កីឡាករ ព្រំ សំណាង ប្រាប់សារព័ត៌មានថ្មីៗតាមសារអេឡិចត្រូនិកថ្មីៗ នៅថ្ងៃទី១ ខែកុម្ភៈ ថា ៖«រាល់ការប្រកួតរបស់ខ្ញុំ គឺតែងតែសង្ឃឹម និងជឿជាក់លើខ្លួនឯង ទោះដៃគូខ្លាំង ហើយលទ្ធផលបែបណា ខ្ញុំតែងតែផ្តល់កម្លាំងចិត្តលើខ្លួនឯង»។
 

កីឡាករគុនខ្មែរជម្រើសជាតិកម្ពុជា ជឿជាក់យ៉ាងមុតមាំ និងប្តេជ្ញាថានឹងធ្វើឱ្យបានល្អសម្រាប់ការប្រកួតដំបូងរបស់ខ្លួននៅសង្វៀន Thai Fight ដោយត្រូវជួបកីឡាករជនជាតិអង់គ្លេស Thomas Capenter លើប្រភេទទម្ងន់ ៧៨គីឡូក្រាម។

 

ទោះជំនួបដំបូងនេះត្រឹមជាការប្រកួតមិត្តភាពអន្តរជាតិ តែ សំណាង ថាខ្លួនបានហ្វឹកហ្វឺនខ្លាំងជាងការហ្វឹកហាត់ប្រកួតក្នុងស្រុកទ្វេរដង និងជាមួយគុនវុធពិសេសរបស់ខ្លួនដែលតែងតែសម្លាប់ស្នៀតគូប្រកួតនៅលើសង្វៀន។ 

 

កីឡាករ ព្រំ សំណាង និយាយថា៖«ខ្ញុំហាត់ច្រើនទ្វេរដង។ គុនវុធរបស់ខ្ញុំមានតែទាត់ និងម៉ាត់(ដាល់)ព្រោះការប្រកួតគេវាយចេញវែងៗ និងពេលយូរ»។ 

គួបញ្ជាក់ថា ការប្រកួតប្រដាល់ Thai Fight នឹងធ្វើនៅថ្ងៃទី៥ ខែកុម្ភៈ ឆ្នាំ២០២៣ នាសង្វៀន Thai Fight ទីក្រុងបាងកក ប្រទេសថៃ៕