បើតាមសេចក្ដីជូនដំណឹងរបស់ គ.ជ.ប ការចុះបញ្ជី គឺមានពីររបៀប។ ទីមួយ គឺ គណបក្សនយោបាយទាំងអស់ អាចចុះបញ្ជីបេក្ខជនឈរឈ្មោះបោះឆ្នោតនីតិកាលទី៧ បានដោយដៃ។ មួយទៀត គឺស្នើសុំចុះបញ្ជីតាមគណនី ដែល គ.ជ.ប មានកម្មវីធីសម្រាប់ចុះឈ្មោះ។ គណបក្សដែលស្នើសុំចុះឈ្មោះ ត្រូវរៀបចំបញ្ជីឈ្មោះបក្ខជនឲ្យបានមុនថ្ងៃទី២១មេសា ហើយភ្ជាប់ជាមួយនឹងពាក្យស្នើសុំទម្រង់១០០៨។ បន្ទាប់ ត្រូវយកបញ្ជីឈ្មោះបេក្ខជនទាំងនោះ ទៅបញ្ជាក់ជាមួយអាជ្ញាធរឃុំសង្កាត់ ដោយមិនត្រូវមានការកោសឬលុប។ 

 

ក្រោយពីរៀបចំលិខិតខាងលើរួច បណ្ដាបក្សដែលមានបំណងឈរឈ្មោះ ត្រូវយកទៅដាក់នៅ គ.ជ.ប តាមការបរិច្ឆេទនៃការទទួលពាក្យ។ គ.ជ.ប នឹងចាប់ផ្ដើមទទួល ពាក្យចាប់ថ្ងៃទី២៥មេសា ដល់៨ឧសភា នៅអំឡុងម៉ោងការងារ។ ការចុះឈ្មោះនេះ ពុំមានការបង់ថ្លៃសេវាឡើយ។ 

 

ជាមួយគ្នាដែរ គ.ជ.ប សង្ឃឹមថា បក្សនយោបាយ រួមទាំងគណៈកម្មាការរៀបចំការបោះឆ្នោតគ្រប់ជាន់ថ្នាក់ នឹងសហការគ្នាបានល្អ ដើម្បីជំរុញឲ្យដំណើរការបោះឆ្នោតតំណាងរាស្រ្តនីតិកាលទី៧ ប្រព្រឹត្តទៅប្រកបដោយជោគជ័យ៕