បើតាមលោក អឿន ពៀត សកម្មភាពលួចលាក់លេងល្បែងស៊ីសង ដែលនៅសេសសល់មានដូចជាល្បែងបៀរ, ចាក់ខ្លាឃ្លោក និងល្បែងឆ្នោតជាដើម។ ក្រៅពីនេះ លោកមេប៉ុស្តិ៍រូបនេះ ក៏សង្កេតឃើញថា ការលេងល្បែងជាការកម្សាន្តក្នុងគ្រួសារ ពេលសម្រាកបុណ្យទានម្តង​ៗ ដែលនេះអាជ្ញាធរមានការយោគយល់។

ជុំវិញការលួចលាក់លេងល្បែងស៊ីសងដែលកំពុងកើតមាន លោក អឿន ពៀត មិនសូវជាសប្បាយចិត្តឡើយ ព្រោះការលេងល្បែងមិនត្រឹមតែធ្វើឱ្យប៉ះពាល់ដល់ភាពសុខសាន្តក្នុងគ្រួសារនោះទេ តែក៏ធ្វើឱ្យប៉ះពាល់ដល់សណ្ដាប់ធា្នប់ក្នុងសង្កាត់ និងអាចបង្កអសន្តិសុខដល់សង្គមផងដែរ។ ​លោក អឿន ពៀត បានបញ្ជាក់ថា៖«ល្បែងលេងចាញ់លក់ទ្រព្យសម្បត្តិ ផឹក​ស្រាចូលខ្លួន មកដល់ផ្ទះសុំលុយប្រពន្ធមិនបានវាយប្រពន្ធ ឈ្លោះជេរប្រកែកគ្នាមុខកូន​ៗ​​។ អ៊ឹចឹងកូនគ្មានទឹកចិត្តរៀន រៀនមិនចូល ធ្វើឱ្យពួកគេបោះបង់ការសិក្សា។ ពេលដែលលេងល្បែងចាញ់ និងគ្មានប្រាក់សងគេ ក៏បែកគំនិតលក់ទ្រព្យសម្បិត្ត។ លើសពីនេះ អាចនឹងទៅលួចឆក់ប្លន់នៅក្នុងមូលដ្ឋាន ដែលធ្វើឱ្យភូមិឃុំគ្មានសុវត្ថិភាព និងអសន្តិសុខ​»។

 

 

ទោះជាយ៉ាងនេះក្តី លោកមេប៉ុស្ដិ៍សំរោង បានអះអាងថា កម្លាំងសមត្ថកិច្ច នឹងបន្តអប់រំ និងណែនាំពលរដ្ឋ អំពីផលប៉ះពាល់នៃការលេងល្បែងស៊ីសងនេះ ឱ្យបានកាន់តែខ្លាំងថែមទៀត។ ទន្ទឹមនឹងនេះ ប៉ុស្តិ៍នគរបាលសំរោង ក៏បន្តចុះ​ល្បាត​តា​មភូមិនីមួយៗផងដែរ ដើម្បីធានាសន្តិសុខ និងសណ្តាប់ធ្នាប់ក្នុងសង្កាត់ ពិសេសហៅអ្នកដែលនៅតែបន្តប្រព្រឹត្តសកម្មភាពលេងល្បែងស៊ីសងនេះមកណែនាំអប់រំ និងធ្វើកិច្ចសន្យា។ បើមិនរាងចាល សមត្ថកិច្ច នឹងមានវិធានការបន្ថែម​ ឬអនុវត្តទៅតាមច្បាប់។

កញ្ញា ជុំ ផានិត ពលរដ្ឋក្នុងសង្កាត់សំរោង ​ក៏មានការព្រួយបារម្ភខ្លាំងចំពោះសកម្មភាព​លេងល្បែងស៊ីសងដែលកើតមាននៅក្នុងសង្កាត់ដែរ ព្រោះបើក្នុងភូមិមានលេងល្បែងស៊ីសង គឺធ្វើឱ្យជីវភាពរបស់ពលរដ្ឋនៅតែក្រីក្រ។ ផ្ទុយទៅវិញ បើក្នុងសង្កាត់គ្មានសកម្មភាពលេងល្បែងស៊ីសង កញ្ញា ជុំ ផានិត យល់ថា ​ជីវភាពពលរដ្ឋ នឹងមានភាពប្រសើរជាងមុន ហើយអំពើហិង្សាក្នុងគ្រួសារ ក៏ត្រូវបានកាត់បន្ថយដែរ។ 

«ល្បែងស៊ីសង បង្កឱ្យក្នុងគ្រួសារមានហិង្សា ចាញ់ល្បែងវាយដំគ្នា ឈានដល់ការលែងលះ ធ្វើឱ្យកូនកំព្រា ហើយមិនបានរៀនសូត្រ»។ នេះបើតាមអ្នកស្រី ជុំ ផានិត ដែលបានបន្តអំពាវនាវដល់អាជ្ញាធរប៉ុស្ដិ៍ ជួយបង្ក្រាប និងលុបបំ​បាត់​ល្បែងស៊ីសង នៅក្នុងភូមិឃុំឱ្យអស់ ដើម្បីកុំឱ្យមានអំពើហិង្សាក្នុងគ្រួសារ និងមានសុខសុវត្ថិភាព៕

 

អានអត្ថបទពាក់ព័ន្ធផ្សេងទៀត៖ យុវជនសកម្ម សេវាល្អ