ទំនាក់ទំនងរវាងបារាំង និងអូស្ត្រាលីបានធ្លាក់ដល់កម្រិតទាបជាប្រវត្តិសាស្ត្រក្នុងឆ្នាំ២០២១ ដោយអូស្ត្រាលីបានលុបចោលកិច្ចសន្យាទិញនាវាមុជទឹកពីបារាំងចំនួន១២គ្រឿង ហើយបែរទៅទិញនាវាមុជទឹកដែលប្រើថាមពលនុយក្លេអ៊ែរអភិវឌ្ឍដោយបច្ចេកវិទ្យាអាម៉េរិក និងអង់គ្លេសជំនួសវិញ។ បារាំង​ខឹងសម្បារយ៉ាងខ្លាំងដោយត្រូវបាត់បង់​ប្រយោជន៍ពី​កិច្ចសន្យាមាន​តម្លៃ​ជាង៣៣ពាន់លានដុល្លារ។
 

សង្រ្គាមនៅអ៊ុយក្រែនជួយឱ្យប្រទេសទាំងពីរកាន់តែខិតជិតគ្នាជាថ្មី។ រដ្ឋមន្ត្រីការពារជាតិបារាំង លោក Sebastien Lecornu នៅថ្ងៃទី៣០ ខែមករា បានជួបជាមួយសមភាគីអូស្ត្រាលី លោក Richard Marles ជាលើកដំបូងដែលជាកិច្ចចរចាកម្រិតខ្ពស់មួយ។ ជាសមិទ្ធផលនៃជំនួប លោក Lecornu អះអាងថា បារាំង និងអូស្ត្រាលីបានព្រមព្រៀងសហការគ្នាផលិតគ្រាប់កាំភ្លើងធំទំហំ១៥៥មីលីម៉ែត្រដើម្បីជួយអ៊ុយក្រែន។ 
 

បើតាមទីភ្នាក់ងារព័ត៌មាន Reuters រដ្ឋមន្ត្រីការពារជាតិបារាំងរូបនេះ សង្ឃឹមថាគ្រាប់កាំភ្លើងធំទាំងនោះអាចចាប់ផ្តើមបញ្ជូនទៅអ៊ុយក្រែននៅត្រីមាសទីមួយនៃឆ្នាំ២០២៣។ តាមរយៈកិច្ចព្រមព្រៀងនេះ អូស្ត្រាលីនឹង​​ផ្គត់ផ្គង់​ម្សៅរំសេវ ខណៈ​ក្រុមហ៊ុន Nexter របស់​បារាំង​នឹង​ផលិតសំបក​គ្រាប់​។
 

«ពិតជាមានការបំពេញគ្នារវាងឧស្សាហកម្មការពារជាតិរបស់យើង»។ រដ្ឋមន្ត្រីការពារជាតិអូស្ត្រាលី លោក Marles ប្រាប់បែបនេះទៅអ្នកសារព័ត៌មាននៅក្រសួងការពារជាតិបារាំងក្នុងសន្និសីទសារព័ត៌ក្រោយជំនួប។ លោក Marles បន្ថែមថាទីក្រុងកង់បេរ៉ាចង់ធ្វើសកម្មភាពរួមគ្នាដើម្បីបង្ហាញអំពីការគាំទ្ររបស់អូស្ត្រាលី និងបារាំងចំពោះបញ្ហាជម្លោះនៅអ៊ុយក្រែននាពេលបច្ចុប្បន្ន។ 
 

អគ្គរដ្ឋទូតអ៊ុយក្រែនប្រចាំអូស្ត្រាលី លោក Vasyl Myroshnychenko ស្វាគមន៍យ៉ាងខ្លាំងចំពោះការប្រកាសនេះ ដោយបាននិយាយថាការផ្គត់ផ្គង់គ្រាប់កាំភ្លើងធំបន្ថែមជាចម្បងកំពូលមួយរបស់ទីក្រុងកៀវ សម្រាប់គាំទ្រយោធា។  លោក ​ Myroshnychenko  បន្ត​ថា លោក​ទន្ទឹង​រង់ចាំ​ស្តាប់​ព័ត៌មាន​លម្អិត​បន្ថែម​ទៀត​អំពី​ពេលវេលា​បញ្ចូន និង​បរិមាណ​គ្រាប់​រំសេវ​ដែល​នឹង​ត្រូវ​ទទួលបាន៕