លោកឧត្តមសេនីយ៍ទោ ជួន ណារិន្ទ ស្នងការខេត្តព្រះសីហនុ បា្រប់សារព័ត៌មានថ្មីៗថា នៅថ្ងៃទី២៧ ខែមករានេះថា ជនជាតិជប៉ុនទាំង១៩នោះ មិនមែនជាជនរងគ្រោះ ដែលត្រូវចាប់បង្ខាំង ឬត្រូវធ្វើទារុណកម្មឡើយ។ លោក អះអាងថា ពួកគេ សុទ្ធតែមានលិខិតឆ្លងដែន និងទិដ្ឋការត្រឹមត្រូវ ពោលគឺ ពួកគេ ចូលមកកម្ពុជាដោយស្របច្បា​ប់។ 
 

ទោះយ៉ាងណា លោក ផ្តល់ព័ត៌មានថា ជនជាតិជប៉ុនទាំង១៩នាក់នោះ ត្រូវបានបញ្ជូនទៅកាន់អគ្គស្នងការដ្ឋាននគរបាលជាតិហើយ ដើម្បីសាកសួរបន្ត។ លោកស្នងការខេត្តព្រះសីហនុ បញ្ជាក់ដូច្នេះថា៖«យើង មិនទាន់បញ្ចប់ភ្លាមៗទេ យើង នៅតែបន្តនីតិវិធី»។ 
 

មុនត្រូវបញ្ជូនទៅអគ្គស្នងការដ្ឋាននគរបាលជាតិ លោក ជួន ណារិន្ទ បានសួរជនជាតិជប៉ុនទាំង១៩នាក់ខាងលើ ថា អ្នកណា ជាអ្នកប្តឹងទៅសមត្ថកិច្ចតាមប្រព័ន្ធទូរស័ព្ទបន្ទាន់ (Hotline)? ក្នុងចំណោមពួកគេទាំង១៩នាក់ សុទ្ធតែឆ្លើយថា មិនបានប្តឹង។ លោកស្នងការ មានប្រសាសន៍ថា មកដល់ពេលនេះ លោក មិនទាន់រកឃើញអ្នកប្តឹងនោះទេ៕