តបនឹងការចោទរបស់អាម៉េរិកដែលថាក្រុមហ៊ុនចិនជួយរុស្ស៊ី ក្នុងសន្និសីទប្រចាំថ្ងៃនៅថ្ងៃទី៣០ ខែមករា អ្នកនាំពាក្យក្រសួងការបរទេសលោកស្រី Mao Ning ក៏ចង្អុល​បង្ហាញពីការណ៍​ដែល​អាមេរិក​បន្តបញ្ជូនជំនួយយោធាធន់ធ្ងន់ និងអាវុធវាយលុកជាបន្តបន្ទាប់ទៅអ៊ុយក្រែន ដែលរឿងនេះធ្វើឱ្យស្ថានការណ៍អូសបន្លាយ និងបង្កភាពតានតឹងនៃជម្លោះបន្ថែមផងដែរ។​

 

«ជាជាងការឆ្លុះបញ្ចាំងពីទង្វើរបស់ខ្លួនភាគីអាមេរិកកំពុងតែសង្ស័យនិងការចោទប្រកាន់ដោយគ្មានមូលដ្ឋានលើចិន»។ លោកស្រី Mao លើកឡើងបែបនេះរួចបញ្ជាក់ថា ភាគីចិនបដិសេធការ​ចោទ​ប្រកាន់​ដែលគ្មានមូលដ្ឋានបែបនេះ ហើយនឹងមិនអង្គុយមើលអាមេរិកធ្វើឱ្យប៉ះពាល់ដល់សិទ្ធិ និង​ផល​ប្រយោជន៍ស្របច្បាប់របស់សហគ្រាសចិនឡើយ។

 

អ្នកនាំពាក្យរូបនេះបានរំលឹកឡើងវិញថា ចិនមានគោលដៅ និងជំហរត្រឹមត្រូវចំពោះបញ្ហាអ៊ុយក្រែន ហើយតែងតែឈរនៅខាងសន្តិភាព និងដើរតួនាទីស្ថាបនាក្នុងការលើកកម្ពស់ដំណោះស្រាយ​នយោបាយចំពោះវិបត្តិមួយនេះ។ ចិនមិនបានឈរស្ងៀម ឬបន្ថែមភ្លើងនោះដែរ។

 

បន្ថែមពីនេះ លោកស្រី Mao ទទូចឱ្យអាមេរិកឈប់បញ្ជូនជំនួយយោធាទៀតប្រសិនជាចង់ឱ្យជម្លោះ​បញ្ចប់រហ័ស ហើយអាម៉េរិកត្រូវតែគាំទ្រការឈានទៅរកស្ថានភាពស្ងប់ស្ងាត់ឱ្យបានលឿន តាមដែលអាចធ្វើទៅបានក្នុងលក្ខណៈទទួលខុសត្រូវ។ លើសពីនោះ ក្រុងវ៉ាស៊ីនតោនគួរតែ​បង្កើត​បរិយាកាសអំណោយផលចាំបាច់ និងលក្ខខណ្ឌសម្រាប់កិច្ចចរចាសន្តិភាពរវាងរុស្ស៊ី និងអ៊ុយក្រែន។

 

គួរបញ្ជាក់ថា​ អាមេរិក និងលោកខាងលិចតែងតែជំរុញឱ្យចិនដើរតួនាទីសកម្មជាងមុនក្នុងការ​ជួយ​សម្រាលជម្លោះតាមរយៈទំនាក់ទំនងជិតស្និទ្ធជាមួយរុស្ស៊ី។ យ៉ាងណាមិញ ចិនតែងតែ​ឆ្លើយ​តប​ទៅ​វិញ​ដោយទម្លាក់កំហុសលើអាមេរិក និងលោកខាងលិចសម្រាប់ការផ្ទុះឡើងនៃជម្លោះមួយនេះ៕