​

 

លោក ឆាយ ផលគុណ ជាពលរដ្ឋនៅក្នុងភូមិក្រាំង ឃុំត្រពាំងធំ ស្រុកទឹកឈូ ក្រុងកំពត ខេត្តកំពត បានរៀបរាប់ថា អាជ្ញាធរឃុំ តែងតែយកចិត្តទុកដាក់ចំពោះប្រជាពលរដ្ឋដែលបានទៅទទួលសេវានៅសាលាឃុំ។ ពលរដ្ឋវ័យ ៣៩ឆ្នាំរូបនេះ ​បន្តថា នៅពេលដែលលោកបានទៅធ្វើលិខិតបញ្ជាក់កំណើត មន្ត្រីបានសួរនាំភ្លាម អំពីតម្រូវការរបស់ខ្លួន និងមិនឱ្យរូបគាត់ត្រូវរង់ចាំយូរនោះទេ។ លោក ឆាយ ផលគុណ បន្ថែមថា៖ «ពេលធ្វើទៅអត់អីទេ ធម្មតា។ អាជ្ញាធរ ផ្តល់សេវាល្អ ឃុំមិនឱ្យពលរដ្ឋរង់ចាំយូនោះទេ គឺ​គេ​យកចិត្តទុកដាក់ និងធ្វើឱ្យទៅតាមលេខរៀង ដែលពលរដ្ឋបានទៅរកសេវានៅទីនោះ»។ ​

 

 លោក ឆាយ ផលគុណ ពលរដ្ឋរស់នៅក្នុងឃុំត្រពាំងធំ

ក្រៅពីមើលឃើញពីភាពវិជ្ជមាននៃការផ្តល់សេវា នៅរដ្ឋបាលឃុំហើយនោះ ពលរដ្ឋភូមិក្រាំង ឃុំត្រពាំងធំរូបនេះ ក៏បានកត់សម្គាល់ដែរថា អាជ្ញាធរឃុំ បានបិទតារាងតម្លៃសេវានីមួយៗនៅនឹងអគារសាលាឃុំតែម្តង។ សម្រាប់លោក ផលគុណ ការបង្ហាញតម្លៃសេវាជាសាធារណៈបែបនេះ ធ្វើឱ្យពលរដ្ឋមិនចំណាយលើសពីកាតព្វកិច្ច និងធានាបានតម្លាភាព។ «ចំពោះថ្លៃសេវា ខាងឃុំបានបិទនៅជញ្ជាំង។ តែមិនថ្លៃនោះទេ គឺមានចន្លោះពី ២០០០រៀល ទៅ៥០០០រៀល តាម​ឯកសារដែលពួកគាត់ ត្រូវធ្វើឱ្យប្រជាពលរដ្ឋ។ រាល់សេវាទាំងអស់ មិនមានការទាមទារអ្វីបន្ថែមពីឃុំនោះទេ ពោលគឺការផ្ដល់សេវា នៅក្នុងឃុំត្រពាំងធំ គឺល្អ»។ លោក ​ឆាយ ផលគុណ គូសបញ្ជាក់យ៉ាងដូច្នេះ។

 

អ្នកស្រី អ៊ុង សុខហៀង ប្រជាពលរដ្ឋរស់នៅឃុំត្រពាំងធំមួយរូប ដែលធ្លាប់ទៅធ្វើ​សំបុត្រកំ​ណើត នៅសាលាឃុំ ក៏មើលឃើញពីភាពល្អនៃការផ្តល់សេវារដ្ឋបាលឃុំត្រពាំងធំនេះដែរ​។ «រាល់ថ្ងៃដូចមិនមានចំណុចខ្វះខាតអីទេ ព្រោះអ្នកស្រីមេឃុំ គាត់គិតគូរដល់ប្រជាពលរដ្ឋច្រើន»។ នេះជាការមើលឃើញរបស់អ្នកស្រី អ៊ុង សុខហៀង ដោយពលរដ្ឋរូបនេះ បានស្នើឱ្យអា​ជ្ញាធរឃុំ បង្កើនការយកចិត្តទុកដាក់បន្ថែមលើពលរដ្ឋក្រីក្រ និងខ្វះខាត។
  

 អ្នកស្រី អ៊ុង សុខហៀង ប្រជាពលរដ្ឋរស់នៅឃុំត្រពាំងធំ។

 

​ជុំវិញការលើកឡើងរបស់ប្រជាពលរដ្ឋនេះ បានធ្វើឱ្យលោកស្រី សេង សុភីន ដែលជាមេឃុំ ញញឹមពព្រាយ។ អ្នកស្រី មេឃុំរូបនេះ ការផ្តល់សេវាល្អជូនពលរដ្ឋ គឺកិច្ចការដែលឃុំបានពង្រឹង និងបន្តបង្កើនប្រសិទ្ធភាពនៃការផ្តល់សេវា និងការដោះស្រាយបញ្ហានានានៅក្នុងឃុំបន្ថែមទៀត។ អ្នកស្រី សេង សុភីន លើកឡើងដូច្នេះ៖ «ចំពោះឃុំ មិនមានអីក្រៅពីមាមោទកភាព នៅពេលដែលគាត់ពេញចិត្ត។ ប្រជាពលរដ្ឋគាត់ត្រង់ណាស់ គាត់មើលម៉េច ផ្តល់ឱ្យគាត់យ៉ាងម៉េច គាត់និយាយចេញពីចិត្តរបស់គាត់។ គាត់មានពាក្យសរសើរថាអាជ្ញាធរយកចិត្តទុកដាក់ យើងស្វាគមន៍។ មានន័យថាយើងបានបំពេញសេវាល្អជូនគាត់។ យើងអរគុណគាត់(ពលរដ្ឋ) ហើយយើងក៏ប្តេជ្ញាចិត្តថានឹងខំប្រឹងធ្វើឱ្យអស់លទ្ធភាពតែម្តង»។

 

ដើម្បីធានាពីប្រសិទ្ធភាពនៃការផ្តល់សេវាសាធារណៈនៅក្នុង លោកស្រី សេង សុភីន មេឃុំត្រពាំងធំ ​អះអាងថា អាជ្ញាធរ នៅតែបន្តជំរុញ និងផ្សព្វផ្សាយជូនពលរដ្ឋ ឱ្យបានយល់ដឹងពីសារៈសំខាន់នៃឯកសារ និងលិខិតរដ្ឋបាលផ្សេងៗ សម្រាប់ប្រើប្រាស់​ជាតម្រូវការជីវភាព​ប្រចាំថ្ងៃ៕

 

អានអត្ថបទពាក់ព័ន្ធផ្សេងទៀត៖ យុវជនសកម្ម សេវាល្អ