ក្នុងដំណើរឆ្ពោះទៅកាន់ព្រឹត្តិការណ៍កីឡាស៊ីហ្គេមលើកទី៣២ ឆ្នាំ២០២៣ មន្រ្តីសហព័ន្ធកីឡាការ៉ាតេកម្ពុជា កោតសរសើរចំពោះការចូលរួមរបស់សមាគម ក្លិប គ្រូបង្វឹក និងកីឡាករ-កីឡាការិនី គណៈកម្មការរៀបចំការប្រកួតដែលជាស្នូលបញ្ជាក់ពីភាពសាមគ្គីរបស់ការ៉ាតេកម្ពុជា។

 

លោក សាមឺឌី ស៊ីសុវឌ្ឍនា និយាយថា៖«ការចូលរួមពីបណ្តាក្លិប សមាគម គ្រូបង្វឹក អត្តពលិក និងគណៈកម្មការរៀបចំការប្រកួតបានបង្ហាញឱ្យឃើញយ៉ាងច្បាស់ពីការប្រមូលផ្តុំកម្លាំងមហាសាមគ្គី ការប្តេជ្ញាចិត្តប្រកបដោយឆន្ទៈ និងស្មារតីទទួលខុសត្រូវខ្ពស់ក្នុងការលើកស្ទួយវិស័យកីឡាការ៉ាតេកម្ពុជាឱ្យកាន់តែមានភាពតរីកចម្រើន»។

 

អនុប្រធានសហព័ន្ធកីឡាការ៉ាតេកម្ពុជា លោក ស៊ីសុវឌ្ឍនា បន្តថា ក្រោមការដឹកនាំរបស់ប្រធានសហព័ន្ធកីឡាការ៉ាតេធ្វើឱ្យកម្ពុជា តែងតែនាំមកនូវលទ្ធផលល្អពីលើឆាកអន្តរជាតិមកជូនកម្ពុជា ហើយសូមអត្តពលិកប្រឹងប្រែងហ្វឹកហាត់បន្ថែមទោះបីចាញ់ ឬឈ្នះត្រូវតែបញ្ចេញសមត្ថភាពផ្ទាល់ខ្លួន។

 

លោក សាមឺឌី ស៊ីសុវឌ្ឍនា និយាយថា៖«ក្រោមការដឹកនាំរបស់ប្រធានសហព័ន្ធ លោក អូន ព័ន្ធមុន្នីរ័ត្ន វិស័យកីឡាការ៉ាតេទទួលបាននូវភាពស្មើមុខស្មើមាត់ និងការកោតសរសើរលើឆាកអន្តរជាតិ។ ការប្រកួតឈ្នះឬចាញ់ ក្នុងវិស័យការ៉ាតេ គឺជាការបង្ហាញពីសមត្ថភាព និងការទទួលខុសត្រូវរបស់កីឡាករ-កីឡាការិនី ខ្លួនឯង»។
 

គួបញ្ជាក់ថា ការប្រកួតកីឡាការ៉ាតេជ្រើសរើសជើងឯកថ្នាក់ជាតិ ឆ្នាំ២០២២ ធ្វើនៅសាលដំបូលទូកក្នុងបរិវេណសាកលវិទ្យាល័យភូមិន្ទភ្នំពេញ ចាប់ពីថ្ងៃទី ៣-៥ ខែកុម្ភៈ ឆ្នាំ២០២៣ ដែលមានកីឡាករ-កីឡាការិនី២៤៨នាក់ មកពីបណ្តាសមាគម និងក្លិបចំនួន ២១ចូលរួមប្រកួតប្រជែង៕