ប្អូនស្រីដ៏មានឥទ្ធិពលរបស់មេដឹកនាំកូរ៉េខាងជើង លោក គីម ជុនអ៊ុន គឺលោកស្រី គីម យ៉ូចុង នៅក្នុងសេចក្តីថ្លែងការណ៍មួយដែលបានចុះផ្សាយដោយប្រព័ន្ធផ្សព្វផ្សាយរដ្ឋកូរ៉េខាងជើង KCNA នៅថ្ងៃទី២៨ ​ខែមករាបានលើកឡើងថា កូរ៉េខាងជើងនឹងឈរលើជំហរដូចគ្នាជាមួយរុស្ស៊ីប្រឆាំងនឹងអាម៉េរិក។ 
 

«ខ្ញុំមានការព្រួយបារម្ភយ៉ាងខ្លាំងចំពោះអាម៉េរិកដែលបង្កើនភាពតានតឹងក្នុងស្ថានភាពសង្រ្គាម ដោយការផ្តល់ឱ្យអ៊ុយក្រែននូវអាវុធសម្រាប់ធ្វើការវាយប្រហារ»។ លោកស្រី គីម យ៉ូចុង បានលើកឡើងបែបនេះក្នុងសេចក្តីថ្លែងការណ៍ដដែល។ លើសពីនេះ លោកស្រីក៏បានសង្កត់ធ្ងន់ថា អាម៉េរិកនិងបណ្តាប្រទេសលោកខាងលិចគ្មានសិទ្ធិក្នុងការហាមឃាត់រដ្ឋអធិបតេយ្យពីការអនុវត្តសិទ្ធិការពារខ្លួននេះទេ។ 
 

ការលើកឡើងរបស់លោកស្រីគីមនេះបានកើតឡើងបន្ទាប់ពី អាម៉េរិកនៅសប្តាហ៍នេះ បានលើកឡើងថា ខ្លួននឹងផ្គត់ផ្គង់ដល់អ៊ុយក្រែននូវរថក្រោះប្រយុទ្ធទំនើបបំផុតចំនួន៣១គ្រឿង បន្ទាប់ពីអាល្លឺម៉ង់បានប្រកាសផ្គត់ផ្គង់អាវុធស្រដៀងគ្នានេះ។​
 

នេះមិនមែនជាលើកដំបូងឡើយដែលទីក្រុងព្យុងយ៉ាងរិះគន់ទីក្រុងវ៉ាស៊ិនតោនចំពោះអ្វីដែលកើតឡើងនៅអ៊ុយក្រែនចំពោះមុខការឈ្លានពានរបស់រុស្ស៊ី៕