«ឥឡូវកីឡាករជម្រើសជាតិយើងមានគុណផលខ្ពស់បំផុត ចេញទៅណាគឺយើងទទួលបានជោគជ័យ»។ លោក ហេង សុខឃន អគ្គលេខាធិការសហព័ន្ធកីឡាប្រដាល់គុនខ្មែរ លើកឡើងទាំងជំនឿចិត្តខ្ពស់បែបនេះ បន្ទាប់ពីលោកបានឃើញអំពីសមត្ថភាពកីឡាករ-កីឡាការិនីកម្ពុជាក្រោយប្រមូលផលពីការប្រកួតជើងឯកនៅប្រទេសម៉ាឡេស៊ី និងការប្រកួតកីឡាប្រដាល់ជ្រើសរើសជើងឯកអាស៊ីអាគ្នេយ៍ ២០២២ នៅប្រទេសថៃ ថ្មីៗនេះ។

 

 

 អគ្គលេខាធិការសហព័ន្ធកីឡាប្រដាល់គុនខ្មែរបន្តថា៖ «កីឡាករជម្រើសជាតិយើងចេញទៅគឺភាគរយតិចណាស់ចាញ់។ ក្រោយចប់ស៊ីហ្គេមលើកទី៣១ នៅប្រទេសវៀតណាម យើងបានបញ្ជូនកីឡាករទៅប្រទេសម៉ាឡេស៊ីទទួលបានជោគជ័យ និងទៅប្រទេសថៃក៏ទទួលបានជោគជ័យ ជាពិសេសក្រោមផែនការយុទ្ធសាស្រ្តគឺយើងត្រូវធ្វើយ៉ាងណាឱ្យទទួលបានជោគជ័យនាស៊ីហ្គេមនៅកម្ពុជាក្នុងនាមជាម្ចាស់ផ្ទះ»។ 
 

ដើម្បី​ឱ្យទទួលបានលទ្ធផលល្អក្នុងព្រឹត្តិការណ៍ប្រវត្តិសាស្រ្តដំបូងនៅកម្ពុជា សហព័ន្ធបានចម្រាញ់យកអត្តពលិកដែលមានគុណផល ទាំងបច្ចេកទេស កម្លាំងកាយ យុទ្ធសាស្រ្តប្រកួត វិន័យ ដែលជាធនធានដើម្បីដុសខាត់ឱ្យមានគុណភាពខ្ពស់ នាស៊ីហ្គេមលើកទី៣២ ឆ្នាំ២០២៣។

 

លោក ហេង សុខឃន បន្តថាសហព័ន្ធសើរើរើសយកកីឡាករដែលមានគុណភាពពិតប្រាកដ ជាមួយបច្ចេកទសខ្ពស់ និងកីឡាករដែលគោរពវិន័យ ដើម្បីហ្វឹកហាត់ ត្រៀមស៊ីហ្គេមលើកទី៣២ នាខែឧសភាខាងមុខនេះ៕