«ថ្ងៃនេះយើងធ្វើបានល្អមែនទែន ពិសេសគណៈកម្មការរៀបចំគឺមានភាពរលូនមើលទៅគឺអស្ចារ្យ»។ លោក សេង ប៊ុនសុង លើកសរសើរមន្រ្តីបច្ចេកទេស គណៈកម្មការរៀបចំ ក្រោយព្រឹត្តិការណ៍ប្រកួតកីឡាជឺជីតស៊ូជ្រើសរើសជើងឯកថ្នាក់ជាតិបិទបញ្ចប់ទៅដោយជោគជ័យទាំងផ្នែកវិន័យ និងសកម្មភាពចូលរួម។

 

ប្រធានសហព័ន្ធកីឡាជឺជីតស៊ូកម្ពុជា លោក សេង ប៊ុនសុង ក៏សំណូមពរឱ្យយុវជន-យុវនារី កុមារា-កុមារី ជំនាន់ក្រោយយកចិត្តទុកដាក់សិក្សារៀនសូត្រហ្វឹកហ្វឺនទាំងកម្លាំងកាយ បច្ចេកទេស លក្ខខន្តិកៈប្រកួត និងឆ្វែងយល់បន្ថែមពីកីឡាជឺជីតស៊ូ។ លោក ប៊ុនសុង ជឿជាក់ថាកីឡាជឺជីតស៊ូ នឹងជោគជ័យនៅថ្ងៃមុខ។

 

លោក សេង ប៊ុនសុង និយាយថា៖«ខ្ញុំជឿថាយើងនឹងជោគជ័យទោះបីថាតិចតួចយ៉ាងណា គឺសកម្មភាពរបស់យើងប្រាកដជាជោគជ័យ។ ខ្ញុំសូមផ្តាំទៅអត្តពលិកទាំងអស់ឱ្យយកចិត្តទុកដាក់ហាត់រៀនដើម្បីឈានទៅដណ្តើមមេដាយជូនជាតិយើង»។ លោក ប៊ុនសុង ក៏សម្តែងការអរគុណចំពោះមន្រ្តីអាជ្ញាកណ្តាលចៅក្រមអន្តរជាតិផងដែរដែលបានខិតខំជួយដល់កីឡាជឺជីតស៊ូកម្ពុជាអស់ពីកម្លាំងកាយចិត្ត។

 

គួបញ្ជាក់ថា ការប្រកួតកីឡាជឺជីតស៊ូជ្រើសរើសជើងឯកថ្នាក់ជាតិ ឆ្នាំ២០២២ មានរយៈពេល ៣ថ្ងៃ ចាប់ពីថ្ងៃទី២៧ ដល់ ២៩ ខែមករា ឆ្នាំ២០២៣ នាសាលហ្វឹកហ្វឺនកីឡាការ៉ាតេ ក្នុងបរិវេណពហុកីឡដ្ឋានជាតិអូឡាំពិក។ អត្តពលិកចូលរួមសរុប ២៨នាក់ មកពីបណ្តាក្លិបចំនួន៧៕