកម្មការបានជូនដំណឹងដល់អាជ្ញាធរ ដូចជាមេភូមិ ដើម្បីអប់រំដល់ទីតាំងបញ្ឈប់មិនឱ្យមានសកម្មភាពបន្ត។ «យើងមិនដឹងថា ហេតុអ្វីការដាក់អន្ទាក់នៅតែមាននោះទេ។មួយឆ្នាំមានសត្វជាប់អន្ទាក់ និងងាប់មិនដាច់ឡើយ។ ជាក់ស្ដែងនៅក្នុងព្រៃយើង

ស្នាមជាប់អន្ទាក់ របស់ សត្វទន្សោងញីមួយក្បាលជាប់អន្ទាក់ត្រូវបានជួយសង្គ្រោះនៅព្រៃសង្ឃរុក្ខាវ័ន។ រូបភាពដោយលោក ទ្រី ស៊ីថេង។

តែមានសត្វងាប់ដូចជា ទន្សោង ប្រើស ជ្រូកព្រៃ ឈ្លូស ដោយសារឧបករណ៍កែច្នៃជានិច្ច»។ នេះជាការពន្យល់របស់លោក ថ្លៃ។

ព្រៃសហគមន៍សង្ឃរុក្ខាវ័នបានក្លាយជាតំបន់ការពារដែនជម្រកសត្វព្រៃសង្ឃរុក្ខាវ័ននៅឆ្នាំ២០១៨ដោយសារមានការតស៊ូការពារតាំងពីឆ្នាំ២០០១ របស់អតីតព្រះសង្ឃលោក ប៊ុន សាលួត

និងសមាជិកសហគមន៍ផ្សេងៗទៀតដែលស្រឡាញ់ព្រៃ និងធនធានធម្មជាតិ ។ព្រៃឈើក្នុងសហគមន៍នេះអាចជាព្រៃចុងក្រោយនៅក្នុងខេត្តឧត្តរមានជ័យ ដែលនៅសេសសល់ព្រៃឈើ

និងសត្វព្រៃប្រភេទកម្រ ដូចជាខ្ទីង ទន្សោង និងប្រភេទផ្សេងជាច្រើនទៀត៕