គេហទំព័រទេសចរណ៍លំដាប់ពិភពលោក Tripadvisor ក្នុងខ្ទង់ Travelers’ Choice: Best of the Best ឆ្នាំ២០២៣ របស់ខ្លួន បានបញ្ចូលខេត្តសៀមរាប ក្នុងចំណោមតំបន់ទេសចរណ៍ដ៏លេចធ្លោ (Trending Destinations) ពោលគឺគិតចាប់តាំងពីការបើកទូលាយការធ្វើដំណើរឡើងវិញ ក្រោយវិបត្តិកូវីដ-១៩។
ក្នុងតារាងតំបន់ទេសចរណ៍លេចធ្លោ Trending Destinations ប្រចាំឆ្នាំ២០២៣ របស់ Tripadvisor សៀមរាប ឈរនៅចំណាត់ថ្នាក់លេខ៤ បន្ទាប់ពីប្រទេសគុយបា, ក្រុង Hoi An របស់វៀតណាម និងកោះម៉ូរីស នៅមហាសមុទ្រឥណ្ឌា។ នៅសៀមរាប ក្រៅពីតំបន់រមណីយដ្ឋានអង្គរ Tripadvisor បានបន្ថែមនូវគោលដៅ ផ្សេងៗទៀត ដូចជា ការមើលថ្ងៃរះនៅអង្គរវត្ត, ការទស្សនាបឹងទន្លេសាប និងកំពង់ភ្លុក, ភ្នំគូលែន, ការភ្លក្សរសជាតិម្ហូបអាហារ និងសកម្មភាពវប្បធម៌ផ្សេងៗ។
ខេត្តឈៀងម៉ៃ (ថៃ), ឆ្នេរ Grand Cayman (កោះ Cayman Islands), ក្រុងបេតិកភណ្ឌ Fes (ម៉ារ៉ុក), ក្រុងបាគូ (អាស៊ែរបៃហ្សង់), ក្រុងកដ្ឋមណ្ឌូ (នេប៉ាល់), ក្រុង Krakow (ប៉ូឡូញ), ក្រុងហូជីមិញ (វៀតណាម), កោះ Lanzarote (ប្រជុំកោះ Canary), ក្រុង Santiago (ស៊ីលី), ក្រុង Juneau រដ្ឋ Alaska (អាម៉េរិក) និងក្រុងប៉ាណាម៉ា (ប៉ាណាម៉ា) ស្ថិតក្នុងចំណោម Top 15 នៃតារាង Trending Destinations ឆ្នាំ២០២៣។
ទីតាំងទេសចរណ៍ដ៏លេចធ្លោចំនួន១០ទៀតរួមមាន កោះ Panay ប្រជុំកោះ Vasayas (ហ្វីលីពីន), កោះ Lombok ខេត្ត West Nusa Tenggara (ឥណ្ឌូណេស៊ី), កោះ Ilha do Sal (កាប់វែរ), ក្រុងវីយ៉ែន (អូទ្រីស), កោះ Paphos (ស៊ីប), ក្រុង Agadir (ម៉ារ៉ុក), តំបន់ឆ្នេរ Marmaris (តួកគី), ក្រុង Bucharest (រូម៉ានី), ក្រុងព្រុចសែល (បែលហ្ស៊ិក) និងក្រុងកូប៉ិនហាក (ដាណឺម៉ាក)៕