បើតាមលោក ឌិត ទីណា កិច្ចប្រជុំបានវាយតម្លៃខ្ពស់អំពីប្រសិទ្ធភាពនៃការបង្រ្កាបបទល្មើស ដោយបានលុបបំបាត់ទាំងស្រុងនូវបទល្មើសទ្រង់ទ្រាយធំ ហើយផ្ដល់កំណើនជលផលមកវិញ ក្នុងរយៈពេលជិតមួយឆ្នាំមកនេះ។​ ដើម្បីពង្រឹងវិធានការទប់ស្កាត់ឱ្យកាន់តែមានប្រសិទ្ធភាពថែមទៀត ក្រសួងកសិកម្ម បានសម្រេចបង្កើតប្រព័ន្ធទូរសព្ទរហ័ស (Hotline) ដើម្បីតាមដាន និងបង្រ្កាបបទល្មើសនេសាទ និងបន្តយុទ្ធនាការប្រចាំការ និងល្បាតបង្ការបទល្មើសក្នុងបឹងទន្លេសាបបន្តទៀត។
 

មេបុស្តិ៍នគរបាល ត្រូវបន្តចលនា និងស្វែងរក ដើម្បីដកហូតឧបករណ៍នេសាទខុសច្បាប់ ជាពិសេសឧបករណ៍ឆក់ត្រី ទាំងក្តៅនិងត្រជាក់ រួមទាំងមងស្បៃមុង ដែលបំផ្លាញដល់ការបន្តពូជរបស់ត្រី។ លើសពីនេះ អនុវត្តការបង្ក្រាប ដោយភាពឆ្លាតវៃ និងការទទួលខុសត្រូវខ្ពស់ សំដៅរក្សាផលប្រយោជន៍យូរអង្វែងរបស់ពលរដ្ឋ។
 

ជាមួយគ្នានេះ អាជ្ញាធរមានសមត្ថកិច្ច តាមបណ្ដាខេត្តនីមួយៗ ត្រូវបង្កើនការអប់រំផ្សព្វផ្សាយអំពីច្បាប់ជលផល និងកំណត់អត្តសញ្ញាណគ្រួសារក្រីក្រពិតប្រាកដ ដែលរំពឹងតែទៅលើការនេសាទ ដើម្បីរកមុខរបរផ្សេង លើកកម្ពស់ជីវភាពពួកគេ ជាងការនេសាទ៕