បើតាមលោក មេប៉ុស្តិ៍​កំពង់ស្វាយ ក្នុងឃុំនេះ ត្រូវការកម្លាំងបន្ថែម៤ ទៅ៧នាក់ ទើបសមល្មមនៅក្នុងការផ្តល់សេវា និងការពារសុវត្ថិភាពជូន​ពលរដ្ឋទាំង ១២ភូមិ ដែលមានចំនួនជាង ១ម៉ឺននាក់ឯណោះ។ «គោលដៅរបស់យើង បើបានកម្លាំងពី ១២ ទៅ១៥នាក់ ទើបវាអាចទប់ស្កាត់បានច្រើន ព្រោះឃុំយើងវាធំដែរ។ បើបាន ១២នាក់ ក៏សមសមរម្យដែរ។ ប៉ុន្តែរាល់ថ្ងៃកម្លាំងតិចពេកហើយ មានកម្លាំងគាត់ចាស់ទៀត។ ពេលខ្លះគាត់ឈឺទៀត អ៊ីចឹង​ហើយ រាងយាប់យឺនបន្តិច»។ 

ពាក់ព័ន្ធនឹងបញ្ហានេះ លោក ប៉ាង ម៉េង ក៏ធ្លាប់បានស្នើទៅថ្នាក់លើជាច្រើនលើកដែរ ប៉ុន្តែលោកមិនទាន់បានទទួលដំណឹងជាក់ច្បាស់ថា ពេលណាប៉ុស្តិ៍របស់ខ្លួន នឹងទទួលបានកម្លាំងបន្ថែមនោះទេ។ «ខ្ញុំធ្លាប់បានស្នើថាប៉ុស្តិ៍មានកម្លាំងមិនគ្រប់ គ្រាន់សម្រាប់ធ្វើការឡើយ។ នៅពេលគេជ្រើសរើសហើយ គេប្រឡងរួចគេបញ្ជូនមកតាមប៉ុស្តិ៍ ប៉ុន្តែការជ្រើសរើស ជួនកាលមួយឆ្នាំម្ដង (ឬ)ពីរឆ្នាំម្ដ ងក៏យើងមិនដឹងដែរ។ សព្វថ្ងៃនេះ ខេត្ត(ដទៃ)គេរើសរួចហើយ នៅឡើយតែខេត្តយើង(កំពង់ធំ)មិនទាន់រើស មិនដឹងថាស្ទះត្រង់ណា ក៏យើងមិនដឹងដែរ»។ មេប៉ុស្តិ៍​កំពង់ស្វាយ រៀបរាប់ដូច្នេះ។

 

ដ្បិតតែសព្វថ្ងៃ ប៉ុស្តិ៍នគរបាលកំពង់ស្វាយមានកង្វះខាតកម្លាំង ប៉ុន្តែលោក ប៉ាង ម៉េង នៅតែព្យាយាមនៅក្នុងការបែងចែកការយាមល្បាត ជាប្រចាំនៅតាមភូមិនីមួយៗ ដោយសហការជាមួយកម្លាំងប្រជាការពារភូមិទាំង១២ ដែលជាពលរដ្ឋស្ម័គ្រចិត្ត ព្រមទាំងមានការគាំទ្រពីមេភូមិផងដែរ។ បើតាមលោកមេប៉ុស្តិ៍ កម្លាំងប្រជាការពារភូមិ នៅក្នុងភូមិទាំង១២ មានសរុប ជិត១៤០នាក់។ 

 

ក្រៅពីសហការជាមួយប្រជាការពារ លោក ប៉ាង ម៉េង អះអាងថាប្រជាពលរដ្ឋនៅក្នុងភូមិនីមួយក៏មានតួនាទីសំខាន់ខ្លាំងណាស់ដែរ នៅក្នុងការចូលរួមបង្កើតបរិយាកាសសុវត្ថិភាព នៅក្នុងឃុំ ដោយការរាយការណ៍ ករណីសង្ស័យណាមួយ​មកកាន់អាជ្ញាធរ ដើម្បីកម្លាំងប៉ុស្តិ៍ ចុះអន្តរាគមន៍ និងទប់ស្កាត់ បានទាន់ពេលវេលា៕

​

អានអត្ថបទពាក់ព័ន្ធផ្សេងទៀត៖ យុវជនសកម្មសេវាល្អ