គុនខ្មែរ និងMuay Thai បានក្លាយជាប្រធានបទ ដែលត្រូវបានពិភាក្សា ក្រោយគណៈកម្មាធិការជាតិរៀបចំការប្រកួតកីឡាស៊ីហ្គេម ២០២៣ (CAMSOC) បានសម្រេចដាក់ពាក្យ «គុនខ្មែរ» ជំនួសពាក្យ «Mauy Thai» ក្នុងព្រឹត្តិការណ៍កីឡាស៊ីហ្គេមលើកទី៣២ ដែលកម្ពុជាធ្វើម្ចាស់ផ្ទះ។ 

 

ទាក់ទិននឹងបញ្ហានេះ ប្រមុខរដ្ឋាភិបាលថៃ លោកប្រាយុទ្ធ ចន្ទអូចា បានអំពាវនាវឱ្យប្រជាជនខ្លួនឈប់វែកញែកពីប្រធានបទគុនខ្មែរ និងMuay Thai។ លោកប្រាយុទ្ធបានសង្កត់ធ្ងន់បែបនេះ ក្នុងអំឡុងពេលទៅចូលរួមក្នុងកម្មវិធីមួយ រៀបចំដោយក្រសួងវប្បធម៌ថៃ នៅវិមានរដ្ឋាភិបាល ដើម្បីផ្សព្វផ្សាយពី «ទិវា​ Muay Thai» ដែលគ្រោងនឹងប្រារព្ធនៅថ្ងៃទី៦ ខែកុម្ភៈខាងមុខ។ 

 

បើតាមលោកប្រាយុទ្ធ វាមិនចាំបាច់ឡើយ ក្នុងការប្រកែកគ្នា ហើយគ្មាននរណាម្នាក់អាចយក Muay Thai​ ពីថៃបានឡើយ។ បើទោះនរណានិយាយអ្វីក៏ដោយ វាមិនគួរវិវដ្តទៅជាជម្លោះនោះទេ។ នេះបើតាមការចុះផ្សាយរបស់កាសែតបាងកកប៉ុស្តិ៍។ 

 

ទន្ទឹមនេះ មេដឹកនាំថៃ បានបន្ថែមថា វាមានការជជែកដេញដោលអំពីឈ្មោះលើគុនមួយនេះ តាមបណ្តាញសង្គម។ ត្រង់ចំណុចនេះ លោកប្រាយុទ្ធយល់ថា វាគ្មានបានការអ្វីឡើយ ហើយថៃដឹងថា អ្វីជាអ្វីហើយ៕