កម្ពុជា បញ្ជូនប្រតិភូ គ្រូបង្វឹក និងកីឡាករ-កីឡាការិនីជម្រើសជាតិ ៥រូប ក្នុងនោះមាននារី ១រូប។ លោក នូ ចំរើន អគ្គលេខាធិការសហព័ន្ធកីឡាទោចក្រយានកម្ពុជា ប្រាប់សារព័ត៌មានថ្មីៗតាមសារអេឡិចត្រូនិកនៅថ្ងៃទី២៧ ខែមករា ថា ការចូលរួមប្រកួតនៅប្រទេសថៃ ជាការវាស់ស្ទង់កម្រិតសមត្ថភាព និងបង្កើនបទពិសោធបច្ចេកទេសបន្ថែមសម្រាប់ក្រុមកម្ពុជាក្នុងព្រឹត្តិការណ៍អន្តរជាតិ មុនកីឡាស៊ីហ្គេមមកដល់នៅខែឧសភា ខាងមុខ។

 

លោក នូ ចំរើន និយាយថា៖«ទាក់ទងនឹងការប្រកួតនៅប្រទេសថៃ ពានរង្វាន់ Royal Cup ជាការប្រកួតដកស្រង់បច្ចេកទេសសម្រាប់ក្រុមជម្រើសជាតិកម្ពុជា ដើម្បីត្រៀមខ្លួនសម្រាប់ស៊ីហ្គេម២០២៣។ នេះក៏ជាការវាស់ស្ទង់កម្រិតសមត្ថភាពផងដែរក្រោយបញ្ចប់បេសកកម្មហ្វឹកហាត់ និងកីឡាថ្នាក់ជាតិកន្លងមក»។ 

 

ជាមួយគ្នានោះដែរលោក អ៊ុច  សុខវិបុល គ្រូជម្រើសជាតិកីឡាកង់ភ្នំក៏បញ្ជាក់ប្រាប់មកសារព័ត៌មានថ្មីៗតាមតេលេក្រាមថា អត្តពលិកជម្រើសជាតិកម្ពុជា ថ្វីដ្បិតមានវ័យក្មេងៗ ប៉ុន្តែតែងតែនាំលទ្ធផលល្អជូនជាតិ និងប្រជាជនកម្ពុជា។ លោក សុខវិបុល បន្ថែមថា ការប្រកួតកន្លងមកថៃ តែងតែដឹងច្បាស់ចំពោះកម្រិតសមត្ថភាពកីឡាករ-កីឡាការិនី ជម្រើសជាតិកម្ពុជា។

 

លោក អ៊ុច សុខវិបុល និយាយថា៖«កម្ពុជា យើងបានអន្រួនពិភពកីឡាជិះកង់  ជាពិសេសពិភពប្រណាំងកង់នៅថៃ  ដោយបានបង្ករការភ្ញាក់ផ្អើលចំពោះកម្រិតសមត្ថភាពរបស់កីឡាករ-កីឡាការិនីយើង ដែលមានអាយុក្មេងៗតែមានការវិវត្តន៍  កម្រិតកម្លាំង  បច្ចេកទេស ប្រហែលនឹងកីឡាករ  កីឡាការិនីជើងខ្លាំងថៃ កម្រិត ខ្បស់ដែរ»។ 

 

តាមរយៈកម្រិតសមត្ថភាពបច្ចុប្បន្ន លោក សុខវិបុល ជឿជាក់ ថាអត្តពលិកជម្រើសជាតិមានក្តីសង្ឃឹមក្នុងការប្រជែងមេដាយនាស៊ីហ្គេម ២០២៣ ខាងមុខ។

 

គ្រូជម្រើសជាតិកម្ពុជាលោក សុខវិបុល សង្កត់ធ្ងន់ថា៖«ការហ្វឹកហាត់ជាមួយគ្រូជំនាញ និងការបានចេញប្រកួតក្រៅស្រុកច្រើនដើម្បីដឹងពីសមត្ថភាព បច្ចេកទេស កម្លាំងរបស់ជម្រើសជាតិគេ។ នេះជាការព្យាយាម និងបំពេញកិច្ចការចាំបាច់សម្រាប់ការប្រជែងមេដាយនាស៊ីហ្គេម ២០២៣»។

 

គួបញ្ជាក់ថា ការប្រកួតនេះដែរដឹកនាំដោយប្រធានប្រតិភូលោក ផេង  ប៉ូលីន និងគ្រូបង្វឹកលោក អ៊ុច  សុខវិបុល។ ការប្រកួតជុំទី១ ធ្វើនៅថ្ងៃទី​២៨​ ខែមករា​ មានការចូលរួមដោយ កីឡាករ ឃឹម ម៉េងឡុង, ឆាន ឆាយហ្វុង និងកីឡារិនី ខេន ម៉ាឡៃ ប្រកួត២វិញ្ញាសា(កង់ភ្នំបុរស MenElite ចម្ងាយ២៨គីឡូម៉ែត្រ និង​MenU23 និងកង់ភ្នំនារី​ Women Elite និង​WomenU23 ចម្ងាយ២៤គីឡូម៉ែត្រ)។ ជុំទី២ ថ្ងៃអាទិត្យ​ ទី​២៩​ ខែមករា​ កីឡាករ ឃឹម ម៉េងឡុង, ឆាន ឆាយហ្វុង និងកីឡារិនី ខេន ម៉ាឡៃ ប្រកួត២វិញ្ញាសា (កង់ភ្នំបុរស Men Eliminate នារី​Women Eliminate ចម្ងាយ៧០០ម៉ែត្រ-១៤០០ម៉ែត្រ)៕